Björgvin Halldórsson

Björgvin Helgi Halldórsson (f. 16. apríl 1951) er íslenskur söngvari, frægastur fyrir að syngja popplög og ballöður sem mörg hafa náð gríðarlegum vinsældum á Íslandi. Hann var valinn „poppstjarna ársins“ þann 1. október 1969.

Björgvin fæddist í Hafnarfirði og sleit þar barnsskónum. Fyrsta hljómsveit hans var Bendix. Hann var þó ekki lengi í þeirri hljómsveit heldur tók við söngnum í Flowers þegar Jónas R. Jónsson hætti. Björgvin hefur síðan meðal annars verið söngvari í Ævintýri, Brimkló og HLH-flokknum.

Á ferli sínum sem tónlistarmaður hefur hann flutt og hljóðritað mörg frumsamin lög sem og tökulög. Meðal þeirra eru sígild lög á borð við dúettinn „Ég vil eiga jólin með þér“, „Gullvagninn“ og „Þó líði ár og öld“.

Núna starfar Björgvin sem þulur og sitthvað fleira, auk þess að vera söngvari. Hver jól heldur hann tónleikana Jólagestir Björgvins. Að auki sér hann um sjónvarpsþættina Jólastjarna Björgvins. Þar keppa börn og unglingar í söng í von um að fá að syngja á Jólagestum Björgvins

Björgvin var sæmdur riddarakrossi Hinnar íslensku fálkaorðu í janúar 2011 fyrir framlag sitt til íslenskrar tónlistar.

  Þetta æviágrip er stubbur. Þú getur hjálpað til með því að bæta við greinina.

.