Ragnar Stefánsson

Ragnar Stefánsson jarðskjálftafræðingur

Ragnar Stefánsson (f. 14. ágúst 1938) er íslenskur jarðskjálftafræðingur og prófessor. Ragnar var í 38 ár forstöðumaður jarðeðlissviðs Veðurstofu Íslands.

Mynd:Advances in Earthquake Prediction.jpg

Advances in Earthquake Prediction eða Framfarir í jarðskjálftaspám eftir Ragnar Stefánsson (2011). Hönnuður bókarkápu Jim Wilkie

Náms- og starfsferill

Hann stundaði nám við Uppsala háskóla í Svíþjóð og lauk Fil. kand prófi (B.Sc.) í stærðfræði og eðlisfræði 1961 og Fil. kand prófi í jarðeðlisfræði 1962 og árið 1966 Fil.lic prófi (Ph.D.) í jarðskjálftafræði.

Árin 1962 – 1963 og frá 1966 til 2003 var hann forstöðumaður jarðeðlissviðs Veðurstofu Íslands og 2004 – 2005 forstöðumaður Rannsóknarstofu Veðurstofunnar við Háskólann á Akureyri. Árin 2005 – 2008 var hann rannsóknarprófessor við Háskólann á Akureyri, þar sem hann er nú prófessor emeritus.

Alla starfsævi sína hefur megin verksvið hans verið eftirlit og rannsóknir til að draga úr hættum af völdum jarðskjálfta og eldgosa. Frá 1980 hafði hann forystu um uppbyggingu mælikerfa og rannsókna sem miða að því að vara við jarðskjálftum og eldgosum og hættum sem af þeim geta stafað og hafði forystu í mögrum íslenskum og alþjóðlegum rannsóknarverkefnum sem miðuðu að því marki. Árið 2011 sendi Ragnar frá sér bókina Advances in Earthquake prediction. Research and Risk Mitigation, þar sem hann dregur saman meginniðurstöður rannsókna sinna og reynslu af jarðskjálftaspám.

Félagsstörf

Ragnar hefur sinnt ýmsum félagsstörfum. Hann var í forystu Fylkingarinnar á árunum 1966 – 1984, lengst af sem formaður samtakanna. Hann hefur verið formaður Framfarafélags Dalvíkurbyggðar frá stofnun þess 2002. Á árunum 2003 – 2008 var hann formaður samtakanna Landsbyggðin lifi. Hann var meðal stofnenda VG, Vinstri hreyfingarinnar græns framboðs, árið 1999 og er í flokksráði samtakanna.

Einkahagir

Ragnar er fæddur í Reykjavík, sonur Rósu Kristjánsdóttur og Stefáns Bjarnasonar. Með fyrri eiginkonu sinni Astrid Malmström (Ástríði Ákadóttur), menntaskólakennara, sem hann kvæntist 1961 eignaðist hann börnin Kristinu Ragnarsdóttur, Stefán Áka Ragnarsson og Gunnar Bjarna Ragnarsson. Með Björk Gísladóttur eignaðist hann Bryndísi Hrönn Ragnarsdóttur. Með síðari eiginkonu sinni Ingibjörgu Hjartardóttur, rithöfundi, sem hann kvæntist 1990 eignaðist hann stjúpsynina Hugleik Dagsson og Þormóð Dagsson. Ragnar og Ingibjörg eru búsett í Laugasteini í Svarfaðardal.

Sjálfsævisaga Ragnars, Það skelfur, kom út 2013.