Stefán Pálsson

Stefán Pálsson, formaður Samtaka hernaðarandstæðinga, fyrir utan sendiráð Bandaríkjanna í Reykjavík 18. ágúst 2007

Stefán Pálsson (1975) er íslenskur sagnfræðingur og formaður Samtaka hernaðarandstæðinga og stjórnmálaskýrandi. Hann stundaði nám við MR þar sem hann tók þátt í spurningakeppninni Gettu betur og var hann í sigurliðinu 1995. Árin 2004 og 2005 gegndi hann sjálfur stöðu dómara í keppninni. Hann var á tímabili söngvari í pönk-hljómsveitinni Tony Blair. Hann er dyggur aðdáandi Knattspyrnufélagsins Fram, breska knattspyrnuliðsins Luton Town og leikur sjálfur í framlínu áhugamannaliðsins Sheffield Tuesday. Stefán er mikill áhugamaður um viský og bjór.

Auk Gettu betur tók Stefán einnig þátt í ræðukeppninni MORFÍS á menntaskólaárum sínum. Eftir að hann lauk námi og fram eftir þrítugsaldri kom hann að þjálfun bæði Gettu betur- og Morfís-liða ýmissa framhaldsskóla. Hann hefur starfað sem spurningahöfundur og dómari í Gettu betur og Útsvari.

Stefán er mikill áhugamaður um teiknimyndasögur. Árið 2013 setti hann ræðumet með þrettán og hálfrar klukkustundar fyrirlestri um Sval og Val, sem fögnuðu 75 ára afmæli um þær mundir.

Stefán hefur verið virkur í starfi Vinstri grænna, en hann var einnig einn stofnenda Málfundafélags úngra róttæklinga (MÚR) árið 1999, sem hélt úti vefritinu Múrinn fram til 2007.

Eiginkona Stefáns er Steinunn Þóra Árnadóttir alþingiskona.

Helstu ritverk

• Bjór: umhverfis jörðina á 120 tegundum (2014, meðhöfundar Höskuldur Sæmundsson og Rán Flygenring)
• ð ævisaga (2012, meðhöfundar Anton Kaldal Ágústsson, Gunnar Vilhjálmsson og Steinar Ingi Farestveit)
• Frambókin: Knattspyrnufélagið Fram í 100 ár (2009)

Tenglar

• Bloggsíða Stefáns.
• Múrinn.