Morð á Íslandi

Þetta er listi yfir morð og morðmál á Íslandi:

Listin er ekki tæmandi og hér birtast eingöngu upplýsingar sem eru aðgengilegar almenningi. Varað er við lýsingum í textanum en flestar þeirra eru alls ekki fyrir börn né viðkvæma. Upplýsingar þær sem hér birtast eru ekki settar hér saman til að valda saklausum vanlíðan né hugarangri og því er reynt að afla traustra heimilda.

Einnig ber að benda á að þó töluvert margir hafi talist ósakhæfir sökum geðraskanna þá er átt við einstaklinga sem þjást af geðklofa, t.d. fólk sem hefur framið morð í neyslu eiturlyfja eða í skammtímabrjálæði. Fæstar geðraskanir valda ofbeldishneigð eða árásargirni.

Fyrir 20. öld

Eini raðmorðingi Íslandssögunnar

Axlar-Björn, eða Björn Pétursson, (um 1555-1596) er eini Íslendingurinn sem vitað er til að hafi gerst sekur um raðmorð. Sagan segir að móðir hans hafi þyrst í blóð á meðan hún gekk með Björn, og hafi faðir Björns gefið henni blóð úr sér að drekka. Ungur var hann sendur í vist hjá Ormi Þorleifssyni ríka að Knerri, en þar dysjaði hann fyrsta fórnarlamb sitt í fórnum í fjósinu. Er hann náðist árið 1596 játaði hann á sig 18 morð, en ekki er þó hægt að staðfesta þá tölu. Eftir fyrsta fórnarlambið myrti Björn aðallega ferðamenn og farandverkamenn sem áttu leið hjá landi hans, Axlarlandi. Þeim fórnarlömbum sökkti hann í Íglutjörn fyrir neðan túnið á bænum. Kona og þrjú börn hennar höfðu beðið um gistingu hjá Birni en Björn lokkaði börnin til sín eitt í einu og drap. Móðir þeirra komst undan og gat sagt frá því sem hún varð vitni að. Eftir að upp komst um Björn var hann dæmdur til dauða á Laugarbrekkuþingi. Hann var tekinn af lífi á Laugarbrekku. Björn var festur niður og útlimir hans brotnir með trésleggjum, en það tók afar langann tíma. Eftir að búið var að mölbrjóta útlimi hans var hann afhöfðaður og síðan var líkami hans bútaður niður og einstakir partar stjaksettir, meðal annars höfuð hans. Kynfærum hans var fleygt í fang konu hans, Steinunnar/Þórdísar (heimildum ber ekki saman um nafn hennar), sem var látin fylgjast með aftöku bónda síns. Hún var hýdd fyrir glæpi sína. Ekki finnst annar eins morðingi í sögum Íslendinga og er Axlar-Björn því bæði einstaklega óhugnarlegur og einstakur.

20. öld

• 1913 - 1. nóvember - Júlíana Silfa Jónsdóttir (1866-1931) byrlaði bróður sínum Eyjólfi Jónssyni (1863-1913) rottueitur í skyr og lést hann nokkrum dögum síðar. Júlíana ætlaði sér að ná af honum sparisjóðsbók hans en inni á henni voru nokkur hundruð krónur. Hún játaði glæpinn en sagðist hafa framkvæmt hann að ósk sambýlismanns síns, Jóns Jónssonar, og var hún dæmd til lífláts. Dómurinn var seinna mildaður.

• 1929 - 30. nóvember - Jón Egilsson (1888-1929), framkvæmdarstjóri og meðeigandi bílabúðarinnar og -verkstæðisins Sveinn Egilsson og co., fannst myrtur á verkstæðinu á Laugavegi. Látúnsstöng hafði verið notuð til að slá hann í höfuðið sem olli því að höfuðkúpa hans brotnaði. Jón svaf á verkstæðinu eftir að þar hafði verið framið innbrot. Kvöldið sem Jón var myrtur var öllu verðmætu stolið úr peningaskáp fyrirtækisins og miðað við vegsummerki var talið að sá sem verkið hafði framið væri kunnugur húsinu. Egill Haukur Hjálmarsson (1910-1990) játaði á sig morðið er lögregla hafði hendur í hári hans næsta dag. Egill sagðist ekki hafa ætlað sér að myrða Jón en eftir að hann hafði lagt hendur á verðmæti og var á leið út vaknaði Jón, svo Egill greip til láttúnsstangarinnar og sló hann. Egill var dæmdur til 16 ára fangelsisvistar í svokölluðu typtunarhúsi, en þar voru fangar látnir vinna á daginn og voru í einangrun á næturnar.

• 1945 - 26. desember - Kristján Guðjónsson (1892-1945), prentari hjá Gutenberg, fannst látinn í auðum Bragga í gamla Kveldúlfsportinu í Reykjavík, annan í jólum 1945. Ungur maður um tvítugt sá hann liggjandi í blóði sínu og tilkynnti lögreglu fund sinn. Kristján hafði verið barinn með einhverskonar barefli við bæði eyru og einnig fengið högg á munn þar sem mikið blóð var og tennur brotnar. Lögreglan hóf strax rannsókn á málinu og sá að leitað hafði verið að verðmætum á Kristjáni, en hann hafði ekki haft neitt verðmætt meðferðis. Enginn morðingi hefur fundist enn í dag og er málið því óupplýst.

• 1947 - 3. maí - Það sem hér fer á eftir er einstaklega hrottalegt og er alls ekki fyrir börn né viðkvæma! Að kvöldi 3. maí 1947 réðst Ingólfur Einarsson (1910-1969), járnsmiður, inn í bragga nr. 1 á Háteigsvegi þar sem tvær litlar stúlkur voru fyrir. Móðir þeirra hafði skroppið yfir í næsta hús og var því ekki á svæðinu. Faðir stúlknanna var einnig fjarverandi, en hann var við vinnu. Ingólfur réðst strax á yngri stúlkuna, Kristínu Kjartansdóttur (1945-1947), 2ja ára, og veitti henni mörg stungusár sem hún lést samstundis af. Eldri stúlkan, Sigríður, 8 ára, reyndi að koma systur sinni til bjargar en réðst Ingólfur þá á hana með sveðjunni sem hann hafði meðferðis og veitti henni fjölmarga áverka. Sigríði tókst að komast út úr bragganum og finna móður sína áður en það leið yfir hana. Móðir stúlknanna, Rósa Aðalheiður Georgsdóttir (1919-2009), hljóp strax yfir í braggann, en þar tók Ingólfur á móti henni með sveðjunni og út brutust mikil átök. Tveir drengir, 11 og 12 ára, heyrðu Rósu kalla á hjálp og náðu í föður annars þeirra, Gunnar Guðmundsson, og náði hann í Baldur Einarsson. Saman fóru þeir yfir að bragganum og sáu Ingólf þar inni. Skipuðu þeir Ingólfi að koma út úr bragganum. Ingólfur kastaði sveðjunni frá sér kæruleysislega og gekk út. Gunnar og Baldur tóku hann sín á milli og keyrðu með hann niður á lögreglustöð og afhentu hann lögreglunni. Aðrir menn höfðu einnig komið á vettvang og keyrðu þeir systurnar upp á Landspítala, en Rósa fór með öðrum bíl. Sigríður og Rósa lágu lengi á spítalanum með mikla áverka áður en þeim tókst að jafna sig. Ingólfur hafði dvalið á Kleppi en dvaldi á þessum tíma í skúr nálægt Sjómannaskólanum. Vitað er af því að hann hafi oft hrætt börn fyrir þennan atburð og jafnvel hótað þeim dauða. Ingólfi var gert að sæta geðrannsókn og var að lokum dæmdur ósakhæfur og að sitja öryggisgæslu á viðeigandi stofnun. Móðir stúlknanna, Rósa, stofnaði kærleikssjóð til styrktar Sogni árið 2004 í minningu Kristínar, dóttur sinnar. Hægt er að styrkja sjóðinn með því að leggja inn á reikning 010–18–930084.

• 1957 - 6. janúar - Konkordía Jónatansdóttir (1937-1957) var skotin til bana í Garðyrkjuskólanum á Reykjum í Hveragerði. Unnusti hennar, Sigurbjörn Ingi Þorvaldsson (1931-1995), skaut hana með riffli í brjóstið og lést hún litlu síðar. Sigurbjörn játaði verknaðinn en neitaði að hann hafi verið framinn af ásetningi. Vitni segja hann þó hafa fengið riffilinn lánaðann til að skjóta kálf í fjósinu sem hann vann í, og það að eftir að hann hafði hleypt af gekk hann rólegur til herbergis síns. Hann var undir áhrifum áfengis og hafði verið það nokkra daga í röð. Einnig hafði Sigurbjörn reynt að fremja sjálfsvíg nokkru áður. Hann var dæmdur til 12 ára fangelsisvistar þann 19. september 1957.

• 1958 - 1. mars - Guðjón Magnússon Guðlaugsson (1926-2013) veittist að unnustu sinni, Sigríði Sigurgeirsdóttur (1921-1958), eftir rifrildi þeirra á milli og stakk hana þrisvar sem varð henni að bana. Höfðu þau bæði setið að drykkju. Guðjón sýndi engann mótþróa er lögregla handtók hann og játaði hann morðið. Í júlí sama ár var Guðjón dæmdur til 16 ára fangelsisvistar.

• 1959 - 30. ágúst - (Sigríður) Ásta Þórarinsdóttir (1916-1959) fannst látin á elliheimilinu á Akranesi, en hún hafði verið kyrkt. Ásta var vanheil og því hafði hún dvalist á elliheimilinu í nokkur ár. Aðfaranótt 30. ágúst var brotist inn á elliheimilið, en rúða í þvottahúsinu hafði verið brotin og maður farið þar inn. Tvær stúlkur sem störfuðu á elliheimilinu voru á svæðinu og urðu þær varar við hávaða sem kom úr herbergi Ástu. Sóttu þær mann í næsta hús til að aðstoða sig. Maðurinn fór inn í herbergi Ástu og sá hana liggja þar líflausa og ungann mann sitja við rúm hennar. Ungi maðurinn, Brynjar Ólafsson (1937-1981), var mjög drukkinn og bað um að sér yrði hjálpað út. Hann var handtekinn síðar um nóttina heima hjá sér, eftir að lögregla hafði verið kölluð til. Brynjar bar við minnisleysi sökum ölvunar og sagði að hann hefði aldrei viljað skaða Ástu. Hann hafði þó oft komið við sögu lögreglu áður sökum ölvunar og eitt sinn sökum líkamsárásar. Fingrafar Brynjars fannst einnig á hálsi Ástu, svo óvéfengjanlegt þótti að hann hafði framið ódæðið. Þetta var í fyrsta skipti sem morð hafði verið framið á Akranesi. Brynjar var dæmdur til 16 ára fangelsisvistar af sakadóm Akraness í mars 1960.

• 1961 - 1. október - Ásbjörg Haraldsdóttir (1926-1961) fannst illa barin á heimili sínu í Reykjavík. Eiginmaður hennar, Húbert Rósmann Morthens (1926-2010) hringdi á sjúkrabíl en Ásbjörg var þegar látin þegar hann bar að garði. Samkvæmt Húberti og kunningjum þeirra hjóna rifust hann og Ásbjörg oft og algengt var að það kom til átaka þeirra á milli. Þá hafi Ásbjörg oft slegið mann sinn án tilefnis, en hann einnig lagt hendur á hana svo sá á henni eftir á. Umrætt kvöld höfðu Húbert og Ásbjörg setið í stofu sinni við drykkju. Þau höfðu farið að deila og síðan haft samfarir, minnst tvisvar þessa nótt. Húbert sagði að kona hans hafi í drykkjuvímunni kallað hann með nafni annarra manna í miðjum samförum og það hafi gert hann bálillann. Húbert hafði þá slegið til hennar og barið hana hvívetna þar til hún lá hreyfingarlaus á gólfinu. Hann hafi síðan borið hana inn í hjónarúmið, þá enn með lífsmarki, og sofnað sjálfur. Er hann vaknaði morguninn eftir, sá hann að eitthvað mikið var að og klæddi konu sína og kom börnum þeirra í pössun, áður en hann hringdi á sjúkrabíl. Gekkst Húbert strax við því að hafa banað konu sinni. Sakadómur Reykjavíkur dæmdi Húbert til 7 ára fangelsisvistar, en Hæstiréttur mildaði þann dóm í 6 ár í nóvember 1962. Ölvun og afbrýðisemiskast Húberts komu til refsilækkunar.

• 1967 - 7. janúar - Hjördís Ulla Vilhjálmsdóttir fannst stungin til bana í baðkari á heimili hennar í Reykjavík. Eldri kona á efri hæð hússins hafði hringt á lögregluna eftir að hafa heyrt mikinn skarkala á neðri hæðinni um morguninn. Þegar lögreglan kom á svæðið hitti hún fyrir Þorvald Ara Arason (1928-1996), fyrrum eiginmann Hjördísar og þekktan lögmann, en hann virtist vera drukkinn. Í íbúðinni fundu lögreglumennirnir lík Hjördísar, sem Þorvaldur hafði borið inn á baðherbergi, og vitni sem þar voru fyrir. Vitnin voru frænka Þorvaldar og tvítug dóttir hennar, sem og sex ára gömul dóttir Hjördísar og Þorvaldar. Þarna höfðu þá átt sér stað átök milli Hjördísar og Þorvaldar, en hún neitaði að hleypa honum inn er hann bankaði upp á þá um morguninn. Þorvaldur braut sér leið inn og réðst að Hjördísi með stórum eldhúshníf, skar hana margsinnis og stakk þar til hún lést. Frænka Þorvaldar reyndi að stíga á milli en þá skar Þorvaldur hana á fæti og var hún flutt á sjúkrahús þegar lögreglu bar að garði. Þorvaldur játaði að hafa komið með hnífinn með sér en neitaði að hafa myrt konu sína af yfirlögðu ráði. Hann var dæmdur til 16 ára fangelsisvistar fyrir morðið.

• 1968 - 18. janúar - Gunnar Sigurður Tryggvason (1925-1968), leigubílstjóri hjá Hreyfli, var skotinn í hnakkann í bifreið sinni við Laugalæk í Laugarnesi. Rignt hafði nóttina sem morðið átti sér stað og því erfitt fyrir lögreglu að afla sönnunargagna. 32 cal. skothylki fannst á vettvangi, en þau eru notuð í skammbyssur. Skammbyssur eru ólöglegar á Íslandi, en eingöngu lögreglan hafði slíkar byssur undir hendi á þessum tíma. Því er talið líklegt að byssunni og skotunum hafi verið smyglað til landsins. Einnig var annað af tveimur veskjum Gunnars horfið og því hefur þetta að öllum líkindum verið svokallað ránmorð. Morðingi Gunnars fannst aldrei og er málið því enn óupplýst.

• 1968 - 9. maí - Flugrekstrarstjóri Flugfélags Íslands (F.Í.), Jóhann Gíslason (1925-1968), var skotinn fjórum sinnum á heimili sínu svo hann hlaut bana af. Gunnar Viggó Frederiksen (1922-2013), fyrrverandi flugstjóri, hafði brotist inn heima hjá Jóhanni og kom Jóhann til móts við hann til að koma honum út. Þá brutust út átök milli þeirra og Gunnar hleypti fjórum skotum af skammbyssu sinni, sem hann hafði tekið með til að ógna Jóhanni. Gunnar kastaði byssunni frá sér fyrir utan húsið og flúði vettvang. Gunnari hafði nokkru áður verið sagt upp hjá F.Í. sökum agabrots. Gunnar var dæmdur til 16 ára fangelsisvistar.

• 1973 - 28. janúar - Stefán Egilsson (1940-1973) skotinn til bana með haglabyssu á Höfn í Hornafirði. Stefán hafði setið við drykkju heima hjá félaga sínum, Guðna Óskarssyni, er morðið átti sér stað. Guðni sagði sjálfur að þeir félagar höfðu farið að rífast sem endaði með því að Guðni henti Stefáni út. Eftir það náði Guðni í haglabyssu í hans eigu og skaut tveimur skotum. Annað skotið hæfði Stefán í brjóstið og varð honum að bana. Guðni hlaut 9 ára dóm fyrir morðið.

• 1974 - 25. janúar - Guðmundur Einarsson (1955-1974) hverfur. Var síðar tengdur við Geirfinnsmálið. --- 19. nóvember - Geirfinnur Einarsson (1942-1974) hverfur að kvöldi 19. nóvember. Dæmt var í hinu svokallaða Guðmundar-og Geirfinnsmáli árið 1980, en 6 ungmenni voru dæmd fyrir hrottalega líkamsárás sem leiddi til dauða, ekki morð. Öll játuðu ungmennin á einum eða öðrum tímapunkti að eiga aðild í báðum málum, en öll drógu þau játningar sínar til baka síðar. Umdeilt hefur verið hvort lögregla hafi farið rétt að við rannsókn málsins og sumir vilja meina að harðræði hafi verið beitt við skýrslutökur og yfirheyrslur. Hvorki Guðmundur né Geirfinnur hafa nokkurntímann fundist. Mál þetta er frægast óupplýsta morðmál á Íslandi.

• 1974 - 25. október - Jóhannes Þorvaldsson (1946-1974) fannst nær dauða en lífi á heimili kunningjakonu sinnar á Suðurlandsbraut í Reykjavík. Jóhannes hafði hlotið áverka eftir hníf, en hann hafði verið skorinn á háls og stunginn fyrir ofan bæði vinstra viðbein og vinstra herðarblað. Skurðurinn á hálsi hans var grunnur og langur, en úr honum blæddi mikið. Jóhannes lést nokkru síðar á sjúkrahúsi. Kunningjakona Jóhannesar, Munda Pálín Enoksdóttir (1939-2005), fannst inni í herbergi í húsinu, alblóðug og með töluverða áverka. Sonur Mundu og vinur hans höfðu komið á Suðurlandsbrautina í þann mund sem árásin átti sér stað. Sonur Mundu sá hana grípa brauðhníf og hlaupa inn í herbergi. Hann elti hana þangað og varð vitni að því þegar hún skar Jóhannes á háls. Réðst þá drengurinn á móður sína og afvopnaði hana. Drengirnir yfirgáfu báðir húsið til að reyna að ná sambandi við lögreglu og sjúkrabíl, en enginn sími var í húsi Mundu. Þegar sonur hennar kom aftur sá hann hvar Jóhannes var kominn inn í eldhúsið, máttfarinn og meðvitundarlítill. Þá réðst Munda aftur á Jóhannes með vasahníf og litlum skærum og stakk hann. Sonur hennar hentist þá að henni, nelgdi henni í gólfið og veitti henni þó nokkur högg. Áverkarnir sem voru á Mundu voru eftir son hennar. Við yfirheirslu viðurkenndi Munda að hafa ráðist á Jóhannes með tveimur hnífum og skærum. Hún hafði áður sætt geðrannsókn og verið vistuð á geðdeild, en hún hafði tvisvar verið kærð fyrir að ráðast að fólki með eggvopni. Viðurkenndi Munda einnig að hafa stungið Jóhannes í handlegg hans sumarið áður. Munda var dæmd ósakhæf og gert að sæta ótímabundinni öryggisgæslu á viðeigandi stofnun.

• 1974 - 8. desember - Friðmar Sædal (1917-1974) fannst stunginn til bana á heimili félaga síns í Reykjavík. Félaginn, Björgvin Óskarsson (1923-1994), var illa særður eftir stungusár. Á staðnum var einnig Kristján Kristjánsson (1939-?) sem lögreglan handtók er hún mætti á vettvang. Kristján var samvinnufús og játaði á sig morðið og árásina á Björgvin. Friðmar var með 8-9 stungusár en Björgvin hafði verið stunginn 4 sinnum í bringu og kvið. Kristján var dæmdur ósakhæfur og gert að sæta gæslu á viðeigandi stofnun. -

• 1976 - 4. apríl - Guðbjörn Tryggvason (1947-1976) fannst látinn á Akureyri. Guðbjörn hafði hlotið þrjú skotsár í hnakka og eitt í öxl, en skammt frá fannst 22. cal. Remington riffill sem hafði verið stolið úr búð á Akureyri þessa sömu nótt. Tveir drengir sögðu lögreglu að þeir höfðu séð annan dreng með riffil og voru þeir beðnir um að bera kennsl á hann. Í kjölfarið var Úlfar Ólafsson (1958-2009) handtekinn. Guðbjörn og Úlfar þekktust ekki og morðið því tilefnislaust. Úlfari var gert að sæta geðrannsókn, en sakadómur Akureyrar dæmdi hann til 16 ára fangelsisvistar þann 3. nóvember 1976.

• 1976 - 6. júlí - Guðjón Atli Árnason (1927-1976) fannst myrtur í Kópavogi. Hann lést eftir þung höfuðhögg en á svæðinu fannst blóðugur hnullungur og fjöl sem notuð voru við morðið. Mikið blóð var á vettvangi að sögn lögreglu. Kristmundur Sigurðsson (1958-) og Albert Ragnarsson (1958-) voru dæmdir fyrir morðið, en Albert fékk 8 ára dóm og kom til refsilækkunar að hann var ekki orðinn 18 ára. Kristmundur fékk 12 ára dóm.

• 1976 - 26. ágúst - Lovísa Kristjánsdóttir (1919-1976) fannst látin á heimili sínu á Miklubraut, en hún lést eftir mörg þung höfuðhögg. Ásgeir Ingólfsson (1934-2001) hafði brotist inn í hús Lovísu með það í huga að ræna þaðan frímerkjasafni sem hann vissi af, ásamt örðum verðmætum. Lovísa kom þó heim á meðan Ásgeir var enn þar og bað hann hana um að þegja um innbrotið ef hann skilaði henni öllu. Lovísa neitaði því og sló Ásgeir hana þá ítrekað í höfuðið með kúbeini. Hann losaði sig síðan við sönnunargögnin á haugunum. Ásgeir var handtekinn nokkrum dögum síðar og vísaði hann þá lögreglu á morðvopnið á haugunum. Ásgeir var dæmdur til 16 ára fangelsisvistar af sakadómi Reykjavíkur þann 4. mars 1977.

• 1977 - 19. júlí - Hrafn Jónsson (1927-1977) fannst myrtur í fangageymslu lögreglunnar á Hverfisgötu. Hrafn hafði verið færður í fangageymslu lögreglunnar sökum ölvunar og sofnaði þar. Stuttu síðar voru tveir aðrir menn færðir inn í klefann, Grétar Vilhjálmsson (1932-1999) og Guðmundur Antonsson (1931-), og veittust þeir að Hrafni þar sem hann lá. Fangavörður heyrði dynk úr klefanum og fór að athuga hvað var að en þá höfðu Grétar og Guðmundur barið Hrafn í andlitið og strekt belti um háls hans. Grétar og Guðmundur voru færðir úr klefanum og Hrafni hagrætt. Stuttu síðar tóku fangaverðirnir eftir því að Hrafn var orðinn mjög veikburða. Hringt var á sjúkrabíl en Hrafn var látinn þegar komið var upp á spítala. Grétar og Guðmundur gengust við því að hafa ráðist á Hrafn og hlaut hvor um sig 8 ára fangelsisvist fyrir morðið.

• 1977 - 15. ágúst - Halldóra Ástvaldsdóttir (1955-1977) fannst látin í bifreið unnusta hennar í Rauðhólum. Í bílnum með henni var Einar Hjörtur Gústafsson (1955-1979), unnusti hennar. Hann hafði skotið Halldóru þrisvar sinnum, tvisvar gegnum höfuðið og einu sinni gegnum hálsinn, með rússneskum 22. calibera riffli. Einar reyndi einnig að fremja sjálfsvíg, en hann skar á úlnlið hægri handar og skaut sig rétt fyrir neðan hjartað. Skotið missti marks og fór beint í gegnum Einar án þess að drepa hann. Er vegfarendur bar að garði var reynt að stöðva blæðinguna frá úlnlið hans meðan beðið var eftir sjúkrabíl. Einar játaði á sig morðið og sagðist hafa framið það af yfirlögðu ráði. Einar var dæmdur til 16 ára fangelsisvistar en Hæstiréttur mildaði dóminn í 14 ár. Einar Hjörtur lést árið 1979, stuttu eftir að Hæstiréttur hafði dæmt í máli hans.

• 1979 - 1. apríl - Svavar Sigurðsson (1922-1979) fannst látinn á heimili sínu í Reykjavík. Þráinn Hleinar Kristjánsson (1943-) gekkst við morðinu. Aðdragandi morðsins var sá að Þráinn, Svavar og sambýliskona Svavars, Lóa, sátu saman við drykkju. Svavar og Lóa fóru að rífast og sakaði Svavar hana um framhjáhald. Í kjölfarið sagðist Lóa vilja óska þess að hún gæti drepið hann og bauð Svavar henni hníf til verksins. Sagðist Lóa aldrei geta drepið hann þó hún vildi. Svavar gekk því næst inn í eldhúsið en snéri sér við í hurðinni og spurði Þráinn hvort hann hefði kjark til að drepa hann. Þráinn gekk þá inn í eldhúsið með hnífinn sem Svavar hafði boðið Lóu og stakk honum í kvið Svavars. Þráinn risti Svavar síðan á hol, frá kvið og upp. Þar sem Svavar lá í blóði sínu á gólfinu bað hann Þráinn um að ljúka því sem hann hafði byrjað á og kraup þá Þráinn hjá honum og skar hann á háls. Þráinn var handtekinn sama dag og var dæmdur til 16 ára fangelsisvistar af Hæstarétti þann 4. maí 1981.

• 1981 - 25. janúar - Sigfús Steingrímsson (1943-1981) fannst brenndur til bana á heimili sínu í Breiðholti. Björg Benjamínsdóttir (1954-), eiginkona Sigfúsar, játaði á sig morðið. Miklir erfiðleikar voru í hjónabandi þeirra Bjargar og Sigfúsar, meðal annars óhófleg áfengisneysla hans. Kvaðst Björg hafa í örvæntingu sinni keypt bensín sem hún hafði síðan hellt yfir mann sinn þetta kvöld, þar sem hann lá drykkjudauður, og borið eld að. Sigfús lést fljótt af völdum brunasára. Þótti það vera sannað að morðið var framið af yfirlögðu ráði og var Björg dæmd í 16 ára fangelsi. Hæstiréttur mildaði dóminn í 14 ár í mars 1983.

• 1981 - 18. september - Hans Fritz Joachim Arnold Wiedbusch (1936-1981), þýskur blómaskreytingarmaður, fannst látinn á heimili sínu í Reykjavík. Hafði hann verið stunginn til bana með bæði hníf og skærum, en það fundust um 20 stungur á bringu hans og kvið. Skæri stóðu enn upp úr annarri augntóft hans. Aðkoman var að sögn lögreglu hræðileg. Gestur Guðjón Sigurbjörnsson (1953-1999) gekkst við glæpnum. Gestur var greindur með geðsjúkdóma og taugasjúkdóma og var ný kominn af geðdeild Landspítalans þegar morðið átti sér stað. Gestur og Hans höfðu hist á skemmtistaðnum Óðal við Austurvöll og endaði með því að Hans bauð Gesti með sér heim. Þegar þangað var komið drukku þeir áfengi og neyttu marijuana. Gestur kvaðst hafa orðið veikur og viljað fara heim. Hans taldi hann hins vegar á að gista og gaf honum tvær svefntöflur til að hjálpa honum að sofa. Gestur vaknaði hins vegar við það að Hans var að stunda við hann kynmök og brá mjög. Fór hann inn á salerni en þar fann hann skæri sem hann notaði meðal annars við morðið. Gestur sagði að hann hafði hugsað strax og hann vaknaði og varð var við það sem var að gerast, að hann yrði að ganga frá Hans. Gestur var dæmdur sakhæfur og til 12 ára fangelsisvistar, en til refsilækkunar var það að atburðurinn olli Gesti töluverðri geðshræringu og að ásetningur til manndráps var ekki fyrir hendi áður. Hins vegar fannst dómurunum að eftir að ásetningur myndaðist hafi aðfarirnar verið hrottalegar, það hafi ekkert komið í veg fyrir að Gestur klæddi sig og færi.

• 1982 - 16. ágúst - Yvette Bahuaud fannst skotin til bana. Yvette og Marie Luce Bahuaud, franskar systur sem staddar voru á Íslandi, fengu far hjá Grétari Sigurði Árnasyni (1942-) sem skildi þær eftir á Sæluhúsi á Skeiðarárssandi. Grétar kom hins vegar aftur og í kjölfar rifrildis brutust út átök. Grétar barði Marie Luce í höfuðið með byssuskefti og elti síðan Yvette sem hafði flúið. Grétar skaut Yvette í bakið og er hann tók eftir því að hún væri látin flúði hann vettvang. Grétar var handtekinn degi seinna. Hann var síðan dæmdur til 16 ára fangelsisvistar þann 28. júní 1983.

• 1983 - 1. janúar - Óskar Árni Blomsterberg (1954-1983) stunginn til bana. Þórður Jóhann Eyþórsson (1957-), banamaður Óskars, og Óskar voru í gamlárs-samkvæmi í Reykjavík þegar til átaka kom milli þeirra. Enduðu þau á því að Þórður stakk Óskar fjórum sinnum, meðal annars í lunga sem var banameinið. Þórður játaði fyrir dómi og var dæmdur til 14 ára fangelsisvistar.

• 1985 - 15. mars - Jósef Liljendal Sigurðsson (1955-1985) fannst látinn í JHS-Innréttingum, fyrirtæki í hans eigu. Sigurður Adolf Frederiksen/Alfreðsson (1965-) játaði á sig morðið. Jósef og Sigurður höfðu hist á veitingastaðnum Ypsilon en Jósef hafði síðan boðið Sigurði í partý. Þeir fóru yfir í fyrirtæki Jósefs þar sem hann sofnaði fram á borð. Sigurður sagðist hafa ýtt við honum og þá hafi Jósef brugðið og slegið hann í andlitið. Í kjölfarið tók Sigurður upp járnrör sem hann notaði til að slá Jósef minnst þrisvar í höfuðið. Jósef féll á gólfið og greip Sigurður þá skrúfjárn sem hann notaði til að stinga Jósef í kvið og andlit. Sigurður ætlaði sér að fela öll vegsummerki og helti því eldfimum efnum yfir Jósef og bar eld að. Jósef lést eftir að eldurinn hafði kviknað. Sigurður kvaðst muna lítið eftir kvöldinu en mundi að hann hafði látið vita af eldinum. Dyraverðir veitingastaðarins Ypsilon slökktu eldinn og lögregla mætti á vettvang. Aðspurður sagðist Sigurður ekki hafa athugað hvort Jósef væri á lífi áður en hann kveikti eldinn. Sakadómur Kópavogs dæmdi Sigurð til 17 ára fangelsisvistar þann 7. nóvember 1985.

• 1985 - september - Ónefndur drengur stunginn til bana fyrir utan skemmtistaðinn Villta Tryllta Villa í Reykjavík. Annar ónefndur drengur var handtekinn og ákærður fyrir morðið. Sagt var að hinn ákærði, 15 ára, glímdi við andlega erfiðleika og einelti. Til átaka kom milli drengjanna, eftir að sá fyrr nefndi sem var 16 ára veittist að hinum, stríddi honum og sparkaði í hann. Yngri drengurinn varaði hinn við, en sá tók ekki mark á honum. Slagsmálin enduðu á því að yngri strákurinn stakk hinn drenginn með vasahníf í hjartastað. Andlegt ástand hins ákærða kom til refsilækkunar en dómarar töldu að fangelsisvist myndi hafa slæm áhrif á persónuþroska drengsins ásamt fleiru. Drengurinn var dæmdur til 4 ára fangelsisvistar, sem var þó öll skilorðsbundin og er þetta eina dæmið um slíkt hér á landi.

• 1988 - 10. janúar - Gréta Birgisdóttir (1961-1988) fannst látin á heimili sínu að Klapparstíg í Reykjavík. Eiginmaður hennar, Bragi Ólafsson (1936-2002), hringdi á lögreglu og tilkynnti andlátið. Hann var mjög ölvaður er lögreglu bar að garði en áverkar á líki konu hans leiddu til þess að lögreglan handtók hann. Sparkað hafði verið í andlit og höfuð Grétu og köðlum hafði verið vafið um háls hennar og þrengt að. Skjaldbrjóskið hafði brotnað og dánarorsök var köfnun. Bragi neitaði til að byrja með að hafa orðið konu sinni að bana og sagði hana sjálfa hafa valdið áverkunum. Við áframhaldandi yfirheyrslur viðurkenndi Bragi þó að vera valdur að áverkum hennar. Bragi var dæmdur til 10 ára fangelsisvistar fyrir morðið.

• 1988 - 3. september - Alda Rafnsdóttir (1963-1988) fannst látin á heimili sínu í Kópavogi. Alda hafði farið út þá um kvöldið á dansleik þar sem hún hitti fyrir Guðmundur Sveinbjörnsson (1967-). Guðmundur og Alda fóru á heimili hennar, en hún bjó ein með sjö ára gömlum syni sínum og við hlið foreldra sinna. Sonur Öldu hafði átt afmæli fyrr um daginn. Guðmundur fór með Öldu inn í herbergi hennar, þar sem sonur hennar svaf þungum svefni í öðru rúmi. Svo virðist sem Alda hafi neitað að láta að vilja hans og í kjölfarið reiddist Guðmundur, tók höndum um háls hennar og herti að. Eftir það lá hún meðvitundarlaus í rúminu en Guðmundur náði í hníf í eldhúsinu og stakk hana þrívegis í kviðinn. Þriðja stungan fór í gegnum kviðarhol hennar og varð henni að bana. Sonur Öldu vaknaði ekki við átökin milli Guðmundar og henna. Guðmundur yfirgaf síðan íbúðina en endaði á því að taka leigubíl á lögreglustöðina í Kópavogi þar sem hann sagði frá því sem gerst hafði. Guðmundur var dæmdur til 14 ára fangelsisvistar af sakadómi Reykjavíkur í janúar 1989.

• 1988 - 15. nóvember - Karl Jóhann Júlíusson (1921-1988) var stunginn til bana á heimili sínu í Reykjavík. Meðal annars var búið að rista Karl á hol, skera hann á háls og rita Bader Meinhof á vegg fyrir ofan lík hans, með hans eigin blóði. Bjarni Bernharður Bjarnason (1950-) var kærður fyrir morðið en hann var dæmdur ósakhæfur sökum geðbilunar, en hann var haldinn ranghugmyndum um þann látna. Bjarni var dæmdur til að vera vistaður á viðeigandi stofnun árið 1989 en slík stofnun var ekki til staðar á Íslandi á þessum tíma. Því var Bjarni vistaður á Litla-Hrauni.

• 1990 - 25. apríl - Þorsteinn Guðnason (1942-1990) lést eftir höfuðhögg og stungusár. Tveir menn, Guðmundur Helgi Svavarsson (1962-) og Snorri Snorrason, fóru að bensínstöðinni ESSO í Stóragerði í þeim tilgangi að ræna þar fjármunum og öðru. Þar réðust þeir á Þorstein, sem vann þar sem bensínafgreiðslumaður, og veittu honum áverka sem leiddu til dauða hans. Sakadómur Reykjavíkur dæmdi Guðmund til 20 ára fangelsisvistar og Snorra til 18 ára fangelsisvistar.

• 1991 - 14. febrúar - Hafdís Hafsteinsdóttir (1966-1991) fannst látin á meðferðarheimili þroskahamlaðra við Njörvasund í Reykjavík. Hafdís hafði dvalist á meðferðarheimilinu sökum þroskahömlunar af völdum hægfara vöðvarýrunarsjúkdóms. Ónefndur vinur hennar, þá 28-29 ára að aldri, dvaldist einnig á heimilinu og ræddu þau oft saman. Þessi vinur hennar gekkst síðan við morðinu eftir að lík Hafdísar fannst undir rúmi á meðferðarheimilinu. Stakk vinurinn hana margsinnis og faldi síðan undir rúmi í hálfann annan sólahring. Við yfirheyrslur sagði maðurinn að hann hafði reiðst Hafdísi fyrir að heimsækja sig á fimmtudegi en ekki þriðjudegi. Ekki kemur fram hvar hann fékk hnífinn sem hann notaði við árásina. Niðurstaða dómara var sú að maðurinn væri ósakhæfur sökum geðrænna vandamála og var hann vistaður í íbúð í bænum þar sem fjölskylda hans sinnti honum allan sólahringinn, en engin önnur úrræði voru fyrir hendi. Umdeilt hefur verið hvort óhætt sé að setja óstöðugann mann undir gæslu fjölskyldu hans en ekki fagaðila.

• 1991 - 17. febrúar - Óskar Þórðarson (1943-1991) var stunginn til bana á heimili sínu í Reykjavík. Sambýliskona hans, Munda Pálín Enoksdóttir (1939-2005), hringdi á Kleppsspítala og sagðist hafa banað Óskari. Var hún á staðnum er lögreglu bar að garði og viðurkenndi að hafa framið verknaðinn. Munda hafði áður gerst sek um morð, en hún hafði myrt vin sinn, Jóhannes Þorvaldsson árið 1974. Hún hafði losnað úr haldi árið 1985 og síðan gerst sek um minnst tvær árásir þar sem hún réðst að fólki með hníf. Munda var aftur talin ósakhæf vegna geðröskunar og var dæmd til að sæta öryggisgæslu á viðeigandi stofnun. Hún eyddi ævinni meira og minna inni á stofnunum og síðustu árunum á réttargeðdeildinni að Sogni.

• 1991 - 3. mars - Úlfar Úlfarsson (1963-1991) fannst látinn á tröppum bakhúss á Bankastræti. Banamein var höfuðáverkar. Veski Úlfars fannst ekki langt frá morðstað og var það tómt. Tvö ungmenni, 17 ára drengur og 15 ára stúlka, sem enn var í grunnskóla, voru handtekin í sambandi við málið. Þau játuðu að hafa ráðist á Úlfar, sem og annan mann sömu nótt, og rænt af þeim verðmætum. Stúlkan lokkaði Úlfar með sér inn í húsasund þar sem drengurinn beið þeirra og sló hann Úlfar í höfuðið sem olli því að hann féll í tröppurnar. Við fallið rak Úlfar höfuðið í steintröppurnar með þeim afleiðingum að hann lést. Stúlkan var dæmd til 3 ára fangelsisvistar en drengurinn til 5 ára.

• 1993 - 22. ágúst - Ragnar Ólafsson (1960-1993) var stunginn til bana á heimili sínu i Reykjavík. Banamaður hans var Þórður Jóhann Eyþórsson (1957-) sem áður hafði verið dæmdur fyrir morð af yfirlögðu ráði, það er morðið á Óskari Árna þann 1. janúar 1983. Var hann að ljúka skilorði fyrir þann dóm er árásin á Ragnar átti sér stað. Þórður réðst inn á heimili Ragnars og stakk hann með hníf sem hann hafði meðferðis. Þórður flúði síðan af vettvangi eftir að hafa kastað hnífnum frá sér. Tvö vitni voru að árásinni, sambýliskona Ragnars og fyrrum sambýliskona Þórðar, sem voru hjá Ragnari er Þórður réðst inn. Þórður gaf sig fram við lögreglu eftir að hafa heyrt í fréttum að Ragnar hafði látist. Héraðsdómur Reykjaness dæmdi Þórð til ævilangrar fangelsisvistar en Hæstiréttur mildaði þann dóm og dæmdi Þórð til 20 ára fangelsisvistar árið 1994.

• 1996 - 29. desember - Hlöðver Sindri Aðalsteinsson (1941-1996) fannst látinn við Krísuvíkurveg þar sem honum hafði blætt út. Hafði hann verið skotinn með haglabyssu í aftanverðann upphandlegg hægri handar og höfðu höglin tætt í sundur margar æðar svo mikið blæddi. Í kjölfarið fór Hlöðver í lost og blæddi út. Hjarta Hlöðvers var einnig mjög veikt fyrir. Sveinn Ingi Andrésson (1972-) var handtekinn í kjölfar morðsins og játaði hann á sig verknaðinn. Samkvæmt Sveini hafði hann sjálfur hringt í Hlöðver kvöldið áður og beðið hann að sækja sig. Sveinn var töluvert ölvaður og tók hlaðna haglabyssu með sér í bílinn. Hann bað Hlöðver að keyra út á Krísuvíkurveg en þar ákvað Sveinn að bjóða Hlöðveri birginn og hóf að tala um meint kynferðisofbeldi Hlöðvers gagnvart Sveini sem átti sér stað um tíu árum áður. Sveinn sagði Hlöðver hafa gert lítið úr misnotkuninni og hafi reiðst. Báðir yfirgáfu þeir bílinn meðan á samræðunum stóð og endaði með því að Sveinn skaut að Hlöðveri, með það í huga að ógna honum. Hlöðver hafi þá hlaupið á brott en Sveinn tók bíl hans og keyrði hann inn í Hafnarfjörð þar sem hann skildi hann eftir. Sveinn sagði við yfirheyrslur og fyrir dómi að hann hafði ekki ætlað sér að drepa Hlöðver heldur einungis hræða hann, en Hlöðver hafi snúið sér við um leið og Sveinn skaut og höglin þá lent í upphandlegg hans. Sveinn var dæmdur til 10 ára fangelsisvistar, en tekið var tillit til fortíðar Sveins og Hlöðvers og þess að Sveinn var ekki í andlegu jafnvægi þegar hann hleypti af haglabyssunni. Hlöðver hafði áður verið ásakaður og kærður fyrir að misnota unga drengi en aldrei hafði náðst að sanna neitt alvarlegt á hann.

• 1997 - 1. janúar - Sigurgeir Bergsson (1977-) stakk stjúpföður sinn í hálsinn með hníf eftir rifrildi þeirra á milli á nýársnótt. Hnífurinn skar sundur slagæð í hálsi svo maðurinn lést samstundis. Báðir voru mennirnir taldir mjög ölvaðir. Sigurgeir var dæmdur til 10 ára fangelsisvistar af Héraðsdómi Reykjaness í maí 1997. Heimildum ber ekki saman um morðvopn né aldur geranda svo ekki er unnt að fullyrða þessar upplýsingar. Þar að auki eru upplýsingar um þetta mál lítt aðgengilegar.

• 1997 - 13. maí - Sigurður Sigmundsson (1971-1997) lést af völdum mikilla höfuðáverka. Átök höfðu brotist út á nektarstaðnum Vegas á Laugarvegi sem enduðu með því að Sigurður fékk högg á höfuð og féll harkalega í gólfið. Í kjölfarið missti hann meðvitund og sjúkrabíll var kallaður á staðinn, en það tók hann um 10 mínútur að komast á vettvang. Sigurður komst aldrei til meðvitundar og lést af völdum heilablæðingar 14. maí 1997. Fjórir menn voru handteknir í kjölfar árásarinnar á Vegas en tveimur þeirra var sleppt mjög fljótlega. Mál þetta var allt saman mjög óljóst, vitnum bar ekki saman um hver gerði hvað og niðurstöður læknisvottorða um ástand Sigurðar gáfu óskýra mynd. Tveir menn voru að lokum kærðir fyrir líkamsárás sem leiddi til dauða, þeir Sverrir Þór Einarsson (1962-) og Sigurþór Arnarson (1973-). Bentu þeir ítrekað á hvorn annan við rannsókn málsins. Sverrir hlaut á endanum 2 ára fangelsisdóm fyrir aðild sína en Sigurþór var sýknaður af Héraðsdómi sökum skorts á sönnunargögnum. Hæstiréttur dró sýknu Héraðsdóms til baka og dæmdi Sigurþór til 2 ára og 3 mánaða fangelsisvistar. Sigurþór sat inni í átján mánuði en hann kærði niðurstöðu Hæstaréttar til Mannréttindadómstóls Evrópu. Mannréttindadómstóll komst að þeirri niðurstöðu að Hæstiréttur hafði dæmt Sigurþór á mjög veikum grunni og mikið skorti af sönnunargögnum og skilaði inn því mati árið 2003. Árið 2012 var málið tekið aftur upp í Hæstarétti og Sigurþór sýknaður af öllum ákærum.

• 1997 - 2. október - Lárus Ágúst Lárusson (1961-1997) var myrtur í Heiðmörk en hann lést eftir þung höfuðhögg. Tvíburabræðurnir Sigurður Júlíus (1972-2007) og Ólafur Hannes Hálfdánarsynir (1972-) voru dæmdir fyrir morðið, en Ólafur gaf sig sjálfur fram við lögreglu. Talið er að Sigurður hafi lagt á ráðin um að ræna Lárus og keyrðu bræðurnir með hann upp í Heiðmörk í þeim tilgangi. Lárusi tókst að fela sig um stund en fundu bræðurnir hann og er Sigurður sagður hafa slegið hann tvívegis í höfuðið með þungu grjóti. Sigurður var talinn haldinn geðklofa af geðlækni en dómarar dæmdu hann samt sem áður sakhæfann. Ólafur Hannes keyrði yfir Lárus eftir árásina og hlaut 12 ára dóm og Sigurður 16 ára dóm. Sigurður lést árið 2007 í klefa sínum á Litla-Hrauni sökum lyfjaeitrunar.

• 1999 - 14. júní - Agnar Wilhelm Agnarsson (1951-1999) stunginn til bana á heimili sínu í Reykjavík. Þórhallur Ölver Gunnlaugsson (1958) var handtekinn sömu nótt og ódæðið átti sér stað, en hann fannst blóðugur niðri í miðbæ Reykjavíkur. Hins vegar tengdi lögreglan Þórhall ekki við morðið á Agnari fyrr en hann hafði flúið land, en hann var handtekinn í Kaupmannahöfn 18. júní og framseldur til Íslands. Þórhallur neitaði sök í máli og dró til baka framburð sinn um átök milli hans og Agnars. Þórhallur er einnig talinn hafa rænt skartgripum úr svefnherbergi Agnars. Bæði Agnar og Þórhallur voru undir áhrifum fíkniefna. Þórhallur var dæmdur til 16 ára fangelsisvistar fyrir morðið, en Héraðsdómur dæmdi í málinu 18. maí árið 2000. Þórhallur hlaut viðurnefnið Vatnsberinn eftir morðið.

• 1999 - 3. desember - Sigurbjörg Einarsdóttir (1919-1999) var stungin til bana á heimili sínu í Reykjavík, en stunga í eyra sem náði niður í kok leiddi hana til dauða. Sigurbjörg var áttræð er hún lést. Árásin var talin tilefnislaus og hrottaleg, en Elís Helgi Ævarsson (1973-) var dæmdur fyrir morðið, og hlaut hann 16 ára dóm. Hann á að baki langann sakaferil.

• 2000 - 4. febrúar - Áslaug Óladóttir (1980-2000) stungin margsinnis þar til hún lést af áverkum sínum. Morðið talið sérstaklega hrottalegt. Rúnar Bjarki Ríkharðsson (1978-) játaði verknaðinn, ásamt öðrum brotum á borð við líkamsárásir og nauðgun á sama svæði og tíma og morðið átti sér stað. Rúnar var ekki talinn eiga sér neinar málsbætur og var dæmdur til 18 ára fangelsisvistar af Héraðsdómi Reykjaness þann 20. desember 2000, og staðfesti Hæstiréttur þann dóm þann 23. maí 2001.

• 2000 - 27. maí - Áslaug Perla Kristjónsdóttir (1979-2000) lést af áverkum sínum eftir að hafa fallið af 10. hæð fjölbýlishúss í Kópavogi. Ásgeir Ingi Ásgeirsson var ákærður fyrir morðið en hann neitaði sök. Mikið var tekist á fyrir rétti um hvort um slys væri að ræða eða ásetning. Hæstiréttur taldi óvéfenglegt að Ásgeir hafi veist að Áslaugu og hrint henni fram af svölum í íbúð hans eftir að hún neitaði honum um samfarir. Ásgeir lýsti síðar yfir ábyrgð á dauða Áslaugar. Ásgeir var dæmdur til 14 ára fangelsisvistar af Hæstarétti þann 21. júní 2001.

• 2000 - 23. júlí - Hallgrímur Elísson (1952-2000) lést eftir að þrengt hafði verið að hálsi hans þar sem hann lá á dýnu í íbúð í Reykjavík. Bergþóra Guðmundsdóttir var ákærð í málinu en hún neitaði sök. Hún og Hallgrímur voru bæði gestkomandi í íbúðinni en þau, húsráðandi og annar gestur höfðu setið við drykkju og mögulega neytt annarra lyfja að kvöldi morðsins. Þrátt fyrir gloppóttann vitnisburð var talið óyggjandi að Bergþóra hefði framið morðið. Hún var dæmd til 14 ára fangelsisvistar af Héraðsdómi Reykjavíkur 30. mars 2001. Hæstiréttur staðfesti þann dóm 14. júní 2001.

• 2000 - 8. nóvember - Einar Örn Birgisson (1973-2000) fannst myrtur, en hann var sleginn fjórum sinnum í höfuðið með hamri. Atli Guðjón Helgason (1967-) játaði á sig morðið viku síðar, en hann hafði áður reynt að hylja og losa sig við sönnunargögn. Dómarar töldu Atla hafa banað Einari af ásetningi og því hefði hann ekkert sér til málsbóta. Atli var dæmdur til 16 ára fangelsisvistar af Héraðsdómi Reykjavíkur þann 29. maí 2001.

21. öld

• 2001 - 27. október - Finnbogi Sigurbjörnsson (1957-2002) fannst látinn í garði í Breiðholti. Ásbjörn Leví Grétarsson (1976-) gekkst við morðinu, en hann og Finnbogi höfðu hist í miðbæ Reykjavíkur og farið saman heim til Ásbjörnar til að reykja maríjúana. Ásbjörn sagði viðleitni Finnboga hafa orðið kynferðislega og að það hafi minnt hann á misnotkun sem hann varð fyrir í æsku. Við þá minningu hafi Ásbjörn sturlast og fundist hann vera að veitast að þeim sem hafði misnotað hann, en ekki að Finnboga, og fundist hann þurfa að deyða brotamanninn. Ásbjörn náði í eldhúshníf og stakk hann Finnboga átt sinnum í bringu og bak og skar hann níu sinnum þvert yfir háls hans. Finnbogi lést þó ekki við þetta svo Ásbjörn náði í hafnarboltakylfu og sló Finnboga um tíu þungum höggum í höfuðið. Þar sem Finnbogi andaði enn, þrátt fyrir árásir Ásbjarnar, náði Ásbjörn í plastpoka og setti yfir höfuð Finnboga. Þegar Finnbogi hafði loks gefið upp öndina, dró Ásbjörn hann út úr íbúð sinni og yfir í nærliggjandi garð. Blóðslóð lá frá íbúðinni og að líkinu og var hún um 80 metra löng. Ásbjörn var byrjaður að þrýfa blóð af áhöldunum sem hann notaði og af gólfinu þegar lögreglu bar að garði. Ásbjörn var dæmdur ósakhæfur sökum sturlunar og geðrofs, og gert að sæta öryggisgæslu á réttargeðdeildinni að Sogni.

• 2002 - 18. febrúar - Bragi Óskarsson (1951-2002) fannst látinn á Víðimel í Reyjavík. Bragi hafði hlotið mörg högg í höfuð og andlit sem höfðu verið veitt með kjötexi, slaghamri og sveðju. Sömu nótt og Braga var ráðinn bani var brotist inn á dekkjaverkstæði við Ægisíðu, en vísbendingar þaðan leiddu lögreglu til innbrotsþjófsins sem reyndist einnig vera morðingi Braga. Hafði morðinginn, Þór Sigurðsson (1978-), rekist á Braga og myrt hann engöngu vegna þess að Bragi varð á vegi hans. Þór var undir miklum áhrifum fíkniefna þegar bæði innbrotið og morðið áttu sér stað. Hann játaði verknaðinn og vísaði lögreglu á morðvopnin og blóðug föt í ruslatunnu rétt hjá morðstaðnum. Héraðsdómur Reykjavíkur dæmdi Þór til 16 ára fangelsisvistar þann 8. janúar 2003.

• 2002 - 6. mars - Steindór Kristinsson (1952-2002) var stunginn í bringu og kvið og lést 18 dögum síðar af lungnabilun vegna bráðrar lungnabreytingar og lungnabólgu í kjölfar þess. Steindór er talinn hafa barið sambýliskonu sína í andlitið að kvöldi árásarinnar en sambýliskonan, Sigurhanna Vilhjálmsdóttir (1963-), er sögð hafa reiðst heiftarlega og ráðist á Steindór eftir að hann barði hana. Sigurhanna bar við minnisleysi sökum ölvunar, en hún hlaut 8 ára dóm í Héraðsdómi Reykjavíkur þann 25. október 2002.

• 2002 - 25. maí - Magnús Frey Sveinbjörnsson (1980-2002) lést 2. júní af völdum áverka sem honum voru veittir fyrir utan skemmtistaðinn Spotlight aðfararnótt 25. maí 2002. Tveir menn á svipuðum aldri, Baldur Freyr Einarsson (1979-) og Gunnar Friðrik Friðriksson (1982-), áttu í átökum við Magnús sem meðal annars sáust á upptökum eftirlitsmyndavélar. Baldur hafði ítrekað kýlt Magnús í höfuðið, skallað hann og sparkað margsinnis og af miklu afli í höfuð hans með fæti og hné. Gunnar sparkaði Magnús niður eftir að hann reyndi að reisa sig við, en í kjölfarið hlaut Magnús höfuðkúpubrot og einnig blæddi inn á heila hans. Hann lést af völdum heilablæðingar og heilabjúgs. Bæði Baldur og Gunnar neituðu að hafa valdið dauða Magnúsar en viðurkenndu að hafa veist að honum umrædda nótt. Baldur var dæmdur til 3ja ára fangelsisvistar og Gunnar til 2ja ára.

• 2002 - 26. september - Bragi Ólafsson (1936-2002) var stunginn til bana á heimili sínu að Klapparstíg í Reykjavík, en hann hafði orðið konu sinni að bana í sama húsi 14 árum áður. Banamein var stungusár sem náði inn að hjarta, en hann hafði verið stunginn víða, meðal annars í framhandlegg og kvið. Þegar lögreglu og sjúkrabíl bar að garði var Bragi enn með lífsmarki og gat hann skýrt lögreglu að einhverju leiti frá atburðarásinni. Bragi var látinn þegar komið var upp á sjúkrahús. Að sögn nágranna Braga var mikið blóð á veggjum íbúðarinnar og á gangi hússins. Lögreglan handtók Stein Ármann Stefánsson (1966-2013) sama kvöld. Steinn Ármann hafði áður komið við sögu hjá lögreglu og var hann talinn veikur á geði. Fjölskylda Steins hafði þá þegar lýst yfir áhyggjum sínum af andlegu ástandi Steins, en hún taldi víst að hann gæti reynst hættulegur og framið eitthvert voðaverk. Steinn neitaði til að byrja með að hafa verið valdur að dauða Braga, en viðurkenndi það fljótlega. Vafi lék á um sakhæfi hans, en geðlæknar voru ekki sammála um ástand Steins að kvöldi morðsins. Hæstiréttur dæmdi hann þó að lokum ósakhæfann og var honum gert að sæta öryggisgæslu á réttargeðdeildinni að Sogni. Hann er talin hafa verið á sterkum lyfjum er hann framdi verknaðinn og hafi verið haldinn ranghugmyndum. Steinn á að baki langann sakaferil.

• 2004 - 31. maí - Guðný Hödd Hildardóttir (1992-2004) fannst stungin til bana á heimili sínu á Hagamel í Reykjavík. Móðir Guðnýar, Hildur Árdís Sigurðardóttir (1961-), hafði veist að Guðnýu og bróður hennar með hníf. Bróðir Guðnýar tókst að flýja úr íbúðinni og fór yfir til vinar síns sem hringdi á lögregluna. Er lögreglan kom heim til Hildar fann hún Guðnýu látna í rúmi sínu, en hún hafði verið stungin margsinnis. Hildur sjálf var illa særð þar sem hún hafði stungið sjálfa sig eftir að hafa sært son sinn og banað dóttur sinni. Hildur var færð á spítala þar sem hennar var gætt, en þaðan var hún síðan færð að Sogni. Hildur hafði áður reynt að fremja sjálfsvíg og hafði einnig sagt í návist annarra að frekar myndi hún drepa sig og börnin sín en að þau yrðu tekin af henni. Kennarar barnanna höfðu að auki lýst yfir áhyggjum af velferð þeirra. Hildur var dæmd óskahæf og gert að sæta öryggisgæslu á réttargeðdeildinni að Sogni.

• 2004 - 4. júlí - Sri Rahmawati (1970-2004) var myrt með kúbeini og taubelti. Morðinginn bar líkið inn í sturtuklefa og þreif það. Setti svo í poka og bar út í bíl. Hann henti farsíma hennar í sjóinn og losaði sig við líkið í hraungjótu í nágrenni Hafnarfjarðar. Morðinginn, Hákon Eydal (1959-), barnsfaðir fórnarlambsins, var dæmdur í 16 ára fangelsi 2005.

• 2004 - 1. nóvember - Sæunn Pálsdóttir (1979-2004) lést eftir að eiginmaður og barnsfaðir hennar þrengdi að hálsi hennar með þvottasnúru aðfaranótt 1. nóvember 2004 á heimili þeirra í Kópavogi. Eiginmaður hennar, Magnús Einarsson, játaði verknaðinn fyrir tengdaforeldrum sínum og lögreglu. Talið er að morðið hafi verið framið af ásetningi, en engu að síður sýndi Magnús iðrun. Héraðsdómur dæmdi Magnús til 9 ára fangelsisvistar en Héraðsdómur þyngdi þann dóm og dæmdi Magnús til 11 ára fangelsisvistar þann 23. febrúar 2006.

• 2004 - 12. desember - Ragnar Björnsson (1949-2004) lést á veitingastaðnum Ásláki í mosfellsbæ aðfararnótt 12. desember 2004. Hafði Ragnar staðið við anddyri veitingastaðarins með konu sinni er maður íklæddur jólasveinabúningi tróðst inn og felldi niður glas sem brotnaði við fætur Ragnars. Ragnar helti sér í kjölfarið yfir manninn, Loft Jens Magnússon (1979-), sem brást illur við og kýldi Ragnar í hálsinn. Við það féll Ragnar á gólfið og rak höfuðið í. Loftur yfirgaf staðinn en vinur hans náði honum og fékk hann með sér til baka. Lífgunartilraunir eiganda veitingastaðarins og síðan sjúkraliða og uppi á Landspítala báru ekki árangur. Slagæð hafði rifnað við höggið sem Loftur veitti Ragnari og blæddi mikið inn á höfuðkúpu Ragnars. Hann lést vegna mikillar blæðingar á milli heila og innri heilahimnu. Loftur var enn á staðnum, og mjög ölvaður, er lögreglan mætti á vettvang og var hann strax handtekinn. Hæstiréttur mat það svo að þó árás Lofts hafi verið hrottaleg og tilefnislaus hafi hann ekki gert sér grein fyrir því að hún gæti leitt Ragnar til dauða. Loftur var dæmdur til 3 ára fangelsisvistar fyrir manndrápið.

• 2005 - 15. maí - Phong Van Vu lést af völdum innvortis blæðinga í brjóstholi. Phong var stunginn í brjóstkassa og víðar með þeim afleiðingum að hnífurinn gekk inn í bæði lungu og lungnaslagæð og í gegnum þind hans. Phong og maður að nafni Phu Tién Nguyén (1972-) voru í veislu í Kópavogi og höfðu deilt í töluverðann tíma um hvor ætti að sýna hinum meiri virðingu sökum aldurs, en það er hefð í heimalandi þeirra að hinn yngri sýni hinum eldi meiri virðingu. Eftir þrálátar deilur á Phong að hafa veitt Phu höfuðhögg og Phu þá reiðst. Hann greip til hnífs sem hann hafði í vasa sínum og lagði til Phong. Vitni á staðnum sögðu að árásin hafi verið einbeitt og af ásetningi og töldu dómarar framburð Phu um að um sjálfsvörn væri að ræða ótrúverðuga. Phu réðst á Phong og veitti honum áverka á hálsi, handlegg, kvið og brjóstkassa sem leiddi hann til dauða. Vitni sem reyndi að stíga á milli hlaut stungusár við mjöðm af völdum Phu. Það tók töluverð átök að stoppa árás Phu, en þegar það hafði tekist reyndi Phu aftur að ráðast á Phong og leitaði að nýjum vopnum. Dómurum þótti Phu ekki eiga sér neinar málsbætur og var hann dæmdur til 16 ára fangelsisvistar af Hæstarétti þann 6. apríl 2006.

• 2005 - 14. ágúst - Hermaðurinn Ashley Turner (1985-2005) fannst látin í kompu nálægt líkamsræktarstöð hermanna á herstöðinni á Keflavíkurflugvelli, en hún hafði verið falin þar. Miklir áverkar voru á líkama Turner en hún hafði einnig hlotið stungusár í hnakka sem talið er að hafi leitt hana til dauða. Herlögreglan handtók Calvin Eugene Hill (1984-) sem var talinn hafa ráðist á Turner á stigagangi í blokk á herstöðinni, en vitni lýstu vettvangi eins og sláturhúsi. Turner var enn á lífi er hún fannst en var úrskurðuð látin þegar komið var með hana á hersjúkrahús á Vellinum. Hill og Turner höfðu átt í deilum en Hill hafði stolið greiðslukorti hennar ásamt öðrum hermanni og tekið út af því miklar fjárhæðir. Hill var enn að bíða niðurstöðu í því máli þegar morðið átti sér stað. Bandaríksir sérfræðingar voru sendir til landsins til að rannsaka vettvang. Blóð úr Turner fannst á skóm Hill og átti hann yfir höfði sér lífstíðar- eða dauðadóm ef hann yrði fundinn sekur. Herinn tók algjörlega við rannsókn málsins eftir að í ljós kom að engir Íslendingar tengdust málinu, og Hill var í kjölfarið fluttur á herstöð bandaríska hersins í Þýskalandi þar sem hann var áfram yfirheyrður. Hann neitaði sök allan tíman og var sýknaður af öllum kærum fyrir herrétti. Kom það varnarliðinu mjög á óvart þar sem allir höfðu talið óvéfengjanlegt að Hill væri morðinginn. Foreldrar Turner voru mjög ósáttir með meðferð málsins og gagnrýndu harðlega hve langann tíma rannsóknin tók. Einnig gagnrýndu þau það að Hill hafi verið leyft að búa í sama stigagangi og Turner þrátt fyrir að hann hafi stolið af henni háum fjárhæðum og hún átt að vitna gegn honum í því máli. Ef engin ný sönnunargögn koma upp sem benda á að einhver annar gæti verið morðingi Turner, eða gefa staðfestingu á sekt Hill, mun engum vera refsað fyrir morðið. Þó flestir telji ótvírætt að Hill sé morðingi Turner, virðist málið vera óupplýst.

• 2005 - 20. ágúst - Bragi Halldórsson (1985-2005) fannst látinn í íbúð á Hverfisgötu að morgni menningarnætur 2005. Bragi var gestkomandi í íbúðinni en þar bjó vinur hans, Sigurður Freyr Kristmundsson, ásamt hjónum sem áttu íbúðina. Sigurður, Bragi og húsbóndinn sátu og töluðu saman við eldhúsborðið. Sigurður segist hafa gripið 14cm flökunarhníf sem þarna var til þess að leggja áherslu á orð sín, en hann kvaðst ekki muna um hvað var rætt. Sigurður segir að hann og Bragi hafi staðið upp samtímis og hnífurinn í kjölfarið stungist í Braga. Vitni segja hins vegar að Bragi hafi setið kjurr og aðeins Sigurður hafi staðið upp. Einnig sagði finnskur réttarmeinafræðingur að töluverðu afli hefði þurft að beita til að stinga Braga á þennan hátt, en hnífurinn gekk í gegnum rússkinnsjakka Braga, skinn, brjósk, lifur og hjarta. Reynt var að bjarga Braga en honum blæddi út. Sigurður flúði vettvang en snéri fljótt aftur og var þá handtekinn af lögreglu. Í blóði hans fannst bæði amfetamín og kókaín, en Sigurður hafði neytt eiturlyfja marga daga í röð fyrir morðið, sem og drukkið áfengi. Sigurður sagðist aldrei hafa ætlað að skaða Braga og að Bragi hafi verið vinur hans. Héraðsdómur Reykjavíkur dæmdi Sigurð sakhæfann og til 14 ára og 6 mánaða fangelsisvistar fyrir morðið í febrúar 2006.

• 2007 - 5. júní - Haukur Sigurðsson lést eftir mikla áverka sem Ellert Sævarsson (1979-) veitti honum. Ellert játaði á sig morðið en hann var bæði undir áhrifum áfengis og amfetamíns er morðið átti sér stað. Ellert var dæmdur í 16 ára fangelsi af Héraðsdómi Reykjaness þann 27. september 2010.

• 2007 - 27. júlí - Maður á fertugsaldri var skotinn til bana á Sæbrautinni. Árásarmaðurinn, einnig á fertugsaldri, notaði tveggja kalibera tékkneskan riffill til verksins. Fórnarlambið náði að forða sér áður en árásarmaðurinn skyti aftur og var honum hleypt inn í sendiferðabíl. Ökumaður sendiferðabílsins tók svo eftir því að maðurinn hreyfði sig ekki og keyrði hann að Laugardalslaug þar sem hann og starfsmenn laugarinnar reyndu að koma manninum aftur til lífs meðan beðið var eftir sjúkrabíl. Maðurinn var úrskurðaður látinn á Landspítalanum stuttu síðar. Árásarmaðurinn keyrði á Þingvelli þar sem hann svipti sig lífi með sama skotvopni. Skildi hann eftir bréf þar sem hann útskýrði gjörðir sínar. Þær upplýsingar eru ekki aðgengilegar.

• 2007 - 7. október - Borgþór Gústafsson (1963-2007) lést eftir mikla höfuðáverka. Ákærði, Þórarinn Gíslason, neitaði sök og bar við minnisleysi sökum drykkju og lyfjaneyslu. Dómarar töldu sök Þórarins óvéfengjanlega og var Þórarinn í kjölfarið dæmdur í 16 ára fangelsi af Héraðsdómi Reykjavíkur þann 22. maí 2008.

• 2009 - 17. ágúst - Bragi Friðþjófsson (1978-2009) lést eftir höfuðáverkaáverka af höndum Bjarka Freys Sigurgeirssonar (1978) í herbergi Bjarka í Hafnarfirði. Bjarki játaði morðið að hluta og var dæmdur í 16 ára fangelsisvist af Héraðsdómi Reykjaness þann 30. nóvember 2009.

• 2010 - 15. ágúst - Hannes Þór Helgason (1973-2010) var stunginn til bana og játaði Gunnar Rúnar Sigurþórsson (1987-) að hafa myrt Hannes og var hann dæmdur í 16 ára fangelsi af hæstarétti árið 2011.

• 2011 - 2. júlí - Agné Krataviciuté sögð hafa kyrkt nýfætt sveinbarn sitt þar til það lést. Agné neitaði sök en var dæmd til 2 ára fangelsisvistar þann 28. mars 2012.

• 2011 - 5. júlí - Þóra Elín Þorvaldsdóttir (1990-2011) kyrkt af sambýlismanni sínum og barnsföður, Axel Jóhannssyni, í Heiðmörk. Axel keyrði hana upp á Landspítalann eftir að hún lést og gaf sig fram. Hann var dæmdur ósakhæfur og hefur verið vistaður á Sogni.

• 2011 - 14. júlí - Hilmar Þórir Ólafsson (1966-2011) stunginn til bana á veitingastaðnum Monte Carlo í Reykjavík. Redouane Naoui (1972-) var sakfelldur fyrir morðið og var dæmdur í 16 ára fangelsi af Héraðsdómi Reykjavíkur þann 24. nóvember 2011.

• 2012 - 3. febrúar - Þóra Eyjalín Gísladóttir (1976-2012) stungin til bana í Hafnarfirði. Hlífar Vatnar Stefánsson (1989-), unnusti hinnar látnu, játaði á sig morðið og var dæmdur í 16 ára fangelsi af Hæstarétti þann 17. janúar 2013.

• 2013 - 17. mars - Scott James Carcary sagður hafa hrist fimm mánaða gamla dóttur sína það harkalega að hún lést nokkrum tímum síðar. Scott neitar sök en var dæmdur í 5 ára fangelsi í Héraðsdómi Reykjavíkur þann 10. apríl 2014.

• 2013 - 7. maí - Karl Jónsson (1953-2013) stunginn til bana á heimili sínu á Egilsstöðum. Friðrik Brynjar Friðriksson (1988-) var dæmdur í 16 ára fangelsi fyrir morðið af Héraðasdómi Austurlands þann 23. október 2013.

Hlutföll

Dómur	Tilfelli	Prósentur
20 ár	Tvö	2,9%
18 ár	Tvö	2,9%
17 ár	Eitt	1,4
16 ár	Tuttuguogþrjú	33%
14 ár	Sjö	10%
12 ár	Þrjú	4,7%
11 ár	Eitt	1,4%
10 ár	Þrjú	4,7%
9 ár	Eitt	1,4%
8 ár	Fjögur	11,4%
6 ár	Eitt	1,4%
5 ár	Tvö	2,9%
4 ár	Eitt	1,4%
3 ár	Tvö	2,9%
2 ár	Tvö	2,9%
Brotamaður ósakhæfur	Ellefu	15,7%
Brotamaður framdi sjálfsvíg	Eitt	1,4%
Óupplýst mál	Þrjú	4,7%