Laugavegur (gönguleið)

Brú yfir Kaldaklofskvísl, á Laugaveginum.

Varða á Laugaveginum nálægt Hrafntinnuskeri.

Skáli Ferðafélagsins í Emstrum

Laugavegurinn kallast gönguleiðin milli Landmannalauga og Þórsmerkur. Er hún um 54 km löng og fer hæst í um 1050 m.y.s. við Hrafntinnusker. Leiðin er afar vinsæl meðal innlendra sem erlendra göngumanna enda þykir hún ægifögur og bjóða upp á brot af flestu því sem íslensk náttúra hefur upp á að bjóða.

Áfangar á gönguleiðinni eru látnir ráðast af skálum sem á henni er. Ef gengið er frá Landmannalaugum eins og algengast er verður fyrst á vegi manna skálinn í Hrafntinnuskeri, svo Álftavatni, Hvanngili og Emstrum (Botnum), en allir skálarnir eru í eigu Ferðafélags Íslands. Endar gönguleiðin í Þórsmörk þar sem gengið er í Húsadal, Langadal eða Bása (í Goðalandi). Algengast er að skipta leiðinni upp í 3-4 dagleiðir þó svo það sé stundað að hlaupa leiðina á allt frá fimm klukkustundum.

Gönguleiðin milli Landamannalauga og Hrafntinnuskers eru 12 km. Áætlaður göngutími er 4-5 klukkustundir. Hækkunin er mest á þessum kafla leiðarinnar eða 470 metrar. Oftast er þetta fyrsta dagleiðin en sumir leggja snemma af stað og ganga alla leið inn að Álftavatni. Vegalengdin milli Hrafntinnuskers og Álftavatns eru einnig 12 km og er lóðrétt hækkun 490 metrar. Þessi hækkun er jafnari en á fyrsta degi. Áætlaður göngutími er 4-5 klst. Þriðja göguleiðin er inn í Emstrur. Þangað er 15 km ganga og lítil hækkun, 40 m. Göngutíminn er 6-7 klukkustundir. Síðasti dagurinn fer svo í að ganga inn í Þórsmörk og er vegalengdin og áætlaður göngutími sá sami og á þriðja degi. Hækkunin er þó meiri eða 300m.

Fyrsta ferðin sem skráð var á vegum Ferðafélags Íslands á Laugaveginum var 30. september 1978. Árið 1979 var í fyrsta sinn sem Ferðafélag Íslands auglýsti fjögurra daga ferð um Laugaveginn og Þórsmörk og var sú ferð farin 13.-18. júlí 1979. Eftir það hefur fjöldinn allur af fólki og ferðamönnum farið Laugaveginn á vegum Ferðafélags Íslands.

Margir halda því fram að það sé enginn vandi að ganga Laugaveginn en það er vissulega ekki rétt. Það fer allt eftir aðstæðum og það sem ræður mestu er veðrið. Það getur ekki talist auðvelt að ganga í marga klukkutíma í roki og rigningu og jafnvel snjó með þunga byrgðir á bakinu. Aftur á móti er miklu auðveldara að fara Laugaveginn í sól og hita, þá er einnig hægt að gefa sér meiri tíma til að staldra við og njóta útsýnisins.

Undirbúningur

Þegar undirbúa skal nokkra daga gönguferð um Laugaveginn þarf að hafa ýmislegt í huga eins og hvort maður hafi andlegan og líkamlegan styrk til göngunnar. Það þarf einnig að huga að því að hafa góðan búnað með sér og skiptir þar mestu máli góðir gönguskór, nægilega stór bakpoki til að geyma auka fatnað og nesti og hlífðarföt sem henta veðri eftir aðstæðum.

Fjallið Háalda, 1089 metrar að hæð

Fyrsti hluti göngunnar

Fyrsti hluti göngunnar um Laugaveginn er yfir Laugahraun sem er talin hafa myndast í kringum 1480. Þegar komið er upp á hraunið má sjá mjög fallegt útsýni, margskonar fjöll og gil í alls konar litum. Þar má finna fjall sem heitir Háalda sem er hæðsta fjallið á þessum slóðum enda er það 1089 metrar að hæð. Næsti hluti göngunnar liggur að hásléttunni, þar er landslagið sundurskorið því árnar á þessum slóðum hafa með árunum étið sig niður í mjúkt bergið. Frá hásléttunni má einnig sjá fjallið Háöldu þar sem það virkar ennþá stærra og meira en séð frá Laugahrauni. Næsti áfangastaður göngunnar er Stórihver, er það eini staður göngunnar sem má finna grænt gras. Þetta er því tilvalin staður til að setjast niður og hvíla sig, jafnvel gæða sér á nesti. Stórihver er gufu-gutlhver. Þegar göngunni er haldið áfram er komið að Hrafntinnuskerssvæðinu. Þegar enginn snjór er á staðnum og sólin skín þá lítur svæðið út eins og glitrandi eyðimörk og landslagið þar endurspeglast eins og kista full af gimsteinum. Talið er að Hrafntinnusker hafi myndast í Eldgosi í kringum árið 900.Finna má skála við Hrafntinnusker og er gott að hvíla sig þar eftir fyrsta hluta göngunnar.

Öræfajökull

Annar hluti göngunnar

Frá Hrafntinnuskeri liggur leiðin meðfram hlíðum Reykjafjalla, þar er dalur sem er að mestum hluta sléttur. Þegar gengið er úr dalnum liggur leiðin við Kaldaklofsfjall. Ef veður leyfir er sjálfsagt að ganga upp fjallið Háskerðing sem er 1281 metri að hæð. Ef skyggni er gott þaðan sést meðal annars vel til Öræfajökuls og Langjökuls. Næsti áfangastaður er Jökultunga. Þar má finna mikla litadýrð og ljósgrænar mosaþembur. Leiðin niður Jökultungu er mjög brött og þarf því að hafa varann á og fara varlega. Leiðin héðan liggur að Álftavatni þar sem má finna tvo skála sem er tilvalið að hvíla lúin bein fyrir næsta dag.

Þriðji hluti göngunnar

Næsti áfangastaður gögnunnar er Hvanngil, þá er gengið frá Álftavatni yfir Brattháls. Á leiðinni má sjá fjöll eins og Bláfjöll og Smáfjöll. Þaðan er komið að göngubrú við Kaldaklofskvísl. Austan Kaldaklofskvísl skiptist leiðin í tvennt, annars vegar er hægt að ganga eftir Mælifellssandi og hins vegar Emstrum. Ef valið er að ganga eftir Emstrum þá er aftur um tvær leiðar að velja, hægt er að ganga að Útigönguhöfðum, þar sem má meðal annars finna fjallið Hattafell en einnig er hægt að fara suður með Álftavatni. Þar er að finna fallegt útsýni og hægt er að vaða á á leiðinni. Þeir sem ganga á Emstrum mega ekki láta fram hjá sér fara að ganga að Markaðsfljótsgljúfri. Það er 160 til 180 metra djúpt og er talið að það hafi myndast í hamfarahlaupi fyrir um 2500 árum.

Fjórði hluti göngunnar

Næst hefst ganga suður Almenninga, eftir að komið er upp úr Bjórgili er komið að Fauskatorfum sem er skóglendi og er því tilvalin staður til þess að staldra við og hvíla sig. Næst er gengið yfir Kápu, er það síðasti brattinn á leiðinni. Þegar komið er niður af Kápu er komið að Þröngá, þar verður að vaða árnar. Þröngá dregur nafn sitt af þröngum gljúfrum sem eru í kringum hana og hún rennur í gegnum. Næst er komið að Hamraskógi og þar á eftir er komið að Skagfjörðsskála í Langadal á Þórsmörk. Síðasti spölur Laugavegsgöngunnar er skóglendi.

GPS staðsetningar:

• Landmannalaugar 63°59,600 19°03,660
• Höskuldsskáli í Hrafntinnuskeri 63°55,840 19°09,700
• Álftavatn 63°51,470 19°13,640
• Botnaskáli í Emstrum 63°45,980 19°22,450
• Skagfjörðsskáli í Þórsmörk 63°40,960 19°30,890

Heimildir

• Heimasíða Ferðafélags Íslands
• Leifur Þorsteinsson og Guðjón Ó. Magnússon, Laugavegurinn, Gönguleiðin milli Landmannalauga og Þórsmerkur (Reykjavík: Ferðafélag Íslands, 1999).

Tengt efni

• Fimmvörðuháls

Tenglar

• Myndir og lýsing á gönguleiðinni (þýska)
• Kort af gönguleiðinni