Helgi magri

Helgi magri Eyvindarson var íslenskur landnámsmaður, sem nam land í Eyjafirði. Hann var kristinn og bjó á Kristnesi.

Faðir hans var Eyvindur austmaður Bjarnarson en móðir hans Rafarta dóttir Kjarvals Írakonungs. Önnur dóttir Kjarvals var Kormlöð móðir Þorgríms Grímólfssonar sem var aftur bróðursonur Álfs egska frá Ögðum sem nam land við Varmá. Sonur Þorgríms var Eyvindur faðir Össurar er átti Beru dóttur Egils Grímssonar. Björgu systur Helga átti Úlfur skjálgi, sonur Högna hvíta. Úlfur nam Reykjanes milli Þorskafjarðar og Hafrafells. Jörundur Úlfsson var faðir Þjóðhildar er giftist Eíríki rauða. Samkvæmt Landnámabók fann annar niðji Úlfs, Ari Másson, landið Hvítramannaland og er þangað sex daga sigling í vestur frá Írlandi og er það nálægt Vínlandi; dvaldi Ari þar lengi.

Helgi var fæddur á Írlandi. Eyvindur og Rafarta létu Helga í fóstur í Suðureyjum þegar hann var barn að aldri en þegar þau komu að sækja hann tveimur vetrum seinna hafði hann verið sveltur svo að þau þekktu hann ekki. Eftir það var hann kallaður Helgi magri. Hann varð virðingarmaður mikill er hann fullorðnaðist. Hann kvæntist Þórunni hyrnu, dóttur Ketils flatnefs, og áttu þau mörg börn.

Helgi hafði tekið kristni en var blendinn í trúnni og hét á Þór til sjófara og harðræða. Hann ákvað að fara til Íslands með konu sína og börn og nema þar land. Þegar hann sá til lands hét hann á Þór að vísa sér til lands og sigldi síðan norður um land og inn í Eyjafjörð og tók land á Árskógsströnd og var þar fyrsta veturinn. Um vorið sigldi hann svo innar í fjörðinn, kannaði héraðið og nam svo allan Eyjafjörð. Hann settist svo að á Kristnesi og bjó þar. Sagt er að áður en hann reisti bæ sinn hafi Þórunn kona hans orðið léttari í Þórunnareyju í Eyjafjarðará og alið þar dóttur sem kölluð var Þorbjörg hólmasól.

Þar sem landnám Helga var mjög stórt fengu margir landnámsmenn sem síðar komu land hjá honum, auk þess sem börn hans og aðrir ættingjar fengu hluta af landnámi hans.

Tengill

• Helgi magri Eyvindarson