Arion banki

Arion banki hf.
Rekstrarform	hlutafélag
Stofnað	2008
Staðsetning	Reykjavík, Ísland
Lykilpersónur	Höskuldur H. Ólafsson, bankastjóri Eva Cederbalk, stjórnarformaður
Starfsemi	Bankastarfsemi
Vefsíða	www.arionbanki.is

Arion banki er íslenskur banki sem veitir þjónustu til einstaklinga, fyrirtækja og fjárfesta. Bankinn var stofnaður undir nafninu Nýi Kaupþing banki árið 2008 en fékk nafnið Arion banki í nóvember 2009. Rætur Arion banka ná þó aftur til ársins 1930 þegar Búnaðarbanki Íslands tók til starfa.

Höskuldur H. Ólafsson hefur verið bankastjóri Arion banka frá árinu 2010.

Stefna

Bankinn starfar á höfuðborgarsvæðinu og í stærstu byggðakjörnum landsins. Helstu þættir starfseminnar fara fram á viðskiptabankasviði, fyrirtækjasviði, fjárfestingarbankasviði og eignastýringarsviði.

• Viðskiptabankasvið veitir einstaklingum og smærri fyrirtækjum landsins alhliða fjármálaþjónustu, m.a. ráðgjöf um innlán, útlán, þjónustuleiðir, sparnað, greiðslukort, lífeyrissparnað, tryggingar, verðbréf og sjóði.
• Fyrirtækjasvið veitir stærri fyrirtækjum landsins alhliða fjármálaþjónustu sem sniðin er að þörfum hvers viðskiptavinar. Sviðið veitir m.a. úrval ávöxtunarleiða, fjármögnun, faktoring, fjárstýringu og innheimtuþjónustu auk netbanka fyrir fyrirtæki.
• Fjárfestingarbankasvið samanstendur af fyrirtækjaráðgjöf, markaðsviðskiptum og greiningardeild. Sviðið veitir víðtæka ráðgjöf og þjónustu í tengslum við fjárhagslega umbreytingu fyrirtækja á innlendum og erlendum vettvangi. Markaðsviðsviðskipti sjá um miðlun verðbréfa, gjaldeyris og afleiða fyrir viðskiptavini bankans á innlendum og erlendum mörkuðum. Greiningardeild fjallar um íslenskt efnahagslíf og spáir í framvindu efnahagsmála, þróun hagstærða og afkomu félaga og atvinnugreina. Regluleg umfjöllunarefni eru t.d. vextir, gengi krónunnar, fasteignamarkaðurinn, verðbólga og annað sem hæst ber hverju sinni.
• Eignastýringarsvið skiptist í einkabankaþjónustu, fjárfestingarþjónustu, rekstur lífeyrissjóða og eignastýringu fagfjárfesta. Sér um að ávaxta fjármuni fyrir viðskiptavini hvort sem um er að ræða lífeyrissparnað, reglulegan sparnað í sjóðum, fjárfestingar í sjóðum eða stýringu á eignasafni. Rekur lífeyrissjóði sem taka bæði á móti viðbótarlífeyrissparnaði og skyldulífeyrissparnaði.

Saga

Búnaðarbanki Íslands (1930–2003)

Búnaðarbanki Íslands tók til starfa 1. júlí 1930 og var þá alfarið eign ríkisins. Árið 1998 var Búnaðarbankinn gerður að hlutafélagi.

Kaupþing (1982–2003)

Kaupþing var fjárfestingarbanki sem átta Íslendingar stofnuðu í febrúar 1982. Árið 1986 seldu stofnfélagarnir 49% hlutabréfa sinna í bankanum til sparisjóðanna. Sama ár var Verðbréfaþing Íslands stofnað og var Kaupþing einn fimm stofnaðila. Árið 1990 eignaðist Búnaðarbankinn 50% hlut og á sama tíma bættu sparisjóðirnir við sig einu prósenti.

Sameinað Kaupþing og Búnaðarbankinn (2003–2008)

Árið 2003 sameinuðust þessir tveir bankar og urðu að Kaupþingi Búnaðarbanka. Árið 2004 tók sameinaður bankinn upp nafnði KB banki en snemma árs 2007 var nafninu enn og aftur breytt í Kaupþing banki.

Bankinn rak 34 útibú á Íslandi auk skrifstofa í Bandaríkjunum, Svíþjóð, Danmörku, Færeyjum, Finnlandi, Noregi, Lúxemborg, Sviss og Bretlandi. Heildareignir bankans í desember 2007 voru 5.347 milljarðar króna og var bankinn með 3.334 starfsmenn.

Lykilmenn í Kaupþingi voru: Hreiðar Már Sigurðsson forstjóri, Sigurður Einarsson stjórnarformaður, Ingólfur Helgason forstjóri Kaupþings á Íslandi, Ólafur Ólafsson einn aðaleiganda Kaupþings, og Magnús Guðmundsson, forstjóri Kaupþings í Lúxemborg.

Í september 2008 seldi Kaupþing Katarskum höfðinga að nafni Al Thani 5% hlut í bankanum. Kaupin fjármagnaði Kaupþing sjálft með eigin pening og skapaði þar með eigin eftirspurn. Þess lags sýndarviðskipti eru ólögleg og upp um þau komst eftir bankahrunið. Málið varð eitt umfangsmesta efnahagsbrotamál sem rekið hafði verið fyrir íslenskum dómstólum og var þekkt sem Al Thani-málið.

Bankinn fer í þrot (haust 2008)

Efnahagskreppa skall á á Íslandi í byrjun 2008 og leiddi það til erfiðrar stöðu fjármálafyrirtækja.

Kaupþing varð fyrsti Evrópski bankinn til að falla á greiðslum skuldabréfa sem bankinn hafði gefið út í Japan. Samningsbrot bankans þýddi ígildi greiðslufalls og var hann því úr sögunni. Neyðarlög voru sett 6. október 2008 sem gáfu íslenska ríkinu víðtækar heimildir til aðgerða á fjármálamörkuðum. Stóru íslensku bankarnir þrír fóru í greiðsluþrot.

Sameining bankans við Sparisjóð Reykjavíkur og nágrennis (SPRON) rann þá út í sandinn, viðræður um sameininguna hófust í apríl 2008. Þegar SPRON fór í gjaldþrot nokkrum mánuðum síðar

Arion banki (2008–)

Nýja Kaupþing var stofnaður utan um innlend viðskipti bankans en skuldir hans skildar eftir.

Í nóvember 2009 skipti bankinn um nafn og hét þá Arion banki. Arion var ódauðlegur hestur í grískri goðafræði.

Íslenska ríkið á 13% í Arion banka.

Tenglar

• Vefsíða Arion banka
• Einkaklúbburinn
• Arion appið

Tilvísanir

  Þessi fyrirtækjagrein sem tengist Íslandi er stubbur. Þú getur hjálpað til með því að bæta við greinina.