Siðmennt

Siðmennt - félag siðrænna húmanista á Íslandi, var stofnað 1990. Félagið er málsvari mannúðarstefnu eða húmanisma, öllu heldur veraldlegs húmanisma og frjálsrar hugsunar, óháð trúarsetningum, og stendur fyrir borgaralegum athöfnum.

Árið 2013 hlaut félagið skráningu sem veraldlegt lífskoðunarfélag en breyting á lögum um skráð trú- og lífskoðunarfélög gerði skráninguna mögulega.

Með skráningu sem veraldlegt lífsskoðunarfélag er Siðmennt skráð hjá Þjóðskrá og er hægt að skrá sig þar sem félagsmann Siðmenntar en við það renna svokölluð sóknargjöld frá ríkinu til félagsins.

Athafnir

Siðmennt hefur skipulagt borgaralega fermingu með tilheyrandi námskeiði frá árinu 1989 og leiðbeinir fólki um fleiri athafnir svo sem borgaralega útför og nafngjöf án skírnar og hefur gefið út bæklinga í því skyni. Það hefur tekið ýmis mál til umræðu, haldið fundi og gengist fyrir blaðaskrifum. Siðmennt hefur unnið að því að kynna fólki hvernig hægt er að standa að borgaralegri útför. Fyrstu starfsárin var saminn bæklingur um það efni og fóru lögfróðir menn gaumgæfilega yfir efni hans. Síðar gaf félagið út bækling um borgaralega nafngjöf til að leiðbeina þeim sem ekki láta skíra börn sín.

Félagið menntar athafnastjóra með sérstöku námskeiði er varðar borgaralegar eða veraldlegar athafnir.

Afstaða, umræða og starfsemi

Félagið hefur gengist fyrir umræðufundum um ýmis mál er tengjast mannúðarstefnu (siðrænum húmanisma) eða borgaralegum athöfnum. Má þar nefna málefni eins og stefnu félagsins, trúarbragðafræðslu í skólum, mannréttindi samkynhneigðra, trúarskoðanir Schuberts, um að taka dauðann í sátt, sorg og sorgarviðbrögð, hugsanlegt trúfélag trúlausra, um erlend félög siðrænna húmanista o.fl.

Siðmennt tekur ekki beina afstöðu í stjórnmálum og félagsmálum. Undantekning er þó ósk félagsins um jafna stöðu allra trúarbragða og lífsskoðana sem m.a. hlýtur að hafa í för með sér aðskilnað ríkis og kirkju á Íslandi.

Frá 2005 hefur Siðmennt árlega veitt húmanistaviðurkenningu og fræðslu- og vísindaviðurkenningu.

Árið 2015 var framkvæmdastjóri ráðinn til að sinna verkefnum félagsins og var skrifstofa opnuð á Hallveigarstöðum í Túngötu, Reykjavík.

Félagið er með tengsl við önnur félög veraldlegra húmanista eins og Human Etisk Forbund í Noregi og British Humanist Association í Bretlandi. Einnig er það meðlimur í alþjóðasamtökumi húmanista International Humanist and Ethics Union (IHEU).

Meðlimir

Þann 3. maí 2013 þegar félagið hlaut skráningu sem veraldlegt lífskoðunarfélag voru meðlimir um 300. Sumarið 2015 var meðlimafjöldi kominn í u.þ.b. 1300.

Tilvísun

Tengt efni

• Vefsíða Siðmenntar
• Borgaraleg ferming
• Stefnuskrá Siðmenntar
• Stefna Siðmenntar í trúfrelsismálum
• Alþjóðasamtök siðrænna húmanista - IHEU
• Baráttan fyrir jöfnum rétt trú- og lífsskoðanafélaga