Borðeyri

Borðeyri stendur við Hrútafjörð og er eitt fámennasta þorp landsins með rúmlega 20 íbúa. Fyrr á öldum var Borðeyri í tölu meiriháttar siglinga- og kauphafna. Nafn eyrarinnar er dregið af því að þegar Ingimundur gamli fór í landaleit, sumarið eftir að hann kom til Íslands, fann hann þar nýrekið viðarborð og nefndi eyrina Borðeyri eftir því. Frá þeim atburðum segir í Vatnsdælasögu.

Á Borðeyri er útibú frá Kaupfélaginu á Hvammstanga og einnig frá Sparisjóði Húnaþings og Stranda. Einnig er þar skóli og bifreiðaverkstæði. Verið að vinna að endurbótum elsta húsi staðarins, Riis-húsi. Er það eitt elsta hús við Húnaflóa. Á staðnum hefur nýlega verið gengið frá tjaldsvæði.