Karin Sander

Karin Sander (f. í 1957 í Bensberg í Nordrhein-Westfalen) er þýskur listamaður. Hún býr og starfar í Berlín og Zürich, Sviss.

Ferill

Karin Sander stundaði myndlistarnám í Frjálsa listaskólanum (Freie Kunstschule) í Stuttgart og í Ríkis-listaakademíunni (Staatlicher Akademie der Bildenden Künste) í sömu borg, meðal annars hjá Jürgen Brodwolf. Veturinn 1989–1990 fékk hún styrk frá Deutscher Akademischer Austauschdienst (DAAD) ‒ stofnun sem styður nemendur og fræðimenn til starfa erlendis ‒ til dvalar í New York við International Study/Studio Program (ISP) í Whitney Museum of American Art. Karin Sander hefur verið gestaprófessor við ýmsa listaskóla, svo sem við Listaháskóla Íslands (1993), við California Institute of the Arts í Los Angeles, (1995), við Akademie der bildenden Künste í Karlsruhe (1995–1996), við Ríkis-listaakademíuna í Stuttgart (1997–1998) og við Elam School of Fine Arts í Auckland (2003). Frá 1999 til 2007 gegndi hún prófessorsstöðu við Weißensee-listaháskólann í Berlín, og frá 2007 til 2023 var hún prófessor í arkitektúr og myndlist við Svissneska tækniháskólann (ETH) í Zürich. Árið 2023 var Karin Sander ásamt lista- og arkitektúrsagnfræðingnum Philip Ursprung fulltrúi Sviss á 18. arkitektúrtvíæringnum í Feneyjum, og sýndu þau verkefnið „Nágrannar“ í svissneska skálanum. Það var svissneska menningarstofnunin Pro Helvetia sem valdi þau til verka. Karin Sander er félagi í Sambandi þýskra myndlistarmanna (Deutscher Künstlerbund). Árið 2007 var hún kjörin til setu í Listaakademíunni (Akademie der Künste, AdK) í Berlín. Hún hefur verið stjórnandi sjónlistardeildar akademíunnar síðan árið 2021. Karin Sander hefur ræktað tengsl við Ísland allt frá fyrstu heimsókn árið 1996. Mörg verka hennar eru innblásin af náttúru landsins, menningu og samfélagi. Hún hefur starfað um árabil með i8 galleríi og sýnt þar verk sín allnokkrum sinnum. Árið 2019 vann hún samkeppni um nýtt útilistaverk í Vogabyggð í Reykjavík.

Verk

Á sýningum sínum fæst Karin Sander við ríkjandi aðstæður og fyrirbrigði og fjallar um þau í stofnanalegu og sögulegu samhengi.

Hún fer gjarnan staðbundnar leiðir að viðfangsefnum sínum, breytir þeim, sýnir efnislegt innihald þeirra og býður til þátttöku. Það sem talið var fyrirfram gefið hugsar hún upp á nýtt, og það verður upphafsskref í rannsóknarferli. Til þessa notar hún ýmiss konar miðla, svo sem arkítektúr, málverkahefð, höggmyndagerð, teikningar, rafræna miðla, kvikmyndir og ljósmyndir. Verk Karin Sander byggja gjarnan á hugmyndum um samspili efnis, tíma og staðar þar sem fjallað er um staðarvitund í landfræðilegum, líkamlegum og huglægum skilningi. Síðan árið 1997 hefur hún nýtt þrívíddarskönnun og -prentun, og stofnað til þátttökuverkefna með safngestum þar sem af þeim eru búnar til litlar myndastyttur. Með því kallar hún fram hugmyndalega sviðsetningu staðarins og endurforritun þeirra kerfa sem fyrir eru.

Meðal þekktra verka Karin Sander má nefna Póstlögð málverk (Mailed Paintings, 2004), Áferðarmálverk (Patina Painting, 1990), Póleruð veggverk (Polished Wallpieces, síðan 1986), Þrívíddarskönn (3D-Bodyscans síðan 1997), Miðja Münser-borgar (Der Schwerpunkt/Mittelpunkt der Stadt Münster, 1997), og Vitni. Hljóðleiðsögn (Zeigen. Eine Audiotour síðan 2005), og að auki má nefna inngrip hennar í almannarými, svo sem verkið Upphafningarlyfta (Transzendenzaufzug, Linz, 2017).

Pálmatré

Tillaga Karin Sander, Pálmatré, bar sigur úr býtum í samkeppni um útilistaverk í Vogabyggð árið 2019. Verkið felst í því að pálmatré er komið fyrir í stóru turnlaga gróðurhúsi og stafar frá því ljós og hlýja óháð veðri utan við.

Verkinu hefur enn ekki verið komið upp á torginu þar sem verkið verður er verið að hanna og byggja göngubrú í tengslum við nýjan grunnskóla. Þegar hefur verið tekin ákvörðun um að hafa eitt tré í gróðurhúsinu en ekki tvö eins og í tillögunni.

Sumarið 2026 heldur Listasafn Reykjavíkur yfirgripsmikla sýningu með Karin Sander, í samstarfi við Listahátíð í Reykjavík.