Jarðskjálftinn í Mjanmar 2025
22°00′04″N 95°55′30″A / 22.001°N 95.925°A
| Jarðskjálftinn í Mjanmar 2025 | |
|---|---|
.png) Húsarústir eftir jarðskjálftann í Mandalay. | |
| Dagsetning | 28. mars 2025, 12:50:54 (UTC+6:30) |
| Tímalengd | 80 sekúndur |
| Stærð | 7,7–7,9 Mw, 7,9 Ms |
| Dýpt | 10 km (6 mi) |
| Áhrifasvæði skjálftans | Mjanmar, Taíland, Suðvestur-Kína, Víetnam |
| Jarðskjálftahröðun | 0,62 g |
| Eftirskjálftar | 394+ mældust |
| Mannsföll | 5.400+ látin, 11.400+ slösuð, 580+ týnd |
Þann 28. mars árið 2025 reið jarðskjálfti yfir Mjanmar að stærðinni 7,7 og olli gríðarlegum skemmdum. Skjálftinn reið yfir klukkan 12:50 að staðartíma og varð 16 kílómetra norðvestur af borginni Sagaing á tíu kílómetra dýpi. Skjálftinn fannst jafnframt í norður- og miðhluta sunnanverðs Taílands og í höfuðborginni Bangkok, og jafnframt í Yunnan-héraði í suðvesturhluta Kína.[1]
Margir eftirskjálftar fylgdu fyrsta skjálftanum og var sá stærsti 6,4 stig. Þann 2. apríl áætlaði Rauði krossinn gróflega að um 60 þúsund heimili á svæðunum sem verst urðu úti hefðu eyðilagst eða skemmst mikið. Að minnsta kosti þrjú sjúkrahús og 22 heilbrigðisstofnanir höfðu skemmst.[2]
Þann 3. apríl höfðu rúmlega 3.000 andlát vegna skjálftans verið staðfest og tæplega 5.000 voru slösuð. Stríðandi fylkingar í yfirstandandi borgarastyrjöld í landinu lýstu yfir tímabundnu vopnahléi í ljósi hamfaranna.[3]
Eftir skjálftann var neyðarástandi lýst yfir í héruðunum Sagaing, Mandalay, Magway, Bago, Austur-Shan og Naypyidaw.[4] Herforingjastjórnin í Mjanmar biðlaði til alþjóðasamfélagsins um neyðarhjálp, sem þótti óvenjulegt af stjórninni að vera. Alþjóðaheilbrigðismálastofnunin virkjaði neyðarstjórn sína í Genf í kjölfar skjálftans.[5]
Tilvísanir
[breyta | breyta frumkóða]- ↑ „Skjálfti upp á 7,7 reið yfir Mjanmar“. mbl.is. 28. mars 2025. Sótt 16. apríl 2025.
- ↑ „Mikil neyð í Mjanmar“. Rauði krossinn. 2. apríl 2025. Sótt 16. apríl 2025.
- ↑ Ástrós Signýjardóttir (3. apríl 2025). „Yfir þrjú þúsund látin eftir jarðskjálftana í Mjanmar“. RÚV. Sótt 16. apríl 2025.
- ↑ Hólmfríður Gísladóttir (28. mars 2025). „43 saknað eftir 7,7 stiga skjálfta í Mjanmar“. Vísir. Sótt 16. apríl 2025.
- ↑ Brynjólfur Þór Guðmundsson (28. mars 2025). „Skýjakljúfur í byggingu varð að rústum einum á örfáum sekúndum“. RÚV. Sótt 16. apríl 2025.