Hrafnhildur Inga Sigurðardóttir

Hrafnhildur Inga Sigurðardóttir (fædd 1946) er íslenskur myndlistamaður sem fæddist að Vestur-Sámsstöðum í Fljótshlíð og ólst þar upp. Mestan hluta ævinnar bjó hún í Reykjavík en býr nú bæði í Garðabæ og á Sámsstaðabakka.^[1]

Myndir Hrafnhildar lýsa skýjafari, veðurfari og sjólagi. Hún notar eingöngu olíumálningu í verk sín.^[2] Heimaslóðir hennar í Fljótshlíðinni veita henni mikinn innblástur en Hrafnhildur er mikið náttúrubarn eins og myndverk hennar sýna og oft málar hún verkin út frá broti minningar frá ferðum hennar um Ísland.^[3] Vatn kemur fram á flestum myndum hennar, til dæmis sem foss, lækur, gjá eða kviksyndi. Oft á myndum hennar læðist lítið ljósbrot í gegnum drungalegt veðurfarið og það má túlka á ýmsa vegu.^[4]

Nám

Hrafnhildur stundaði myndlistarnám við Myndlistarskóla Reykjavíkur 1978 og 1979 og Listaháskóla Íslands 1980 – 1984 og lauk þaðan prófi í grafískri hönnun. Árin 1999 – 2000 bætti hún við sig námi í olíumálun í Myndlistarskóla Kópavogs.^[5]

Ferill

í fimmtán ár rak Hrafnhildur eigin auglýsingastofu en nú starfar hún aðeins sem listamaður. Hún hefur meðal annars haldið tíu einkasýningar, þar á meðal í Hafnarborg árið 2007, Artótekinu 2012 og tekið þátt í samsýningum um nokkurra ára bil eða samtals sjö enn sem komið er, bæði á Íslandi og erlendis.^[6] Meðal samsýninga sem hún hefur tekið þátt í er í Grósku þar sem þemað var bernskan. Verk Hrafnhildar þar hét Þriggja vikna og er af Fimmvörðuhálsgosinu sem náði því að verða þriggja vikna.^[7] Ein af einkasýningum Hrafnhildar hét Hvar áttu heima? og var haldin í Gallerí Fold. Nafnagiftin varð til vegna ófárra ferða hennar milli Fljótshlíða og Garðabæjar en stundum vissi Hrafnhildur hreinlega ekki á hvorum staðnum hún væri. Þema þessarar sýningar var eins og undanfarin ár, íslenskt veðurfar, skýjafar, eldgos og sjólag.^[8]

Árið 2007 var hún valin Listamaður mánaðarins í Gallerí Lind og sýningar á Hótel Rangá árin 2003 og 2007.^[9] Árið 2011 komst Hrafnhildur í 32 manna úrslit í málverkasamkeppni Saatchonline en samkeppnin fólst í því að notendur vefjarins völdu milli tveggja listmálara sem stillt voru upp á móti hvor öðrum. Verk Hrafnhildar í keppninni kallast Skýjatjald.^[10]

Hrafnhildur er meðlimur í SÍM – sambandi íslenskra myndlistarmanna, Grósku, Félagi myndlistarmanna í Garðabæ og Álftanesi, SÁM og sat í stjórn FÍT, félagi íslenskra teiknara.^[11] Árið 2004 dvaldi hún í listamannaíbúð Skandinaviska Foreningen í Róm en hún hefur einnig dvalið í lista- og fræðimannsíbúðinni á Skriðuklaustri nokkrum sinnum.^[12]

Einkasýningar

2012 – Sjólag í Artóteki
2011 – Ágjöf í Einarsstofu Vestmannaeyjum
2011 – Hvarvetna í Ketilhúsinu á Akureyri
2011 – Straumar í Gallerí Fold
2010 – Hvar áttu heima ? – Gallerí Fold
2008 – Landsmót – Gallerí Ormur
2008 - Í forsal vinda – Start Art
2007 – Landsýn – Skriðuklaustur
2007 – Landbrot – Hafnarborg
2005 – Landshorn – Ketilhúsið Akureyri
2004 – Útsuður – Gallerí Ormur
2004 – Utanskerja – Hús málaranna
2003 – Hótel Rangá
2002 – Fyrstu leitir – Gallerí Skúlagata

Tilvísanir

Heimildir

[1] „Hrafnhildur Inga Sigurðardóttir“.

[2] „Hrafnhildur Inga Sigurdardottir“.

[3] „Hrafnhildur Inga Sigurðardóttir“.

[4] „Hrafnhildur Inga Sigurðardóttir“.

[5] „Hrafnhildur Inga Sigurðardóttir“.

[6] „Hrafnhildur Inga Sigurðardóttir“.

[7] „Samsýning með Grósku í Garðabæ“.

[8] „Hvar áttu heima? – Sýning í Gallerí Fold“.

[9] „Um Hrafnhildi Ingu Sigurðardóttir“.

[10] „Hrafnhildur Inga keppir á Saatchi vefnum“.

[11] „Hrafnhildur Inga Sigurðardóttir“.

[12] „Hrafnhildur Inga Sigurðardóttir“.

[1]

[2]

[3]

[4]

[5]

[6]

[7]

[8]

[9]

[10]

[11]

[12]