Hjartatorg
Hjartatorg eða Hjartagarðurinn er torg í miðborg Reykjavíkur, milli Laugavegar og Hverfisgötu að sunnan og norðan en Smiðjustígs og Klapparstígs að austan og vestan. Það var tilbúið árið 2015.[1]
Áður en þar var byggt hellulagt torg var þar graslendi, lítið torg og bekkir þar sem m.a. listafólk kom saman. Það svæði var þó millibilsástand vegna þess lóðin var auð eftir að gamlar byggingar voru rifnar niður. Til stóð að reisa sjö hæða verslunarmiðstöð á öllum reitnum.[2] Hlé varð á framkvæmdum í kjölfar Bankahrunsins 2008 og árið 2009 var svæðið kallað „Hjartagarðurinn“ eftir hjartalaga hellulögn í miðju þess. Svæðið var vinsælt hjá graffítílistafólki og hópur sem nefndist „Miðborgin ykkar“ tók að sér að halda garðinum við og gera þar útivistarsvæði með styrk frá borginni 2010. Vinsældir garðsins höfðu áhrif á að ákveðið var að skipuleggja þar torg í stað stórhýsis. Byggingaframkvæmdir hófust samkvæmt nýju deiliskipulagi árið 2013. Árið 2015 var framkvæmdum lokið og nýtt torg opnað á reitnum sem nefnist Hjartatorg.
Nýtt skipulag Hjartartorgs var gagnrýnt fyrir að vera líflaust miðað við mannlífið sem áður var í Hjartagarðinum. Jólamarkaðir og viðburðir eru haldnir á torginu.[3]
Tilvísanir
[breyta | breyta frumkóða]- ↑ Hótel á Hljómalindarreit Rúv, sótt 23. feb. 2023
- ↑ María Þórólfsdóttir (2013). Mikilvægi þátttöku almennings í mótun borgarrýma (PDF) (BA thesis). Listaháskóli Íslands.
- ↑ Á brattann að sækja en Hjartargarðurinn sé ekki misheppnaður Vísir, skoðað 23 feb. 2023