Heiðrún II
Heiðrún II ÍS 12 var íslenskur 153 tonna vélbátur frá Bolungarvík. Báturinn fórst í hamfaraveðrinu í Ísafjarðardjúpi 4. febrúar 1968 og með honum sex manns. Skipið var smíðað á Akranesi árið 1963 fyrir Pál Ó. Pálsson í Sandgerði og hét áður Páll Pálsson GK 360. Seinna eignaðist Einar Guðfinnsson, útgerðarmaður í Bolungarvík bátinn, og fékk það nafnið Heiðrún II.[1]
Hamfaraveðrið 1968
[breyta | breyta frumkóða]Báturinn var við það að slitna frá höfninni í Bolungarvík og var ákveðið að sigla honum til Ísafjarðar þar sem hafnaraðstæður voru mun betri. Ákveðið var að fá skipstjórann Leif Jónsson til að stýra bátnum í ferðinni en megnið af áhöfninni var veðurteppt í Hnífsdal fyrir utan vélstjórann Rögnvald Sigurjónsson sem var komin um borð með tveimur sonum sínum. Áður en Leifur komst um borð slitnuðu síðustu landfestarnar og var því afráðið að Rögnvaldur, sem var einnig reyndur skipstjóri, myndi stýra honum í ferðinni. Þegar Heiðrún II var úti fyrir Hnífsdal bilaði radarinn og ekki þótti hættandi að reyna að sigla inn Skutulsfjörðinn blint. Var því ákveðið að báturinn myndi leita vars undir Snæfjallaströnd. Á meðan þessu stóð var Rögnvaldur í stöðugu talstöðvarsambandi við Jón Eggert Sigurgeirsson, skipstjóra Heiðrúnar II, sem var um borð í Guðmundi Péturs í Ísafjarðarhöfn.[2]
Um klukkan 23:15 um kvöldið taldi varðskipið Óðinn sig hafa fundið Heiðrúnu II 1,2 sjómílur frá Bjarnanúp og sendi henni gaf henni upp staðarákvörðun áður en varðskipið varð frá að hverfa vegna ísingar.[3] Síðast heyrðist frá bátnum á milli klukkan tólf og eitt um nóttina.[4] Þegar Óðinn kom aftur á svæðið eftir miðnætti fann það engin merki um bátinn. Leit bar ekki árangur og var henni formlega hætt 8. febrúar.[1]
Sama dag fórst breski togarinn Ross Cleveland út af Arnarnesi og togarinn Notts County strandaði við Snæfjallaströnd. 18 af 19 manna áhöfn Ross Cleveland fórust en varðskipið Óðinn bjargaði 18 af 19 manna áhöfn Notts County.[5]
Áhöfn
[breyta | breyta frumkóða]- Rögnvaldur Sigurjónsson - Vélstjóri sem var skipstjóri í ferðinni.
- Ragnar Rögnvaldsson - 18 ára, háseti og sonur Rögnvaldar.
- Sigurjón Rögnvaldsson - 17 ára, háseti og sonur Rögnvaldar.
- Páll Ísleifur Vilhjálmsson - 31 árs, vélstjóri á vélskipinu Guðmundi Péturs.
- Kjartan Halldór Kjartansson, 23 ára, háseti á vélbátnum Einari.
- Sigurður Sigurðsson, 17 ára, háseti.
Sjá einnig
[breyta | breyta frumkóða]Tilvísanir
[breyta | breyta frumkóða]- 1 2 „Heiðrún II. frá Bolungarvík talin af“. Morgunblaðið. 9 febrúar 1968. bls. 1. Sótt 26 apríl 2025 – gegnum Tímarit.is.
- ↑ Halla Ólafsdóttir (18 apríl 2019). „Óveður sem skildi samfélög eftir í sárum“. RÚV. Sótt 26 apríl 2025.
- ↑ „Heiðrúnar saknað - með 6 manna áhöfn“. Morgunblaðið. 6 febrúar 1968. bls. 32, 31. Sótt 26 apríl 2025 – gegnum Tímarit.is.
- ↑ „Báts með 6 manns leitað“. Tíminn. 6 febrúar 1968. bls. 1, 14. Sótt 26 apríl 2025 – gegnum Tímarit.is.
- ↑ Halla Ólafsdóttir (1 ágúst 2019). „Á Ísafirði 51 ári eftir strand Notts County“. RÚV. Sótt 26 apríl 2025.
