Harry Eddom
Harry Eddom (fæddur 1941) er enskur fyrrum sjómaður. Hann var eini maðurinn sem lifði af togaraharmleikinn þrefalda árið 1968 þegar þrír togarar frá Hull fórust á innan við mánuði með þeim afleiðingum að 58 fórust.[1]
Ross Cleveland
[breyta | breyta frumkóða]Eddom var ráðinn sem háseti á Ross Cleveland í desember 1967. Hann hafði farið eina ferð með skipinu áður en það hélt til veiða á Íslandsmiðum í byrjun árs 1968. Í febrúar 1968 leitaði skipið vars við Grænuhlíð í Ísafjarðardjúpi sökum hamfaraveðurs sem þá geysaði. Sökum veðurs hlóðst mikill ís utan á yfirbyggingu skipsins og ratsjá. Áhöfnin reyndi hvað hún gat að berja ísinn af skipinu og skipstjóri Ross Cleveland reyndi að færa það nær Arnarnesi við Skutulsfjörð þar sem veðrið átti að vera skárra. Mikil ísing gerði það þó að verkum að skipinu hvolfdi og sökk rétt fyrir miðnætti þann 5. febrúar.[2]
Á þeim tíma hafði Eddom verið úti við að hreinsa ís af skipinu, íklæddur í vatnsheldan fatnað. Honum skolaði fyrir borð en var bjargað um borð í björgunarbát af Barry Rogers og Walter Hewitt. Björgunarbátinn rak í fleiri klukkutíma áður en hann rak á land utarlega í Seyðisfirði. Á þeim tíma höfðu bæði Rogers og Hewitt dáið úr vosbúð.[2][3] Eddom gekk inn fjörðinn þangað til hann fann sumarhús í botni þess en sökum kraftleysis náði hann ekki að brjótast inn í það.[4] Í staðinn fór hann bak við húsið til að vernda sig fyrir vindinum og stóð þar fram undir morguninn, óttasleginn við að ef hann myndi setjast niður þá myndi hann sofna og deyja. Morguninn eftir uppgötvaði hinn 14 ára gamli bóndasonur, Guðmann Guðmundsson, Eddom og aðstoðaði hann við að komast í skjól.[5][6] Eftir að hafa hvílst á bænum kom báturinn Svanur og flutti Eddom til Ísafjarðar.[7]
Fréttirnar um björgun hans ollu fjölmiðlafári hjá breskum daglöðum sem börðust um að fá einkafrásögn um björgun hans.[8] Dagblaðið The Sun flaug eiginkonu hans, Rita Eddom, og fjölskyldu til Íslands en við komuna á Keflavíkurflugvöll brutust út slagsmál á milli starfsmanna The Sun og annarra breskra blaðamanna. Aftur kom til handalögmála við sjúkrahúsið á Ísafirði þar sem Úlfur Gunnarsson, yfirlæknir, og starfsfólk sjúkrahússins þurftu að slást við blaðamenn sem reyndu að brjóta sér leið í gegnum aðalinnganginn til að ná til Eddom.[9][10]
Seinni ár
[breyta | breyta frumkóða]11 vikum eftir að slysið var Eddom farinn aftur á sjó um borð í Ross Antares.[1] Hann var skipstjóri togarans Benella H 132 í öðru Þorskastríðinu og í desember 1972 skar varðskipið Óðinn burtu veiðarfærin hans en það var sama varðskipið og bjargaði 18 breskum sjómönnum af togaranum Notts County sem strandaði í Ísafjarðardjúpi í sama óveðri og Ross Cleveland sökk.[11][12]
Saga Eddoms birtist í bókinni Útkall í djúpinu eftir Óttar Sveinsson árið 2001.[13]
Tilvísanir
[breyta | breyta frumkóða]- 1 2 Campbell, James (4 febrúar 2018). „The bittersweet story of the sole survivor of Hull's Triple Trawler Tragedy“. Hull Daily Mail. Sótt 26 júlí 2019.
- 1 2 „Eddom: We drifted then my mates died“ (bresk enska). Hull Daily Mail. 15 október 1968. bls. 1, 7. Sótt 26 apríl 2025 – gegnum Newspapers.com.
- ↑ „Maðurinn sem reis upp frá dauðum“ [The man who rose from the dead]. Bæjarins besta. 31 janúar 2008. bls. 16. Sótt 26 júlí 2019.
- ↑ Gibbons, Trevor (4 febrúar 2018). „Triple trawler tragedy: The Hull fishermen who never came home“. BBC. Sótt 26 júlí 2019.
- ↑ Orri Páll Ormarsson (4 febrúar 2018). „Skilið ástarkveðju!“ [Say goodbye!]. Morgunblaðið. Sótt 26 júlí 2019.
- ↑ Högni Torfason (7 febrúar 1968). „Ég vissi að ef ég settist mundi ég deyja“ [I knew that if I sat down, I would die]. Morgunblaðið. bls. 1, 3. Sótt 26 júlí 2019.
- ↑ „30 ár frá mannskaðaveðrinu ægilega á Vestfjörðum“. Bæjarins besta. 2 nóvember 1998. bls. 8–11. Sótt 26 apríl 2025 – gegnum Tímarit.is.
- ↑ „Blaðamenn The Sun læstu frú Eddom inni á salerni!“ [The Sun journalists locked Mrs. Eddom in the toilet!]. Tíminn. 10. desember 1981. bls. 12. Sótt 26 júlí 2019.
- ↑ „Hún sagði eitt orð, — en fjandakornið að ég muni hvað það var“ [She said one word, - but damn if I remember what it was]. Vísir. 8 febrúar 1968. bls. 16. Sótt 26 júlí 2019.
- ↑ „Sjúkrahúslæknirinn varð að sparka og berja frá sér!“ [The hospital doctor had to kick and beat him!]. Tíminn. 9 febrúar 1968. Sótt 26 júlí 2019.
- ↑ „Ég er af hjarta þakklátur“ [I am grateful from the bottom of my heart]. Morgunblaðið. 29. desember 1972. Sótt 26 júlí 2019.
- ↑ „Reynsla sem fylgir manni til grafar“ [Experience that accompanies a person to the grave]. Morgunblaðið. 5 febrúar 1998. bls. 5. Sótt 18 ágúst 2019.
- ↑ „Barátta upp á líf og dauða“ [Struggle for life and death]. Morgunblaðið. 25 nóvember 2001. bls. 24–26. Sótt 26 júlí 2019.
Ytri tenglar
[breyta | breyta frumkóða]- Trawler man retuns home á Youtube.com