Halla Bergþóra Björnsdóttir
| Halla Bergþóra Björnsdóttir | |
|---|---|
| Ríkislögreglustjóri | |
Núverandi | |
| Tók við embætti 20. apríl 2026 | |
| Skipaður af | Þorbjörgu S. Gunnlaugsdóttur |
| Forveri | Sigríður Björk Guðjónsdóttir |
| Persónulegar upplýsingar | |
| Fædd | 16. júlí 1969 Húsavík, Íslandi |
| Maki | Kjartan Jónsson |
| Börn | 2 |
| Háskóli | Háskóli Íslands Stokkhólmsháskóli |
Halla Bergþóra Björnsdóttir (f. 16. júlí 1969) er íslenskur lögfræðingur og lögreglukona sem hefur verið ríkislögreglustjóri frá 15. apríl 2026. Hún var skipuð í embættið af Þorbjörgu S. Gunnlaugsdóttur dómsmálaráðherra eftir afsögn Sigríðar Bjarkar Guðjónsdóttur í nóvember árið áður.[1]
Halla Bergþóra er fædd 16. júlí 1969 á Húsavík og er bóndadóttir. Hún sótti nám í Hafralækjarskóla en lauk grunnskólanámi á Húsavík þegar hún var fimmtán ára. Hún gekk síðan í Menntaskólann við Sund og útskrifaðist þaðan árið 1989. Hún tók síðan árs leyfi frá námi og vann sem blaðamaður hjá Alþýðublaðinu og Pressunni. Halla lauk kandídatsprófi í lögfræði við Háskóla Íslands árið 1995 og síðan meistaraprófi í Evrópurétti við lagadeild Stokkhólmsháskóla árið 1999. Árið áður hafði hún hlotið lögmannsréttindi við héraðsdóm.[2]
Eftir útskrift vann Halla Bergþóra hjá sýslumannsembættum í Reykjavík og Húsavík, sem lögmaður hjá lögmannsstofu í Reykjavík og við ýmsa málaflokka í dómsmálaráðuneytinu frá 2002 til 2009. Hún var sett sýslumaður og lögreglustjóri á Akranesi árið 2009 og síðan lögreglustjóri á Norðurlandi eystra árið 2015.[2]
Halla var skipuð lögreglustjóri á höfuðborgarsvæðinu árið 2020.[3] Hún gegndi því embætti í sex ár, þar til hún var skipuð ríkislögreglustjóri í apríl árið 2026.[1]
Tilvísanir
[breyta | breyta frumkóða]- 1 2 Kolbeinn Tumi Daðason (15. apríl 2026). „Halla Bergþóra nýr ríkislögreglustjóri“. Vísir. Sótt 15. apríl 2026.
- 1 2 „Jákvæðni, bjartsýni og dugnaður skiptir miklu“. Fréttablaðið. 15. júlí 2019. bls. 14.
- ↑ „Nýr lögreglustjóri á höfuðborgarsvæðinu“. island.is. Lögreglan. 11. maí 2020. Sótt 20. júní 2026.
