Glymskratti
Glymskratti eða djúkbox (enska: jukebox) er hljómflutningstæki þar sem hægt er að velja úr mismunandi tónlist. Hefðbundinn glymskratti geymir safn af hljómplötum sem notandinn velur úr með tökkum, eftir að hafa sett mynt í rauf á tækinu. Glymskrattinn flytur síðan plötuna á plötuspilara og spilar hana. Seinni tíma glymskrattar hafa notast við geisladiska.
Glymskrattar þróuðust út frá spiladósum sem tóku við peningum og spiluðu tónlist með gatarenningum úr pappír. Fyrstu rafknúnu glymskrattarnir með hátölurum komu fram um 1930. Glymskrattar náðu vinsældum sem afþreyingartæki á krám á 5. og 6. áratug 20. aldar, en vinsældir þeirra minnkuðu eftir því sem hljómflutningstæki urðu algengari á heimilum og vinnustöðum. Eftir 1970 urðu glymskrattarnir minna áberandi og eftir 1980 fengu þeir „gamaldags“ útlit sem átti að minna á gullöld rokksins.[1]
Um 1960 komu fram glymskrattar (Scopitone) sem spiluðu tónlistarmyndbönd þar sem hægt var að velja milli 30-40 3ja mínútna myndbanda.[2]
Tilvísanir
[breyta | breyta frumkóða]- ↑ Gert J. Almind. „Jukebox History 1952-1998“. juke-box.dk. Sótt 12.5.2025.
- ↑ Bob Orlowsky. „Scopitone Archive“. Scopitonearchive.com. Sótt 12.5.2025.
