Geimskutlan (kvikmynd)
.jpg)
Geimskutlan (enska: Moonraker) er bresk njósnamynd frá 1979 og ellefta James Bond-kvikmyndin sem Eon Productions framleiddu. Þetta var fjórða myndin þar sem Roger Moore lék aðalhlutverkið og sú þriðja og síðasta í leikstjórn Lewis Gilbert. Í myndinni rannsakar Bond hvarf geimskutlu með aðstoð bandaríska CIA-fulltrúans og geimfarans dr. Holly Goodhead (Lois Chiles). Hann kemst þar í kast við Hugo Drax (Michael Lonsdale) sem framleiðir geimskutlurnar, en hyggst í raun eyða fólki af jörðinni með eitri úr hitabeltisjurt og endurbyggja hana með nýrri herraþjóð. Bond eltir slóð Drax til Feneyja og Rio de Janeiro. Þar komast þau dr. Goodhead um borð í geimfar sem flýgur til falinnar geimstöðvar á braut um jörðu. Liðsmenn Drax ná Bond og Goodhead, en Bond tekst að sannfæra handbendi Drax, Jaws (Richard Kiel), um að hann fái ekki aðgang að fyrirmyndarríki Drax. Með aðstoð Jaws og kærustu hans, Dolly (Blanche Ravalec), auk bandarískra geimliða, tekst Bond að sigra Drax og eyðileggja geimstöðina. Hann og Goodhead fljúga svo af stað í einni geimskutlunni til að eyða glerílátum með taugaeitrinu sem Drax hafði sent af stað.
Myndin byggðist á skáldsögu Ian Fleming frá 1954, en hún byggðist aftur á handriti sem hann hafði skrifað áður.[1] Upphaflega stóð til að gera myndina Aðeins fyrir þín augu, en vegna vinsælda Stjörnustríðs og annarra vísindaskáldsögumynda og geimskutluáætlunar NASA var ákveðið að taka Geimskutluna fram yfir.[2] Aðaltökur fóru fram í Frakklandi, Ítalíu, Brasilíu, Gvatemala og Bandaríkjunum. Pinewood Studios voru eingöngu notuð fyrir tæknibrellur. Framleiðslukostnaður var mun meiri en í fyrri myndum, eða 34 milljónir dala. Myndin fékk misjafna dóma, en varð á endanum tekjuhæsta Bondmyndin fram að því, með 210,3 milljón dali í tekjur af kvikmyndahúsum um allan heim.[3] Myndin var jólamynd Tónabíós árið 1982.[4]
Þetta var síðasta myndin þar sem Bernard Lee lék M, yfirmann Bonds, en hann lést í janúar 1981.[5]
Tilvísanir
[breyta | breyta frumkóða]- ↑ Moonraker Special Edition, Region 2 booklet. 2000.
- ↑ Inside Moonraker (DVD). MGM.
- ↑ Block, Alex Ben; Wilson, Lucy Autrey (2010). George Lucas's Blockbusting: A Decade-by-Decade Survey of Timeless Movies Including Untold Secrets of Their Financial and Cultural Success. London: HarperCollins. bls. 428. ISBN 978-0-06-177889-6.
- ↑ „Tónabíó“. Morgunblaðið. 21.12.1982. bls. 74.
- ↑ Elvy, Craig (21. mars 2022). „Why For Your Eyes Only Is The Only Bond Movie Without M“. Screen Rant. Sótt 5 júlí 2022.
