Gamla bíó
Gamla bíó er fyrrverandi kvikmyndahús og núverandi viðburðahús sem stendur við Ingólfsstræti í miðborg Reykjavíkur. Húsið var reist yfir starfsemi „gamla bíós“, Reykjavíkur Biograftheater, af Peter Petersen árið 1927 og tók við af Fjalakettinum. Petersen innréttaði íbúð fyrir sjálfan sig á efri hæð hússins. Fyrsta kvikmyndin sem var sýnd þar var Ben Húr með Ramon Novarro í aðalhlutverki 2. ágúst 1927. Upphaflega tók salurinn 602 í sæti en það minnkaði í 479 þegar húsinu var breytt og sviðið stækkað til að mæta þörfum óperunnar.
Húsið var rekið sem kvikmyndahús til ársins 1980 þegar Íslenska óperan keypti það undir óperusýningar.[1] Fyrsta óperan sem var frumsýnd í húsinu var Sígaunabaróninn eftir Johann Strauss 9. janúar 1982. Húsið hefur oft hýst leiksýningar og tónleika auk óperusýninga.
Árið 2011 flutti Íslenska óperan í Hörpu og fyrirtækið P. Petersen keypti húsið. Miklar endurbætur voru gerðar milli 2012 og 2014. Barinn Petersensvítan var opnaður á efstu hæðinni og tónleikar voru haldnir í tengslum við Iceland Airwaves.[2] Síðan þá hefur húsið verið rekið sem almennt tónleika- og viðburðahús.
Tilvísanir
[breyta | breyta frumkóða]- ↑ „Ljúft að skila Gamla bíói í hendur Íslensku óperunnar“. Morgunblaðið. 3. nóvember 1981. bls. 12.
- ↑ Benedikta Br. Alexandersdóttir (27. nóvember 2014). „Dansspor stigin á gólfi Gamla bíós“. Morgunblaðið. bls. 26.
