Frumudauði

Frumudauði er mikilvægt ferli í ýmsum lífverum, þar með talið manninum, til að endurnýja vefi líkamans, og er einnig mikilvægur í þroskun líkamans. Stýrður frumudauði (lat. apoptosis) er algengastur þeirra ferla. Fruman skreppur saman og erfðaefni hennar er brotið niður. Ensím sem kallast kaspasi sér um að brjóta innihald frumunnar niður. Við stýrðan frumudauða verður ekki niðurbrot á frumuhimnunni sem auðveldar öðrum frumum að taka upp og endurnýta innihald hennar. Annað ferli frumudauða, drep (lat. necrosis), á sér stað þegar frumur verða fyrir hnjaski, frumuhimnan rifnar og innihald frumunnar getur skaðað nærliggjandi frumur.