Frostaveturinn mikli 1880-81
Frostaveturinn mikli 1880-81 var harðindavetur. Milli jóla og nýárs gerði norðanstorma og hríð, frost fór í 30 gráður á Norðurlandi. Önnur norðanhríð kom eftir 9. janúar og urðu Norðurland og Vestfirðir verst úti. Hafís fyllti hverja vík. Frosthörkur og bylir voru líka syðra. Um janúarmánuð var Faxaflói orðinn ísi lagður. Var þá gengið yfir Hvammsfjörð og af Akranesi til Reykjavíkur, og á land úr Flatey á Breiðafirði; stóð svo til 15. febrúar. (Vísir 25. janúar 1918).
Með hafísnum gengu ísbirnir á land og eru heimildir fyrir 63 komum þeirra. [1]
Í lok janúar var ekki farið í fjárhús sem langt voru frá bæjum en þá var frostið komið í ca. 33-37 gráður. Útigangshestar frusu í hel. [2] Á Vestfjörðum brotnuðu 26 bátar í stormi og brotnaði ný timburkirkja á Núpi í Dýrafirði. Póstgufuskipið Fönix fórst við Reykjanes í aftakaveðri en allir komust lífs af.
Í mars var komið gríðarlegt fannfergi Norðanlands að elstu menn mundu ekki annað eins. Frosthörkur héldu út mars en í byrjun apríl tók að hlýna. [3]
Tenglar
[breyta | breyta frumkóða]Tilvísanir
[breyta | breyta frumkóða]- ↑ [https://www.visindavefur.is/svar.php?id=5506 Hvað hafa margir ísbirnir komið til Íslands?] Vísindavefurinn
- ↑ Frá harðindavorinu 1887 Skagfirðingabók, janúar 1967
- ↑ Hafís í blöðunum 1918. IV. Harði veturinn 1880-1881 Vísindavefurinn, sótt 12. apríl 2025