Frederick Douglass

Úr Wikipediu, frjálsa alfræðiritinu
Frederick Douglass
FæddurFebrúar 1818
Cordova, Talbot County, Maryland, Bandaríkjunum
Dáinn20. febrúar 1895
Washington, D.C., Bandaríkjunum
StörfAðgerðasinni, rithöfundur, stjórnmálamaður
MakiAnna Murray (g. 1838; d. 1882) Helen Pitts (g. 1884)
ForeldrarHarriet Bailey[1] og Anthony Aaron[2]
Undirskrift

Frederick Douglass (fæddur undir nafninu Frederick Augustus Washington Bailey; u.þ.b. í febrúar 1818[3] – 20. febrúar 1895[4]) var bandarískur aðgerðasinni, mannréttindafrömuður, ræðumaður, rithöfundur og stjórnmálamaður sem barðist fyrir afnámi þrælahalds í Bandaríkjunum. Douglass fæddist sjálfur í þrældóm í fylkinu Maryland en flúði frá húsbændum sínum árið 1838 og gerðist leiðtogi afnámssinna í Massachusetts og New York, þar sem hann varð þekktur fyrir ræðuhæfni sína[5] og fyrir ritverk sín sem töluðu gegn þrælahaldi. Á ævi sinni bentu andstæðingar þrælahalds á Douglass sem lifandi afsönnun á þeirri skoðun þrælaeigenda að svarta þræla skorti vitsmuni til þess að gerast sjálfstæðir bandarískir ríkisborgarar.[6][7] Íbúar norðurríkjanna trúðu því vart að svo sannfærandi ræðumaður hefði eitt sinn verið þræll.[8]

Douglass samdi nokkrar sjálfsævisögur. Hann lýsti reynslu sinni af því að lifa í þrældómi í sjálfsævisögunni Narrative of the Life of Frederick Douglass, an American Slave, sem kom út árið 1845, varð metsölubók og jók verulega stuðning við afnám þrælahalds. Næsta bók hans, My Bondage and My Freedom, kom út 1855 og vakti einnig mikla athygli. Eftir Þrælastríðið hélt Douglass áfram að tala gegn þrælahaldi og samdi síðustu sjálfsævisögu sína, Life and Times of Frederick Douglass. Bókin kom út árið 1881 og aftur með viðaukum árið 1892, þremur árum fyrir dauða Douglass, og fjallaði um atburði í og eftir Þrælastríðið. Douglass studdi einnig kosningarétt kvenna og gengdi nokkrum opinberum embættum. Douglass var fyrsti bandaríski blökkumaðurinn sem var varaforsetaefni í bandarískum kosningum árið 1871 þegar Victoria Woodhull útnefndi hann varaforseta sinn í forsetaframboði sínu fyrir Jafnréttisflokkinn árið 1872.[9]

Douglass studdi jafnrétti allra samfélagshópa, bæði fyrir svarta, konur, frumbyggja og innflytjendur. Hann var einnig stuðningsmaður frjálslyndra gilda stjórnarskrár Bandaríkjanna og studdi samtal og bandalög milli ólíkra kynþátta og hugsjónahópa. Þegar róttækir afnámssinnar gagnrýndu Douglass fyrir að vilja hefja samtal við þrælaeigendur svaraði hann: „Ég myndi sameinast hverjum sem er til þess að gera það sem er rétt en engum til að gera það sem er rangt.“[10]

Tilvísanir[breyta | breyta frumkóða]

  1. „How Slavery Affected African American Families, Freedom's Story, TeacherServe®, National Humanities Center“. National Humanities Center. Sótt 31. október 2012.
  2. „Biography – Early Life“. Frederick Douglass Heritage. Sótt 22. desember 2016.
  3. „Frederick Douglass Biography“. Sótt 4. september 2012.
  4. „Later Years and Death | Frederick Douglass Heritage“. www.frederick-douglass-heritage.org (bandarísk enska). Sótt 21. september 2017.
  5. Willard B. Gatewood Jr. (janúar 1981). „Frederick Douglass and the Building of a 'Wall of Anti-Slavery Fire', 1845–1846. An Essay Review“. The Florida Historical Quarterly. 59 (3): 340–44. JSTOR 30147499.
  6. Stewart, Roderick M. (10. janúar 1999). „The Claims of Frederick Douglass Philosophically Considered“. Í Bill E. Lawson; Frank M. Kirkland (ritstjórar). Frederick Douglass: A Critical Reader. Wiley-Blackwell. bls. 155–56. Sótt 18. mars 2011.
  7. Social Studies School Service (2005). Big Ideas in U.S. History. Social Studies. bls. 27. Sótt 18. mars 2011.
  8. Matlack, J.. (1979). The Autobiographies of Frederick Douglass. Phylon (1960–), 40(1), 16. doi:10.2307/274419
  9. Trotman, C. James (2011). Frederick Douglass: A Biography. Penguin Books. pp. 118–119.
  10. Frederick Douglass (1855). The Anti-Slavery Movement, A Lecture by Frederick Douglass before the Rochester Ladies' Anti-Slavery Society. bls. 33. Sótt 6. október 2010.