François Bayrou
| François Bayrou | |
|---|---|
.jpg) Bayrou árið 2025. | |
| Forsætisráðherra Frakklands | |
| Í embætti 13. desember 2024 – 9. september 2025 | |
| Forseti | Emmanuel Macron |
| Forveri | Michel Barnier |
| Eftirmaður | Sébastien Lecornu |
| Persónulegar upplýsingar | |
| Fæddur | 25. maí 1951 Bordères, Frakklandi |
| Þjóðerni | Franskur |
| Stjórnmálaflokkur | Lýðræðishreyfingin (frá 2007) |
| Maki | Élisabeth Perlant (g. 1971) |
| Börn | 6 |
| Háskóli | Université Bordeaux Montaigne |
| Undirskrift |  |
François René Jean Lucien Bayrou (f. 25. maí 1951) er franskur stjórnmálamaður og fyrrverandi forsætisráðherra Frakklands. Hann var skipaður í embætti af Emmanuel Macron forseta þann 13. desember 2024 eftir afsögn Michels Barnier.
Bayrou er formaður frönsku Lýðræðishreyfingarinnar og hefur verið virkur í frönskum stjórnmálum í marga áratugi. Foreldrar hans voru bændur í Bearn í suðvesturhluta Frakklands og hann sótti ekki menntun í hina hefðbundnu háskóla frönsku valdastéttarinnar. Bayrou var bókmenntakennari áður en hann hóf feril í stjórnmálum. Hann var kjörinn á franska þingið árið 1986 og var menntamálaráðherra Frakklands frá 1993 til 1997.[1]
Bayrou hefur þrisvar sinnum gefið kost á sér í forsetakosningum Frakklands, árin 2002, 2007 og 2012. Hann hlaut 18 prósent atkvæða í forsetakosningunum 2007. Hann ákvað að bjóða sig ekki fram að nýju í forsetakosningunum 2017 og lýsti yfir stuðningi við Emmanuel Macron, sem vann kosningarnar.[2]
Bayrou var skipaður dómsmálaráðherra í ríkisstjórn Macrons árið 2017 en sagði af sér einum mánuði síðar vegna rannsóknar á flokknum hans.[3] Frá árinu 2020 var Bayrou borgarstjóri borgarinnar Pau.[4]
Eftir að Michel Barnier forsætisráðherra féll fyrir vantrauststillögu á þingi í desember 2024 bauð Macron forseti Bayrou að mynda nýja ríkisstjórn. Bayrou tók við embætti forsætisráðherra þann 13. desember.[5] Hann kynnti nýja ríkisstjórn sína á aðfangadag 2024.[6]
Þar sem Bayrou hafði ekki meirihlutastuðning á franska þinginu greip hann til stjórnarskrárákvæðis til að þvinga fram samþykkt fjárlaga án stuðnings þingsins. Barnier hafði áður gripið til sama úrræðis áður en vantrauststillaga var samþykkt gegn honum.[7] Í kjölfarið lögðu þingmenn Óbugaðs Frakklands fram vantrauststillögu gegn Bayrou en hún var felld með miklum meirihluta.[8]
Í september 2025 boðaði Bayrou til atkvæðagreiðslu á þingi um traustsyfirlýsingu á stjórn sína. Hann vildi leysa úr pattstöðu sem komin var upp á þingi vegna fjárlagafrumvarp hans, sem gerði ráð fyrir nærri því 44 milljarða evra niðurskurði í ríkisútgjöldum. Niðurstaðan varð hins vegar sú að 364 þingmenn kusu að lýsa yfir vantrausti á stjórn Bayrou en aðeins 194 lýstu yfir trausti á hana.[9]
Tilvísanir
[breyta | breyta frumkóða]- ↑ Ásgeir Sverrisson (1. mars 2007). „„Þriðji maðurinn" í sókn í Frakklandi“. Morgunblaðið. bls. 16.
- ↑ Kristján Róbert Kristjánsson (22. febrúar 2017). „Bayrou lýsti yfir stuðningi við Macron“. RÚV. Sótt 14. desember 2024.
- ↑ „Bayrou er nýr forsætisráðherra Frakklands“. mbl.is. 13. desember 2024. Sótt 14. desember 2024.
- ↑ „François Bayrou nýr forsætisráðherra Fraklands“. Viðskiptablaðið. 13. desember 2024. Sótt 14. desember 2024.
- ↑ Samúel Karl Ólason (13. desember 2024). „Macron kynnir nýjan forsætisráðherra“. Vísir. Sótt 14. desember 2024.
- ↑ Hallgrímur Indriðason (24. desember 2024). „Ný frönsk ríkisstjórn í fjórða sinn á þessu ári“. RÚV. Sótt 24. desember 2024.
- ↑ Björn Malmquist (4. febrúar 2025). „Stendur líklega af sér tillögu um vantraust“. RÚV. Sótt 24. desember 2024.
- ↑ Björn Malmquist (5. febrúar 2025). „Stjórn Bayrous stendur af sér tillögu um vantraust“. RÚV. Sótt 24. desember 2024.
- ↑ Samúel Karl Ólason (8. september 2025). „Þurfa að finna fimmta forsætisráðherrann á tveimur árum“. Vísir. Sótt 8. september 2025.
| Fyrirrennari: Michel Barnier |
|
Eftirmaður: Sébastien Lecornu | |||
Þetta æviágrip sem tengist stjórnmálum og Frakklandi er stubbur. Þú getur hjálpað til með því að bæta við greinina.