Aðeins fyrir þín augu
.jpg)
Aðeins fyrir þín augu (enska: For Your Eyes Only) er bresk njósnamynd frá 1981 og tólfta myndin sem Eon Productions gerðu um leyniþjónustumanninn James Bond. Þetta var fimmta myndin þar sem Roger Moore fór með aðalhlutverkið og sú fyrsta sem John Glen leikstýrði, en hann hafði áður starfað sem klippari og undirleikstjóri í fyrri myndum. Handritið var skrifað af Richard Maibaum og Michael G. Wilson. Það byggðist að mestu á tveimur smásögum eftir Ian Fleming, „For your eyes only“ og „Risico“,[1] en sumir þættir sögunnar voru fengnir úr skáldsögunum Live And Let Die, Goldfinger og On Her Majesty's Secret Service.[2]
Myndin hefst á því að breskt njósnaskip sekkur í Jónahafi eftir að hafa rekist á tundurdufl. Um borð er ATAC-kerfi sem notað er í samskipti Polaris-kjarnorkukafbáta. Breski neðansjávarfornleifafræðingurinn Timothy Havelock (Jack Hedley) er beðinn um að finna flakið, en hann og eiginkona hans eru myrt með skothríð úr þyrlu. Dóttir þeirra, Melina (Carole Bouquet), hyggur á hefndir. Bond og Melina elta slóðina til Cortina d'Ampezzo á Ítalíu þar sem Bond lendir í átökum við leigumorðingjann Emile Leopold Locque (Michael Gothard) og handbendi hans, austurþýska skíðaskotfimimeistarann Eric Kriegler (John Wyman). Bond hittir gríska athafnamanninn Aris Kristatos (Julian Glover) sem reynist sekur um morðin á Havelock-hjónunum. Bond og Melina sækja kerfið úr flaki njósnaskipsins, en Kristatos nær þeim og reynir að drepa þau með því að draga þau yfir kóralrif. Þau sleppa naumlega og elta Kristatos til munkaklausturs efst á snarbröttum kletti. Þar nær Bond ATAC-kerfinu, rétt áður en Kristatos tekst að selja það í hendur sovéska hershöfðingjans Gogols (Walter Gotell).
Eftir vísindaskáldskapinn í Geimskutlunni vildu framleiðendur myndarinnar snúa aftur til eldri kvikmynda og skáldsagna Flemings. Myndin er því aðeins raunsærri og byggist minna á tæknibúnaði.[3] Grunnstefið er hefnd og afleiðingar hennar. Aðaltökur fóru fram milli október 1980 og janúar 1981 í Grikklandi (Korfú, Meteora og Akilleion), Ítalíu (Cortina d'Ampezzo), og Bretlandi (Pinewood Studios), en neðansjávaratriðin voru tekin á Bahamaeyjum. Titillagið var flutt af Sheena Easton. Myndin fékk nokkuð jákvæða dóma, og álit á henni hefur vaxið síðan.[4] Hún gekk vel í kvikmyndahúsum, með 195,3 milljón dala tekjur á heimsvísu.[5] Þetta var síðasta myndin sem United Artists dreifðu ein, þar sem Metro-Goldwyn-Mayer eignaðist fyrirtækið skömmu eftir útkomu hennar. Myndin var frumsýnd í Tónabíói í mars 1982, sem var óvenju snemma eftir heimsfrumsýninguna í júní 1981, miðað við fyrri Bondmyndir og raunar á undan fyrri myndinni í röðinni, Geimskutlunni, sem var jólamynd sama ár.[6]
Tilvísanir
[breyta | breyta frumkóða]- ↑ Smith, Jim (2002). Bond Films. London: Virgin Books. ISBN 978-0-7535-0709-4.
- ↑ Benson, Raymond (1988). The James Bond Bedside Companion. London: Boxtree Ltd. ISBN 1-85283-234-7.
- ↑ Hibbin, Sally (1989). The making of Licence to kill. Salem House. bls. 14. ISBN 978-0-88162-453-3.
- ↑ „For Your Eyes Only“. Rotten Tomatoes. Afrit af uppruna á 28 ágúst 2011. Sótt 19. mars 2023.
- ↑ Barnes, Alan; Hearn, Marcus (2001). Kiss Kiss Bang! Bang!: the Unofficial James Bond Film Companion. Batsford Books. ISBN 978-0-7134-8182-2.
- ↑ „Nú er James Bond dagur í Hollywood“. Morgunblaðið. 4. mars 1982. bls. 41.
