Feigðardraumar

Feigðardraumar (danska: Balladen om Balder) er þrettán bókin í bókaflokknum um Goðheima. Hún kom út árið 2006. Teiknari hennar var listamaðurinn Peter Madsen, en auk hans kom Henning Kure að gerð handritsins. Hún byggir á frásögnum úr Gylfaginningu úr Snorra-Eddu, Draumum Baldurs úr Eddukvæðum og Gesta Danorum eftir Saxa málspaka.

Söguþráður

Loki hefur slæmar draumfarir. Dóttir hans, Hel drottnari undirheimanna, unir hag sínum illa í deyfðarlegu ríki hinna dauðu og krefst þess að Loki bjargi henni þaðan.

Næsti draumur Loka reynist enn skuggalegri. Þar eru Æsir ævareiðir og saka hann um að hafa drepið Baldur. Loki reynir að flýja en er handsamaður og pyntaður allt til loka heimsins. Þegar Loki vaknar á ný er hann þungt hugsi og óttast að draumurinn sé einhvers konar fyrirboði og verður hugsjúkur af áhyggjum yfir að Baldur muni deyja og sér verði kennt um. Skringileg hegðun hans vekur athygli Friggjar, móður Baldurs.

Meðan á þessu stendur myndast brestir í sambandi bræðranna Baldurs og Haðar. Þar sem Höður er blindur ofverndar Baldur hann en sýnir honum í leið virðingarleysi. Þegar Höður verður ástfanginn af valkyrjunni Nönnu, en Baldur sér hana nakta baða sig í skóginum og fer að daðra við hana, fyllist Höður af heift í garð bróður síns og hyggst leita hefnda.

Þegar bræðurnir hittast aftur í Valhöll missir Höður stjórn á skapi sínu og heggur til Baldurs með sverði, sem nær þó ekki að bíta á hann. Frigg upplýsir að hún hafi vegna draums Loka ákveðið að fá allt á Jörðinni til að sverja að gera Baldri ekki mein hann sé því ósæranlegur. Æsirnir gleðjast við þessar fréttir og fara að gera sér að leik að kasta hvers kyns háskalegum vopnum í Baldur en þau hrökkva öll af honum.

Loki er gramur út í Höður fyrir að hafa nærri komið sér í vandræði. Til að hefna sín platar hann Höður til að drekka ólyfjan með loforði um að blandan gefi honum ofurkrafta. Ekki vill þó betur til en svo að Höður er staðráðinn í að freista þess að skaða bróður sinn. Loka líst illa á þetta en til að minnka líkurnar á slysi sannfærir hann Höð um að nota mistiltein sem skotvopn. Það snýst rækilega í höndunum á honum, því mistilteinninn var eina fyrirbærið sem Frigg gleymdi að taka eið af. Höður skýtur plöntunni í hjarta Baldurs, sem deyr í kjölfarið.

Loki býr sig undir hefndaraðgerðir Ásanna. Þeir freista þess þó fyrst að fá Baldur aftur úr dauðraríki Heljar, en til þess þurfa allar lífverur að gráta dauða hans. Sú ráðagerð mistekst, þegar Loka tekst ekki að kreista fram tár. Niðurstaðan verður þó óvænt. Þegar til dauðraríkisins er komið verða Baldur og Hel ástfangin. Þegar ástin kemur til sögunnar lýsist allt upp og ríki Heljar hættir að vera staður eymdar og depurðar. Jafnframt sættast þeir Baldur og Höður og sá síðarnefndi þorir loks að játa valkyrjunni Nönnu ást sína.

Fróðleiksmolar

Feiðgardraumar voru fyrsta nýja Goðheimasagan eftir fimm ára hlé, það lengsta í sögu sagnaflokksins. Ástæðan var sú að Peter Madsen var upptekinn við önnur verkefni m.a. byggð á verkum H.C. Andersen.

Frásögn Snorra-Eddu af dauða Baldurs að undirlagi Loka er myrkari en svo að hún falli auðveldlega að anda myndasöguflokksins. Þess vegna grípa höfundarnir til þess ráðs að rekja þá sögu sem martröð Loka. Í martröðinni er Loki skyndilega orðinn fjölskyldufaðir en Sigyn kona hans hefur ekki komið við sögu í öðrum Goðheimabókum.

Höfundarnir taka sér mikið skáldaleyfi með því að breyta sögunni um dauða Baldurs yfir í ástarsögu og ástarsamband Baldurs og Heljar á sér enga stoð í goðsögunum. Þá er Höður látinn verða ástfanginn af valkyrjunni Nönnu, en gyðjan Nanna Nepsdóttir var kona Baldurs. Í Gesta Danorum eru þó Baldur og Höður sagðir hafa barist um ástir Nönnu.

Íslensk útgáfa

Feiðgðardraumar komu út hjá Forlaginu árið 2023, í íslenskri þýðingu Bjarna Fr. Karlssonar.

Heimildir

Valhalla - Den samlede saga 5. Carlsen. 2010. ISBN 978-87-114-2040-9.