Faith No More

Faith No More. 2009.

Faith No More var bandarísk rokkhljómsveit sem stofnuð var í San Francisco, Kaliforníu árið 1979. Hljómsveitin kom fram sem Sharp Young Men og Faith No Man áður en hún breytti nafninu í Faith No More. Í byrjun voru ýmsir söngvarar með sveitinni, þar á meðal Courtney Love. En sveitin gaf út sínar fyrstu tvær plötur með söngvaranum Chuck Mosley. Billy Gould, bassaleikari, Roddy Bottum ryþmagítar- og hljómborðsleikari og Mike Bordin, trommari, eru stofnmeðlimir bandsins.

Eftir margar breytingar á liðsskipan sló sveitin loks í gegn með plötunum The Real Thing (1989) og Angel Dust (1992) og spilaði þar söngvarinn Mike Patton stórt hlutverk. Hljómsveitin lagði upp laupana árið 1998 en kom svo aftur saman árið 2009, gaf út nýja plötu, og starfaði þar til 2020/2021 þegar covid-19 og veikindi Pattons hindruðu tónleikaferðalög. Hann hélt svo áfram að túra með öðrum hljómsveitum sínum (Mr. Bungle) og aðrir meðlimir FNM lýstu yfir að Patton vildi ekki fara í tónleikaferðalag með þeim.

Tónlist sveitarinnar er býsna fjölbreytt og hefur meðal annars verið lýst sem jaðarþungarokki, tilraunarokki og funkmetal. Sveitin hefur haft áhrif á rapprokk og nu-metal. Hljómsveitin hefur gert tilraunir með ýmsar tónlistarstefnur: Þrass, hip hop, progrokk, harðkjarnapönk, polka, easy listening, djass, samba, ska, bossa nova, harðrokk, popp, soul og gospel.

Síðustu meðlimir

• Mike Bordin – trommur og bakraddir (1979–1998; 2009–2021)
• Billy Gould – bassi, bakraddir (1979–1998; 2009–2021)
• Roddy Bottum – hljómborð, ryþmagítar og bakraddir (1983–1998; 2009–2021)
• Mike Patton – söngur (1988–1998; 2009–2021)
• Jon Hudson – gítar og bakraddir (1996–1998; 2009–2021)

Fyrrum kjarnameðlimir

• Chuck Mosley – söngur (1984–1988), dó 2017
• Jim Martin – gítar, bakraddir (1984–1993)
• Trey Spruance – gítar (1993–1995)
• Dean Menta – gítar (1995–1996)

Breiðskífur

• We Care a Lot (1985)
• Introduce Yourself (1987)
• The Real Thing (1989)
• Angel Dust (1992)
• King for a Day... Fool for a Lifetime (1995)
• Album of the Year (1997)
• Sol Invictus (2015)