Eggert Þór Bernharðsson

Eggert Þór Bernharðsson (2. júní 1958 – 31. desember 2014) var íslenskur sagnfræðingur og rithöfundur þekktur fyrir rannsóknir sínar á nútímasögu Reykjavíkur og sögusýningum á íslenskum söfnum. Hann kenndi sagnfræði við Háskóla Íslands og varð síðan fyrsti prófessorinn í hagnýtri menningarmiðlun, grein sem hann hafði mótað sem hluta af kennslu í aðferðafræði sagnfræðinnar. Eggert skrifaði margar greinar og bækur, þar á meðal umfangsmikil rit um þróun höfuðborgarinnar sem öll hlutu tilnefningu til Íslensku bókmenntaverðlaunanna: Saga Reykjavíkur 1940-1990 (1998), Undir bárujárnsboga. Braggalíf í Reykjavík 1940-1970 (2000) og Sveitin í sálinni. Búskapur í Reykjavík og myndun borgar (2014).

Árið 1981 kvæntist Eggert skáld- og fræðikonunni Þórunni Valdimarsdóttur. Synir þeirra eru Gunnar Theodór Eggertsson rithöfundur og Valdimar Ágúst Eggertsson tölvunarfræðingur.