Efnismenning
Efnismenning á við um efnislega þætti menningar sem birtist í hlutum og mannvirkjum sem umkringja fólk. Efnismenning nær yfir notkun, neyslu, sköpun, og viðskipti með hluti, og líka atferli, viðmið, og siði sem skapast í kringum eða með efnislega hluti. Hugtakið er notað í fornleifafræði, mannfræði og þjóðfræði, með áherslu á efnislegar minjar sem má rekja til menningar fortíðar eða samtímans.
Rannsóknir á efnismenningu eru þverfaglegar rannsóknir á tengslum fólks og hluta: gerð þeirra, sögu, varðveislu, og túlkun. Slíkar rannsóknir sækja kenningar og aðferðir til bæði félags- og hugvísinda; svo sem til listasögu, fornleifafræði, mannfræði, sagnfræði, þjóðfræði, bókmenntafræði og safnafræði, meðal annars. Alls kyns hlutir geta fallið undir efnismenningu, allt frá byggingum og öðrum mannvirkjum að bókum eða skartgripum.