Demantar svíkja aldrei
Demantar svíkja aldrei (enska: Diamonds are Forever) er bresk njósnamynd frá 1971 og sjöunda kvikmyndin sem Eon Productions gerðu um leyniþjónustumanninn James Bond. Sean Connery sneri aftur í hlutverki njósnarans, eftir að hafa áður hafnað því að halda áfram að leika Bond.
Kvikmyndin byggist á samnefndri skáldsögu Ian Fleming frá 1956 og var önnur Bondmyndin sem Guy Hamilton leikstýrði. Myndin hefst á atriði þar sem Bond tekst á við glæpaforingjann Blofeld (Charles Gray), sem hyggst nota lýtalækningar til að búa til tvífara sína. Bond telur sig hafa drepið Blofeld, sem reynist rangt. Sagan heldur svo áfram í Suður-Afríku þar sem vel skipulagður smyglhringur smyglar demöntum til Amsterdam, með aðstoð glæpamannanna hr. Wint (Bruce Glover) og hr. Kidd (Putter Smith), sem gefið er í skyn að séu samkynheigt par, og tengiliðarins Tiffany Case (Jill St. John). Bond og Tiffany fylgja slóð demantanna til Las Vegas, þar sem dularfulli auðkýfingurinn Willard Whyte (Jimmy Dean), er að undirbúa að skjóta gervitungli út í geim. Í ljós kemur að Blofeld hefur tekið Whyte höndum og kemur fram í hans stað með aðstoð raddbreytis. Demantarnir eru til að breyta gervitunglinu í öfluga geislabyssu sem getur valdið skaða á jörðu niðri. Blofeld flýr á olíuborpall undan strönd Baja California-skaga þar sem Bond, Tiffany og Felix Leiter (Norman Burton) sigra hann og eyðileggja stjórnstöð gervitunglsins.
Eftir að George Lazenby hafði hafnað því að leika Bond aftur, hófu Albert R. Broccoli og Harry Saltzman leit að nýjum leikara. United Artists vildu hins vegar fá Connery aftur og buðu honum metfé, 1,25 milljón dala, fyrir.[1] Bondmyndin Goldfinger var fyrirmyndin, með titillag sungið af Shirley Bassey. Tökur fóru fram í Las Vegas, Amsterdam, og London. Demantar svíkja aldrei fékk góða dóma og gekk vel í kvikmyndahúsum.[2] Hún var tilnefnd til Óskarsverðlauna fyrir besta hljóð.[3] Myndin var frumsýnd í Tónabíói á Íslandi í maí 1974.[4]
Tilvísanir
[breyta | breyta frumkóða]- ↑ Feeney Callan, Michael (2002). Sean Connery. Virgin Books. bls. 217. ISBN 1-85227-992-3.
- ↑ „Diamonds Are Forever (1971) – Financial Information“. The Numbers. Afrit af uppruna á 6 apríl 2015. Sótt 24. desember 2007.
- ↑ „The 44th Academy Awards (1972) Nominees and Winners“. Academy of Motion Picture Arts and Sciences. Afrit af uppruna á 2 apríl 2015. Sótt 27 ágúst 2011.
- ↑ „Tónabíó“. Þjóðviljinn. 28.5.1974. bls. 12.
