Christian Marclay
Christian Marclay (f. 11. janúar 1955) er bandarísk-svissneskur myndlistarmaður og tónlistarmaður sem er einkum þekktur fyrir klippiverk úr hljóði og framsetningu hljóðs í mynd. Hann á bandaríska móður og svissneskan föður, fæddist í Kaliforníu en ólst upp í Genf í Sviss. Hann hefur starfað lengst af á Manhattan í New York-borg og í London.[1] Á 8. áratugnum hóf hann að gera tilraunir með snúningsskífur til að mynda hljóð, á sama tíma og sú aðferð þróaðist hjá hip hop-tónlistarfólki.[2] Hann lærði við myndlistarskóla í bæði Genf og Boston, og hefur nefnt flúxushreyfinguna sem innblástur.[3]
Meðal þekktustu verka Marclays er „Plata án umslags“ frá 1985, hljómplata með klippiverki úr hljóðum sem átti að selja án umslags svo rispur og ryk myndu safnast á hana og verða hluti af verkinu. Annað verk, „The Sound of Silence“, er einfaldlega svarthvít ljósmynd af samnefndri smáskífu Simon og Garfunkel. Árið 2010 vakti hann athygli fyrir „Klukkuna“, 24 tíma vídeóverk þar sem stutt skot úr kvikmyndum þar sem tími kemur fyrir í mynd eða hljóðrás, eru klippt saman þannig að tíminn í myndinni samsvarar rauntíma. Verkið var frumsýnt í White Cube-galleríinu í London.[4][5] Það vann Gullna ljónið á Feneyjatvíæringnum árið 2011.[6]
Tilvísanir
[breyta | breyta frumkóða]- ↑ Blake Gopnik, "The 10 Most Important Artists of Today" Geymt 3 júní 2015 í Wayback Machine, Newsweek, 5 June 2011. Retrieved 25 June 2011.
- ↑ European Graduate School Biography Geymt 27 maí 2010 í Wayback Machine. Retrieved 25 June 2011.
- ↑ Christian Marclay. „Christian Marclay | Biography, Albums, Streaming Links“. AllMusic. Sótt 6. mars 2020.
- ↑ „'It's impossible!' – Christian Marclay and the 24-hour clock made of movie clips | Art and design“. The Guardian. Sótt 6. mars 2020.
- ↑ Ticked Off: Against "The Clock" on Notebook|MUBI
- ↑ Goldstein, Andrew M.; Halperin, Julia (6 júní 2011). „ARTINFO's Rundown of the Winners of the Golden and Silver Lions at the 54th Venice Biennale“. Artinfo. Afrit af upprunalegu geymt þann 3 febrúar 2019. Sótt 30 maí 2015.
