Bernard Bernard

Bernard Bernard, teikning gerð 1889

Bernard Bernard, fæddur 21. júlí 1821 í Mogues og lést 28. október 1895 í Noirétable í Mið-Frakklandi, var franskur kaþólskur prestur og trúboði. Bernard starfaði sem trúboði í Noregi, á Íslandi og í Skotlandi.

Líf og störf

Bernard hlaut menntun sem prestur í Charleville og Reims, og síðar í Róm. Hann var vígður sem prestur 1846 og starfaði fyrst sem sóknarprestur í Ardennes.

Trúboð í Noregi, Íslandi og Skotlandi

Bernand kom til Noregs árið 1856 til að þjóna í Norðurpólstrúboðinu (Praefectura Apostolica Poli Arctici).

Bernard starfaði fyrsta árið í Alta í Norður-Noregi, en árið eftir var hann sendur til Íslands dem trúboði og prestur. Með Bernard kom Ólafur Gunnlaugsson sem dvaldi með honum í nokkra mánuði til að kenna honum íslensku og kynna hann fyrir landsmönnum. Ísland var þá hluti af Norðurpólstrúboðinu. Jean-Baptiste Baudoin kom síðan ári seinna og voru þeir fyrstu kaþólsku prestarnir sem þjónuðu á Íslandi eftir siðaskiptin um miðja 16. öld. Þeir voru nefndir séra Baldvin og séra Bernharður á Íslandi. Þegar þeir komu var ekki trúfrelsi á Íslandi og skilda að vera í evangelísk lúthersku þjóðkirkjunni en þeir séra Baldvin og séra Bernharður fengu undanþágu til að þjóna frönskum sjómönnum sem voru að veiðum við Ísland. Bernard dvaldi á Seyðisfirði fyrsta árið en flutti síðar til Grundarfjarðar og að lokum til Reykjavíkur 1859 og keypti þar jörðina Landakot, sem hafði verið hjáleiga Reykjavíkurbýlisins, og breyttu litlu húsi þar í kapellu. En þar var kaþólska dómkirkjan síðar byggð.

Árið 1860 var Bernard sendur til Wick í Skotlandi, sem einnig var hluti af Norðurpólstrúboðssvæðinu til að byggja upp trúboð á Skotlandi, Orkneyjum og Hjaltlandi. Hann dvaldi þar til 1862.

Árið 1862 varð Bernard forstöðumaður fyrir Norðurpólstrúboðið og var það þar til það var lagt niður 1869. Þann 5. apríl 1869 var sérstakt Praefectura Apostolica (Postullegt umdæmi) stofnað fyrir Noreg og Lappland og var Bernard skipaður Vicariatus apostolicus (Postullegur fulltrúi) með aðsetur í Þrándheimi. Bernard sagði af sér af heilsufarsástæðum árið 1887 og yfirgaf Noreg.

Hann lést 28. nóvember 1895.

Heimildir

• St. Ansgar. Jahrbuch des St.-Ansgarius Werkes, Köln 1983, s 70–81.
• Alois Arnstein Brodersen: Die Nordpolmission. Ein Beitrag zur Geschichte der katholischen Missionen in den nordischen Ländern im 19. Jahrhundert, Münster 2006.
• Gunnar F. Guðmundsson: Kaþólskt trúboð á Íslandi 1857–1875, Reykjavík: Sagnfræðistofnun Háskóla Íslands 1987.
• Patrick Guelpa: Petit abrégé de l'histoire de l'Église en Islande, Catholicae disputationes