Bereníke 1.
Bereníke 1. (gríska: Βερενίκη; fædd um 340 f.Kr.; dáin milli 279 og 268 f.Kr.) var önnur eiginkona og drottning Ptólemajosar 1. Sóter. Hún varð þannig önnur (á eftir Evridíku) drottning Ptólemajaríkisins í Egyptalandi hinu forna.
Bereníke var dóttir makedónsku prinsessunnar Antígónu af Makedóníu og aðalsmannsins Magasar.[1] Hún var frá Eordaeu í Norður-Makedóníu.[2] Móðurafi hennar var Kassander, bróðir Antípaters sem fór með stjórn Makedóníu í fjarveru Alexanders mikla.[1]
Fyrri eiginmaður hennar var makedónskur herforingi sem nefndist Filippos. Með honum átti hún börnin Magas af Kýrenæku, Antígónu sem giftist Pyrrhosi af Epírus, og dótturina Þeoxenu.[1]
Eftir að fyrri eiginmaður hennar lést hélt hún með börnum sínum til Egyptalands sem hirðmey Evridíku drottningar Ptólemajosar. Þau Ptólemajos giftust árið 317 f.Kr. og eignuðust saman börnin Arsinóe 2., Fílóteru og Ptólemajos 2. Fíladelfos.[3] Sonur hennar varð ríkisarfi og tekinn fram yfir börn Evridíku. Ptólemajos 2. nefndi hafnarborgina Bereníke eftir henni.
Tilvísanir
[breyta | breyta frumkóða]- 1 2 3 „Ptolemaic Dynasty -- Berenice I“. Afrit af upprunalegu geymt þann 5 október 2011. Sótt 11. september 2011.
- ↑ Carney, Elizabeth. Arsinoe of Egypt and Macedon. bls. 20. „Intriguingly, thanks to Posidippus (AB 88), we now know that Berenice, like her second husband Ptolemy I, may have been from Eordaea too.“
- ↑ „Berenice I“. Afrit af upprunalegu geymt þann 17. mars 2016. Sótt 26. mars 2020.
