António José Seguro

António José Seguro
Seguro árið 2026.
Forseti Portúgals
Núverandi
Tók við embætti 9. mars 2026
Forsætisráðherra	Luís Montenegro
Forveri	Marcelo Rebelo de Sousa
Persónulegar upplýsingar
Fæddur	11. mars 1962 (1962-03-11) Penamacor, Castelo Branco, Portúgal
Þjóðerni	Portúgalskur
Stjórnmálaflokkur	Sósíalistaflokkurinn
Maki	Margarida Maldonado Freitas (g. 2001)
Börn	2
Háskóli	Instituto Universitário de Lisboa Universidade Autónoma de Lisboa
Undirskrift

António José Martins Seguro (f. 11. mars 1962) er portúgalskur stjórnmálamaður og núverandi forseti Portúgals. Hann var kjörinn forseti í forsetakosningum landsins 8. febrúar 2026. Seguro var áður aðalritari portúgalska Sósíalistaflokksins frá 2011 til 2014 og var á þeim tíma leiðtogi stjórnarandstöðunnar á þingi Portúgals.

Æviágrip

Seguro nam skipulag og stjórnun fyrirtækja við Háskólastofnunina í Lissabon (ISCTE) en gekk síðan í Sjálfstæða háskólann í Lissabon og útskrifaðist þaðan með gráðu í alþjóðasamskiptum.

Stjórnmálaferill

Seguro var kjörinn á portúgalska þingið árið 1991 og hlaut sæti í ríkisstjórn landsins fjórum árum síðar sem ungmennamálaráðherra.

Árið 1999 var hann kjörinn á Evrópuþingið en sneri aftur til Portúgals þann 4. júlí 2001 til þess að taka sæti í ríkisstjórn António Guterres. Hann var kjörinn aftur á þing árið 2004 og varð þingflokksformaður Sósíalistaflokksins. Eftir þingkosningar í Portúgal árið 2005 varð Seguro formaður menntamálanefndar þingsins og síðan formaður efnahagsnefndar eftir kosningarnar 2009.

António José Seguro árið 2014.

Eftir ósigur Sósíalistaflokksins í þingkosningum Portúgals árið 2011 sagði José Sócrates af sér sem leiðtogi flokksins. Þeir Seguro og Francisco Assis, þáverandi þingflokksformaður flokksins, gáfu kost á sér til að taka við af honum. Í leiðtogakjörinu, sem fór fram 22. og 23. júlí, vann Seguro afgerandi sigur með 67,9% atkvæða. Seguro varð því í reynd leiðtogi stjórnarandstöðunnar. Hann var endurkjörinn flokksleiðtogi þann 13. apríl 2013 með 96,5 % atkvæðanna og 62% kjörsókn.

Eftir að Sósíalistaflokkurinn tapaði í Evrópuþingskosningunum 2014 krafðist António Costa, borgarstjóri Lissabon, þess að kallað yrði saman aukaþing Sósíalistaflokksins. Í stað þess að verða við beiðninni efndi Seguro þann 31. maí til opins prófkjörs um oddvita flokksins fyrir næstu þingkosningar. Í kosningunum hlaut Seguro aðeins 55.239 atkvæði, eða 31,65% en Costa hlaut 67,8%. Seguro sagði í kjölfarið af sér og Costa tók við forystu Sósíalistaflokksins.

Forsetakosningarnar 2026

António José Seguro gaf kost á sér í forsetakosningum Portúgals árið 2026. Hann lenti í fyrsta sæti í fyrri umferð kosninganna með 31% atkvæðanna, á undan jaðarhægriframbjóðandanum André Ventura, sem hlaut 23,5% og komst einnig í seinni umferð.

Seguro lagði mikla áherslu á andstöðu við André Ventura í kosningabaráttu sinni og á að fólk greiddi „taktísk atkvæði“. Hann sagðist boða „hófsaman sósíalisma með taug við miðjuna“ og sagðist vilja leggja höfuðáherslu á heilbrigðismál sem forseti.

Í annarri umferð kosninganna þann 8. febrúar 2026 var Seguro kjörinn forseti Portúgals með 66% greiddra atkvæða. Hann tók við embætti af Marcelo Rebelo de Sousa þann 9. mars 2026.

Tilvísanir

Fyrirrennari: Marcelo Rebelo de Sousa

Forseti Portúgals (9. mars 2026 –)

Eftirmaður: Enn í embætti