Andrej Babiš
| Andrej Babiš | |
|---|---|
.jpg) Andrej Babiš árið 2025. | |
| Forsætisráðherra Tékklands | |
Núverandi | |
| Tók við embætti 9. desember 2025 | |
| Forseti | Petr Pavel |
| Forveri | Petr Fiala |
| Í embætti 6. desember 2017 – 28. nóvember 2021 | |
| Forseti | Miloš Zeman |
| Forveri | Bohuslav Sobotka |
| Eftirmaður | Petr Fiala |
| Persónulegar upplýsingar | |
| Fæddur | 2. september 1954 Bratislava, Tékkóslóvakíu (nú Slóvakíu) |
| Stjórnmálaflokkur | ANO (2012–) Kommúnistaflokkur Tékkóslóvakíu (1980–1989) |
| Maki | Beata Adamovičová (g. 1990, skilin) Monika Herodesová (g. 2017; sk. 2024) |
| Börn | 4 |
| Undirskrift |  |
Andrej Babiš (f. 2. september 1954) er tékkneskur stjórnmálamaður og viðskiptamaður sem er núverandi forsætisráðherra Tékklands. Hann hefur verið forsætisráðherra frá 9. desember 2025 en gegndi embættinu áður frá 2017 til 2021.
Babiš er einn af ríkustu mönnum Tékklands. Hann stýrði samsteypunni Agrofert til ársins 2017 en setti þá hlut sinn í sjóð til að forðast hagsmunaárekstra. Samsteypan stundar meðal annars viðskipti í landbúnaði, matvæla- og byggingariðnaði og fjölmiðlum innan Evrópusambandsins.[1]
Babiš er stofnandi stjórnmálaflokksins ANO og var fjármálaráðherra í stjórn jafnaðarmannsins Bohuslav Sobotka til ársins 2017. Babiš vann sér töluverða alþýðuhylli í því embætti og mældist töluvert vinsælli meðal landsmanna en Sobotka.[1] ANO vann afgerandi sigur í þingkosningum Tékklands árið 2017 með um 30% atkvæða, rúmlega tvöfalt fylgi næststærsta flokksins. Babiš myndaði ríkisstjórn í kjölfar kosninganna.[2]
Árið 2021 birtist nafn Babiš í Pandóruskjölunum, sem var gagnaleki um fjármál ýmissa þjóðarleiðtoga. Í skjölunum kom fram að Babiš hafði keypt tvö glæsihýsi í Cannes í Frakklandi fyrir 12 milljónir punda í gegnum aflandsfélag. Babiš hafnaði því að neitt ólöglegt hefði verið við viðskiptin og áréttaði að bæði hann og fyrirtæki hans greiddu skatta í Tékklandi.[3] Stjórn Babiš hélt ekki velli í þingkosningum Tékklands árið 2021, sem fóru fram stuttu eftir birtingu Pandóruskjalanna.[4]
Babiš bauð sig fram til forseta Tékklands í forsetakosningum landsins árið 2023 en tapaði í seinni umferðinni fyrir hershöfðingjanum Petr Pavel. Babiš hlaut 43 prósent atkvæða en Pavel 57 prósent. Í kosningabaráttunni sakaði Babiš Pavel um að vera stríðsæsingamaður og vilja leiða Tékkland í stríð gegn Rússlandi.[5]
ANO-flokkur Babiš vann þingkosningar Tékklands árið 2025. Babiš myndaði í kjölfarið nýja stjórn með stuðningi tveggja fjarhægriflokka sem vilja draga úr stuðningi Tékka við Úkraínu í stríði Úkraínu og Rússlands.[6][7]
Tilvísanir
[breyta | breyta frumkóða]- 1 2 „Hættur við að segja af sér“. mbl.is. 5. maí 2017. Sótt 9. desember 2025.
- ↑ „Tékkneski-Trump næsti forsætisráðherra“. mbl.is. 22. október 2017. Sótt 9. desember 2025.
- ↑ „Tilraun til að koma höggi á hann“. mbl.is. 4. október 2021. Sótt 9. desember 2025.
- ↑ Þorgils Jónsson (9. október 2021). „Tékkneska stjórnin fallin“. Vísir. Sótt 9. desember 2025.
- ↑ Viktor Örn Ásgeirsson (28. janúar 2023). „Yfirburðasigur hershöfðingjans í Tékklandi“. Vísir. Sótt 29. janúar 2023.
- ↑ Oddur Þórðarson (9. desember 2025). „Trump-aðdáandi og auðkýfingur aftur orðinn forsætisráðherra“. RÚV. Sótt 9. desember 2025.
- ↑ „Moldríkur trumpisti orðinn forsætisráðherra Tékklands“. Heimildin. 9. desember 2025. Sótt 9. desember 2025.
| Fyrirrennari: Bohuslav Sobotka |
|
Eftirmaður: Petr Fiala | |||
| Fyrirrennari: Petr Fiala |
|
Eftirmaður: Enn í embætti | |||