Aðalstræti 2

Aðalstræti 2 eða Geysishúsið er íslenskt hús sem stendur við Aðalstræti í Reykjavík. Það er eitt sögufrægasta hús Reykjavíkur og hefur hýst ýmsa starfsemi.

Saga

Fyrstu verslunarhúsin í Reykjavík risu á lóð Aðalstrætis 2 þegar hús Konungsverslunarinnar voru flutt í land úr Örfirisey. Óljóst er þó að hve miklu leyti hægt var að endurreisa gömlu húsin eða hvort nothæft byggingarefni úr þeim var einungis nýtt í nýju byggingarnar.

Síðasti verslunarstjóri Konungsverslunarinnar, Johan Chr. Sunchenberg, sem einnig gegndi starfi forstöðumanns Innréttinganna tók við rekstrinum eftir að konungsversluninni var slitið og rak til dauðadags 1805 eða 1806 og varð þar með fyrsti kaupmaðurinn í Reykjavík. Eftir dauða Sunchenberg lauk föstum verslunarrekstri í húsunum um skeið og þau komust í eigu ýmissa aðila.

Árið 1853 keypti Robert Tærgesen kaupmaður húsin, lét rífa þau og reisa núverandi mannvirki tveimur árum síðar. Athygli vakti að hið nýja hús var tvílyft, sem var fágætt á þeim árum. Waldimar Fischer kaupmaður eignaðist húsið árið 1865 og rak þar verslun um langt árabil. Fischersund í Grjótaþorpi er við hann kennt.

Athafnamaðurinn H. P. Duus, sem rekið hafði umfangsmikla verslun og útgerð í Keflavík festu kaup á Fischersverslun árið 1904 og var það um þær mundir eitt stærsta fyrirtæki landsins en endaði í gjaldþroti árið 1927. Þá opnaði Ingólfs apótek í húsinu og starfaði þar um nokkurt skeið. Síðar var Veiðarfæraverslunin Geysir starfrækt í húsinu um langt árabil og dregur það nafn sitt af henni í huga margra Reykvíkinga. Ýmis starfsemi hefur verið í Aðalstræti 2 á liðnum árum, auk þess sem húsið hefur verið tengt við bakbyggingar með mikilli glerhvelfingu.