Að drepa hermikráku
.jpg) Forsíða fyrstu útgáfu bókarinnar. | |
| Höfundur | Harper Lee |
|---|---|
| Upprunalegur titill | To Kill a Mockingbird |
| Þýðandi | Sigurlína Davíðsdóttir (2022) |
| Land |  Bandaríkin |
| Tungumál | Enska |
| Stefnur | Þroskasaga |
| Útgefandi | J. B. Lippincott & Co. |
Útgáfudagur | 11. júlí 1960 |
| Síður | 281 |
| ISBN | ISBN 9789935524904 |
Að drepa hermikráku (enska: To Kill a Mockingbird) er skáldsaga eftir bandaríska rithöfundinn Harper Lee sem kom út árið 1960. Bókin naut strax mikillar velgengni og hún er víða lesin í bandarískum grunn- og menntaskólum.[1] Að drepa hermikráku vann Pulitzer-verðlaunin ári eftir að hún kom út og hún er talin sígilt verk bandarískra bókmennta.[2] Sagan og persónurnar byggja lauslega á fjölskyldu Lee, nágrönnum hennar og á atburði sem varð í heimabæ hennar, Monroeville, Alabama, árið 1936 þegar hún var tíu ára.[3]
Þrátt fyrir að sagan fjalli um alvarleg málefni á borð við nauðgun og kynþáttahyggju er hún þekkt fyrir hlýju og gamansemi. Atticus Finch, faðir sögumannsins Scout, varð mörgum lesendum siðferðileg fyrirmynd og eitt frægasta dæmið um heiðvirðan lögmann í bandarískum bókmenntum. Sagnfræðingurinn Joseph Crespino sagði um bókina: „Á tuttugustu öld er Að drepa hermikráku líklega víðlesnasta bók um kynþætti í Bandaríkjunum og aðalpersóna hennar, Atticus Finch, er þrautseigasta ímyndin af hugdirfsku í þágu kynþáttaréttlætis.“[4]
Að drepa hermikráku er þroskasaga sem fjallar meðal annars um kynþáttamisrétti og sakleysismissi. Bókmenntafræðingar hafa bent á að Lee tekur einnig á málefnum líkt og stéttskiptingu, hugrekki, umhyggju og kynhlutverkum í bandaríska suðrinu. Boðskapur sögunnar gengur út á umburðarlyndi og mælir gegn fordómum.[5] Þrátt fyrir þessi þemu hafa verið gerðar tilraunir til að taka bókina af námsskrám vegna notkunar á kynþáttaníðyrðum í texta hennar. Árið 2006 settu breskir bókasafnsfræðingar bókina fyrir framan Biblíuna á lista yfir bækur sem „allt fullorðið fólk ætti að lesa áður en það deyr.“[6]
Bókin var gerð að kvikmynd í leikstjórn Roberts Mulligan árið 1962 sem vann til Óskarsverðlauna. Frá árinu 1990 hefur leikrit byggt á bókinni verið sýnt árlega í heimabæ Harper Lee. Að drepa hermikráku var eina útgefna bók Lee þar til Go Set a Watchman, sem byggð var á eldri drögum að Að drepa hermikráku, kom út 14. júlí 2015. Lee hélt áfram að bregðast við umræðu um verkið þar til hún lést í febrúar 2016. Hún var mjög gætin um einkalíf sitt og veitti síðasta viðtal sitt árið 1964.[7]
Tilvísanir
[breyta | breyta frumkóða]- ↑ „Harper Lee: The Impact of 'To Kill a Mockingbird'“. ABC News (enska). Sótt 4 júní 2025.
- ↑ „The Pulitzer Prizes- Harper Lee“. www.pulitzer.org (enska). Sótt 4 júní 2025.
- ↑ „Was 'To Kill a Mockingbird' based on real events - DailyHistory.org“. www.dailyhistory.org. Afrit af upprunalegu geymt þann 5. september 2025. Sótt 4 júní 2025.
- ↑ Crespino, J. (2000). „The Strange Career of Atticus Finch“. Southern Cultures. 6 (2): 9–30. doi:10.1353/scu.2000.0030. S2CID 143563131.
- ↑ „Mockingbird 'dropped from GCSE exam'“. BBC News (bresk enska). 25 maí 2014. Sótt 11 júlí 2020.
- ↑ Pauli, Michelle (2. mars 2006). "Harper Lee tops librarians' must-read list", Guardian Unlimited. Sótt 13. febrúar 2008.
- ↑ Gale, Yvonne (17 nóvember 2014). „Book Conversations: Harper Lee's struggle with fame“. The Fayetteville Observer. Sótt 13 október 2024.
