Postuli

Postuli – yfirleitt postularnir tólf – (gríska: απόστολος, apóstolos = sendiboði, boðberi) voru tólf lærisveinar Jesú Krists, sem hann sendi út til að kristna heimsbyggðina.

Lærisveinarnir tólf

Samkvæmt Markúsarguðspjalli (3:16-19) og Matteusarguðspjalli (10:2-4), voru lærisveinar Krists þessir:

Andrés postuli, bróðir Péturs
Bartólómeus postuli
Filippus postuli
Jakob Alfeusson eða Jakob yngri, postuli
Jakob Sebedeusson eða Jakob eldri, postuli
Jóhannes postuli eða Jón postuli, bróðir Jakobs
Júdas Ískaríot
Júdas Taddeus, – Júdas Jakobsson skv. Lúkasarguðspjalli (6:13-16)
Matteus postuli
Símon Pétur eða Pétur postuli
Símon vandlætari
Tómas postuli

Strangt til tekið urðu lærisveinarnir ekki postular fyrr en eftir upprisu Krists (á hvítasunnu), og því er Júdas Ískaríot ekki talinn meðal postulanna.

Tólfti postulinn

Eftir að Júdas Ískaríot sveik Krist og hengdi sig, voru postularnir aðeins ellefu. Samkvæmt Postulasögunni 1:23-26, ákváðu þeir sem eftir voru að útnefna nýjan postula. Þeir vörpuðu hlutkesti um það (fyrir hvítasunnu) og kom upp nafn Matthíasar postula.

Þó að Matthías hafi verið valinn tólfti postulinn, er Páll postuli yfirleitt talinn sá tólfti, skv. gamalli hefð. Hann var ekki einn af lærisveinum Krists. Hann var farísei sem vann gegn Jesú, en varð fyrir vitrun og gerðist einn ötulasti talsmaður kristindómsins. Hann kallar sjálfan sig postula, sjá t.d. Rómverjabréfið 1:1 í Biblíunni.

Aðrir postular

Í Hebreabréfinu er Jesús sagður fyrsti postulinn. Í Postulasögunni er Barnabas kallaður postuli.

Margir af fyrstu kristnu trúboðunum eru kallaðir postular. Með því er átt við þá sérstöku þýðingu sem starf þeirra hafði fyrir útbreiðslu kristninnar í ákveðnu landi eða meðal einhverrar þjóðar. Þegar sagt er að Bonifatius sé „postuli Germana“, er átt við að hann var fyrsti kristni trúboðinn meðal þeirra. Meðal slíkra „postula“ eru:

Aðalbert, postuli Pólverja
Anastasíus, postuli Ungverjalands
Ansgar, postuli Norðurlanda
Bonifatius, postuli Germana
Kólumkilli eða heilagur Columba, postuli Skota
Kýrillos og Meþódíos, postular slafneskra þjóða
Ólafur Tryggvason, postuli Norðmanna
Patrekur hinn helgi, postuli Írlands
Úlfíla eða Wulfila, postuli Gota

Tengt efni

Heimildir

Fyrirmynd greinarinnar var „Kristendomens apostlar“ á sænsku útgáfu Wikipedia. Sótt 22. desember 2008.