Þorsteinn Hannesson

Úr Wikipediu, frjálsa alfræðiritinu
Jump to navigation Jump to search
Þorsteinn Hannesson
[[Mynd:
Þh.tiff
|225px|alt=Þorsteinn Hannesson]]
Þorsteinn Hannesson
Fæddur Þorsteinn Hámundur Hannesson
19. mars 1917(1917-03-19)
Siglufjörður, Íslandi
Látinn 3. febrúar 1999
Reykjavík
Starf/staða Söngvari

Þorsteinn Hámundur Hannesson (fæddur 19. mars 1917 á Siglufirði, dáinn 3. febrúar 1999 í Reykjavík) var íslenskur tónlistarmaður.

Þorsteinn var í söngnámi hjá Sigurði Birkis 1939­–1943 og við Royal College of Music í London frá 1943­-1947. Einnig var hann í einkatímum hjá Josep Hislop og Irving Dennis. Þorsteinn var starfsmaður Verðlagsnefndar frá 1941­ 1943. Hann var aðaltenór hjá The Covent Garden Opera Company 1947­ – ­1954 og söng jafnframt sem gestur hjá The Royal Carl Rosa Opera Company, The Sadler's Wells Opera Company og óperunum í Cork á Írlandi og í Amsterdam í Hollandi. Hann söng einnig á tónleikum og í útvarpi í París og á tónleikum víða á Bretlandseyjum. Eftir heimkomuna frá London 1954 söng hann og lék mörg hlutverk í Þjóðleikhúsinu.

Þorsteinn var yfirkennari við söngdeild Tónlistarskólans í Reykjavík 1955­­ – 1966. Hann var aðstoðarmaður forstjóra ÁTVR og síðar innkaupafulltrúi 1961­­ – 1969. Aðstoðartónlistarstjóri RÚV frá 1969 og síðan tónlistarstjóri þess 1975­­ – 1981. Hann vann við skráningu og flokkun sögulegs hljóðritasafns RÚV og hafði yfirumsjón með útgáfu valins efnis úr því safni. Einnig kenndi hann við Söngskólann í Reykjavík um skeið. Hann var í stjórn Sinfóníuhljómsveitar Íslands 1956­­ – 1960 og 1975­ – 1981. Í útvarpsráði sat hann frá 1963­­ – 1971. Þorsteinn sat í nefnd sem undirbjó stofnun sjónvarps á Íslandi. Hann var formaður barnaverndarnefndar Kópavogs 1962­ – ­1966, varaformaður 1966­ – ­1970. Hann var í undirbúningsnefnd að stofnun Tónlistarskóla Kópavogs og síðar í stjórn hans í fjögur ár. Þorsteinn sat í stjórn Lista- og menningarsjóðs Kópavogs 1974 – 1978. Einnig sat hann í stjórn Bandalags íslenskra listamanna um árabil og var varaforseti þess í tvö ár. Hann annaðist tónlistarþætti í RÚV í áratugi, las margar útvarpssögur og á seinni árum lék hann hlutverk í nokkrum kvikmyndum, meðal annars í Hvíta víkingnum, Atómstöðinni, Skyttunum og Kristnihaldi undir Jökli.

Þorsteinn Hannesson - tenór sem kom út árið 1979

Hljómplatan Þorsteinn Hannesson - tenór kom út árið 1979 á vegum SG - hljómplatna. Á henni eru íslensk sönglög sem Þorsteinn söng. Fritz Weisshappel píanóleikari sá um undirleik.

Geisladiskurinn Útvarpsperlur var gefinn út árið 2005 af RÚV