Þjóðhátíðin í Reykjavík

Þjóðhátíðin í Reykjavík eða þjóðminningardagurinn var fyrst haldin hátíðleg í Reykjavík 2. ágúst 1897 að undirlagi Stúdentafélagsins í Reykjavík. Fluttar voru ræður og keppt í íþróttagreinum á borð við kappreiðar, kapphlaup og glímu. Hið íslenska kvenfélag stóð fyrir því að hvítbláinn var borinn í skrúðgöngu upp Laugaveg og inn að Rauðará þar sem aðalhátíðarsvæðið var. Þessi dagur var síðan haldinn hátíðlegur fram að konungskomunni 1907 þegar hátíðin var haldin á Þingvöllum. Sama ár tóku stúdentafélög og ungmennafélög um allt land sig saman um að minnast fæðingar Jóns Sigurðssonar 17. júní. Dagurinn 17. júní tók svo við af 2. ágúst sem aðalhátíðisdagur sumarsins árið 1911. Eftir fyrri heimsstyrjöld tóku félög verslunarmanna að nota 2. ágúst sem hátíðisdag sem síðar þróaðist yfir í verslunarmannahelgina.