Þú lifir aðeins tvisvar
Þú lifir aðeins tvisvar (enska: You Only Live Twice) er bresk njósnamynd frá 1967 og fimmta James Bond-kvikmyndin sem Eon Productions framleiddu. Handritið var skrifað af Roald Dahl (sem var góður vinur Flemings) og byggðist aðeins lauslega á samnefndri skáldsögu Ian Fleming frá 1964.[1] Þetta var fyrsta Bondmyndin sem Lewis Gilbert leikstýrði og sú fyrsta sem lét sögur Flemings lönd og leið. Aðeins nokkrar persónur og staðir úr bókinni voru höfð með, en sagan var allt önnur.
Sean Connery leikur aðalhlutverkið, breska leyniþjónustumanninn James Bond. Hann er sendur til Japans eftir að glæpasamtökin SPECTRE hefur rænt sovéskum og bandarískum mönnuðum geimförum á braut um jörðu með sérútbúnu geimfari. Risaveldin kenna hvert öðru um sem eykur hættu á kjarnorkustyrjöld á tímum kalda stríðsins. Eftir að hafa lent í átökum við fulltrúa SPECTRE hjá stórfyrirtækinu Osato Chemicals í Tókýó rekur Bond slóð samtakanna til fjarlægrar eldfjallaeyju. Þar mætir hann höfuðpaur SPECTRE, Ernst Stavro Blofeld (Donald Pleasence), í eigin persónu í fyrsta sinn. Fram kemur að tilraunir SPECTRE til að hefja stríð milli risaveldanna séu að undirlagi Asíuríkis, sem gefið er í skyn að sé Kína.[2] Þyrlur eru áberandi í myndinni, þar á meðal þyrilvængja af gerðinni Wallis WA-116 Agile, og í lokaatriðinu berjast sérþjálfaðar ninjur frá japönsku leyniþjónustunni við útsendara SPECTRE. Toho Studios í Tókýó sáu um hluta framleiðslunnar í Japan.[3] Titillagið var flutt af Nancy Sinatra.[4]
Meðan á tökum stóð í Japan var tilkynnt að Connery myndi ekki snúa aftur sem Bond, en árið 1971 lék hann þó hlutverkið einu sinni enn fyrir Eon, í Demantar svíkja aldrei. Seinna lék hann svo í Warner Bros-myndinni Segðu aldrei aftur aldrei 1983. Þú lifir aðeins tvisvar fékk jákvæða dóma og halaði inn 111 milljón dala tekjur af kvikmyndahúsum.[5] Samt var þetta fyrsta Bondmyndin sem þénaði minna en fyrri mynd. Þetta stafaði meðal annars af ofgnótt njósnamynda og kaldastríðsmynda í kvikmyndahúsum. Þar á meðal var Bondmyndin Casino Royale frá Columbia Pictures með David Niven í aðalhlutverki. Á Íslandi kom bók Flemings út í íslenskri þýðingu árið 1966. Myndin var frumsýnd í Tónabíói í mars 1972.[6]
Tilvísanir
[breyta | breyta frumkóða]- ↑ Rubin, Steven Jay (2003). The complete James Bond movie encyclopedia. Contemporary Books. bls. 97. ISBN 978-0-07-141246-9.
- ↑ Black, Jeremy (2005). The Politics of James Bond: From Fleming's Novels to the Big Screen. University of Nebraska Press. bls. 122. ISBN 978-0-8032-6240-9.
- ↑ Kalat, David (2007). A Critical History and Filmography of Toho's Godzilla Series. McFarland & Company. bls. 89.
- ↑ Burlingame, Jon (2014). The Music of James Bond. Oxford University Press. ISBN 978-0199358854.
- ↑ „You Only Live Twice“. The Numbers. Nash Information Service. Afrit af uppruna á 5 febrúar 2008. Sótt 31 janúar 2008.
- ↑ „Tónabíó“. Vísir. 29.3.1972. bls. 13.
