Ólafur Gunnlaugsson

Ólafur Gunnlaugsson, fæddur 20. janúar 1831, lést 22. júlí 1894 í París, var íslenskur blaðamaður sem starfaði mest af í Belgíu og Frakklandi. Hann var einnig þekktur sem Ólafur Gunnlögsen og Gunlögsen. Ólafur var bróðir Bertel Högna.

Ólafur, sem var sonur Stefáns Gunnlaugssonar land- og bæjarfógeta, útskrifaðist frá Lærða skólanum í Reykjavík árið 1848, nam síðan textafræði við Kaupmannahafnarháskóla en tók embættismannapróf við Háskólann í Leuven. Hann ferðaðist mikið um Vestur-Evrópu og snerist til kaþólskrar trúar og árið 1857 fylgdi hann rússneskum prins, Paul Marie Etienne de Djunkovskij, í trúboðsferð til Finnmörku í Norður-Noregi. Djunkovski hafði snúist frá Rétttrúnaðarkirkjunni og gerst kaþólskur prestur og var forstöðumaður postullegu umdæmi norðurheimskautsins (Praefectura Apostolica Poli Arctici) sem þá var nýstofnað og var nefnt Norðurpólstrúboðið á íslensku.

Ólafur fylgdi fyrsta kaþólska prestinum og trúboðanum Bernard Bernard til Íslands 1857 og dvaldi með honum í nokkra mánuði til að kenna honum íslensku og kynna hann fyrir landsmönnum.

Ólafur hélt síðan til Rómar og dvaldi þar í eitt ár og skrifaði þaðan bréf sem var prentuð 1858 í blaðinu "Ný fjelagsrit" sem gefið var út í Kaupmannahöfn. Í lok sjötta áratugs 19. aldar settist hann að í París þar sem hann starfaði sem blaðamaður næstu 30 árin og var lengi aðalritstjóri tímaritsins Le Nord. Hann skrifaði einnig í tímaritin Le Temps og Le National undir nafninu Pierre Gérard. Hann einbeitti sér aðallega að evrópskum stjórnmálum og greinar hans í Le Nord vöktu mikla athygli og voru sendar um alla Evrópu. Ólafur hafði samband við fjölda þekktra stjórnmálamanna í ýmsum löndum, en aðallega í Frakklandi, sem hann taldi sitt annað heimaland en hafði lítið samband við Ísland.

Ítarefni

• Árni Snævarr (2022). Ísland Babýlon. Mál og menning. ISBN: 9789979347910