Ólöf Nordal

Ólöf Nordal (ÓN)
Ólöf Nordal
Fæðingardagur:	3. desember 1966(1966-12-03)
Fæðingarstaður:	Reykjavík
Dánardagur:	8. febrúar 2017 (50 ára)
Flokkur:	Sjálfstæðisflokkurinn
Þingsetutímabil
2007-2009	í Norðaust. fyrir Sjálfstfl. ✽
2009	í Norðaust. fyrir Sjálfstfl.
2009-2013	í Rvk. s. fyrir Sjálfstfl.
2016-2017	í Rvk. s. fyrir Sjálfstfl.
✽ = stjórnarsinni
Embætti
2010-2013	Varaformaður Sjálfstæðisflokksins
2015-2017	Varaformaður Sjálfstæðisflokksins
2014-2017	Innanríkisráðherra
Tenglar
Æviágrip á vef Alþingis – Vefsíða

Ólöf Nordal (f. 3. desember 1966, d. 8. febrúar 2017) var innanríkisráðherra og varaformaður Sjálfstæðisflokksins og alþingismaður Sjálfstæðisflokksins 2007-2013 og 2016-2017.

Ólöf sat á Alþingi fyrir Norðausturkjördæmi 2007-2009 og Reykjavíkurkjördæmi suður 2009-2013 og aftur frá kosningum 2016 til dánardags. Ólöf var varaformaður Sjálfstæðisflokksins 2010-2013 og 2015-2017. Ólöf ákvað að gefa ekki kost á sér til endurkjörs í alþingiskosningum 2013 og hætti sem varaformaður á landsfundi í aðdraganda þingkosninga. Árið 2015 ákvað Ólöf að bjóða sig aftur fram til embættis varaformanns Sjálfstæðisflokkins. Ólöf ákvað í lok maí 2016 að bjóða sig á ný fram til Alþingis.

Hún tók við embætti innanríkisráðherra í ríkisstjórn Sjálfstæðisflokks og Framsóknarflokks 4. desember 2014, og var fyrsti utanþingsráðherra Sjálfstæðisflokksins síðan Geir Hallgrímsson var utanríkisráðherra 1983-1986. Ólöf tók við af Hönnu Birnu Kristjánsdóttur sem innanríkisráðherra þegar sú síðarnefnda sagði af sér. Ólöf gegndi ráðherraembætti þar til í janúar 2017.

Faðir hennar var Jóhannes Nordal, fyrrverandi bankastjóri Seðlabanka Íslands og móðir hennar er Dóra Nordal, píanóleikari og húsmóðir. Eiginmaður Ólafar var Tómas Már Sigurðsson, forstjóri Alcoa á Íslandi og eignust þau fjögur börn; Sigurð 1991, Jóhannes 1994, Herdísi 1996 og Dóru 2004.

Ólöf greindist með krabbamein síðsumars árið 2014 og lést af þess völdum 8. febrúar 2017.

Menntun

Ólöf varð stúdent frá Menntaskólanum í Reykjavík 1986, lauk lögfræðiprófi við Háskóla Íslands 1994 og fékk málflutningsréttindi fyrir Héraðsdómi árið 1999. Árið 2002 útskrifaðist hún með MBA-próf frá Háskólanum í Reykjavík. Hún sótti ýmis námskeið á sviði lögfræði, afbrotafræði og réttarsögu, meðal annars við Cornell-háskóla í Bandaríkjunum. Einnig sótti hún ýmis námskeið á sviði stjórnsýslu og fjármála.

Starfsferill

Ólöf starfaði í lögfræðideild Landsbanka Íslands 1995-1996. Hún var deildarstjóri í samgönguráðuneytinu 1996-1999. Lögfræðingur hjá Verðbréfaþingi Íslands 1999-2001. Stundakennari í lögfræði við Háskólann á Bifröst 1999-2002 og vann að stofnun lagadeildar við skólann. Deildarstjóri lagadeildar við Háskólann á Bifröst 2001-2002. Yfirmaður heildsöluviðskipta hjá Landsvirkjun 2002-2004. Framkvæmdastjóri sölusviðs hjá RARIK 2004-2005 og framkvæmdastjóri Orkusölunnar 2005-2006. Ólöf tók ennfremur að sér störf við þýðingar og þýddi bókina Sjáðu barnið eftir Desmond Morris, sem gefin var út af Almenna bókaforlaginu árið 1993.

Trúnaðarstörf

Á Alþingi gegndi Ólöf margvíslegum trúnaðarstörfum, meðal annars var hún varaformaður samgöngunefndar, sat í allsherjarnefnd og umhverfisnefnd. Hún sat í háskólaráði Háskólans á Akureyri, stjórn Handverks og hönnunar, var formaður nefndar á vegum fjármálaráðuneytis um kynbundinn launamun og fleira. Hún sat í ýmsum nefndum í tengslum við störf sín, meðal annars á sviði fjármálamarkaða, og var formaður nefndar á vegum fjármálaráðuneytis, sem hefur það að markmiði að draga úr kynbundum launamuni hjá hinu opinbera.

Tenglar

• Ég býð fram krafta mína, lesendagrein eftir Ólöfu í Morgunblaðinu 25. nóvember 2006

Fyrirrennari: Hanna Birna Kristjánsdóttir	Innanríkisráðherra (4. desember 2014 – 11. janúar 2017)	Eftirmaður: Sigríður Á. Andersen Jón Gunnarsson
Fyrirrennari: Þorgerður Katrín Gunnarsdóttir	Varaformaður Sjálfstæðisflokksins (26. júní 2010 – 24. febrúar 2013)	Eftirmaður: Hanna Birna Kristjánsdóttir