Ókindin (kvikmynd)

Ókindin
Jaws
Kvikmyndaplakat eftir Roger Kastel
Leikstjóri	Steven Spielberg
Handritshöfundur	Peter Benchley Carl Gottlieb
Byggt á	Ókindin eftir Peter Benchley
Framleiðandi	Richard D. Zanuck David Brown
Leikarar	Roy Scheider Robert Shaw Richard Dreyfuss Lorraine Gary Murray Hamilton
Kvikmyndagerð	Bill Butler
Klipping	Verna Fields
Tónlist	John Williams
Fyrirtæki	Zanuck/Brown Company Universal Pictures
Dreifiaðili	Universal Pictures
Frumsýning	20. júní 1975 (1975-06-20)
Lengd	124 mínútur
Land	Bandaríkin
Tungumál	Enska
Ráðstöfunarfé	$9 milljónir
Heildartekjur	$495 milljónir

Ókindin (enska: Jaws) er bandarísk spennumynd frá árinu 1975 í leikstjórn Stevens Spielberg, byggð á samnefndri skáldsögu frá 1974 eftir Peter Benchley. Roy Scheider birtist í aðalhlutverkinu sem lögreglustjórinn Martin Brody, sem slæst í för með sjávarlíffræðingi (Richard Dreyfuss) og hákarlaveiðimanni (Robert Shaw) til að veiða hvíthákarl sem ræðst á strandgesti í hafnarbæ í Nýja-Englandi. Murray Hamilton birtist sem bæjarstjóri bæjarins og Lorraine Gary sem eiginkona Brodys. Handrit myndarinnar er eignað Benchley, sem skrifaði fyrstu drögin, og Carl Gottlieb, sem endurskoðaði handritið á meðan aðaltökur stóðu yfir.

Ókindin var að mestu tekin upp í Martha's Vineyard í Massachusetts frá maí til október árið 1974. Hún var fyrsta stórmyndin sem var tekin upp á hafi og framleiðsla hennar var því flókin, kostnaður við gerð myndarinnar fór fram úr áætlun og framleiðslutíminn dróst á langinn. Þar sem vélhákarlarnir sem notaðir voru í myndinni biluðu gjarnan ákvað Spielberg að gefa nærveru hákarlsins að mestu til kynna frekar en að sýna hann skýrt og notaði uggvænlegt tónlistarstef eftir John Williams til að boða komu hans. Spielberg og aðrir báru þessa nálgun saman við spennusköpun í kvikmyndum Alfreds Hitchcock. Universal Pictures lét sýna myndina í rúmlega 450 kvikmyndahúsum, sem var mjög há tala á þessum tíma, og hrinti af stað öflugri auglýsingaherferð með áherslu á sjónvarpsauglýsingar og söluvarning.

Ókindin markaði tímamótaspor í kvikmyndasögunni þar sem hún skapaði fordæmi fyrir árlegum sumarstórmyndum. Myndin var tekjuhæsta kvikmynd allra tíma þar til Stjörnustríð var frumsýnd tveimur árum síðar. Báðar myndirnar áttu þátt í að móta viðskiptamódel Hollywood, þar sem leitast er við því að afla hárra sýningartekna með ævintýra- og hasarmyndum sem sýndar eru um sumur í þúsundum kvikmyndahúsa eftir kröftugar auglýsingaherferðir. Þrjár framhaldsmyndir af Ókindinni voru gerðar án aðkomu Spielbergs og Benchley, auk þess sem myndin gat af sér ótal eftirhermur. Árið 2001 valdi Þjóðskjalasafn Bandaríkjanna myndina til varðveislu í kvikmyndasafninu National Film Registry.

Leikarar

• Roy Scheider sem Martin Brody lögreglustjóri
• Robert Shaw sem Quint
• Richard Dreyfuss sem Matt Hooper
• Lorraine Gary sem Ellen Brody
• Murray Hamilton sem Larry Vaughn bæjarstjóri
• Carl Gottlieb sem Meadows
• Jeffrey Kramer sem Leonard Hendricks aðstoðarlögreglustjóri
• Susan Backlinie sem Chrissie Watkins
• Lee Fierro sem frú Kintner
• Peter Benchley sem viðmælandi

Tilvísanir

  Þessi kvikmyndagrein er stubbur. Þú getur hjálpað til með því að bæta við greinina.