Íslenskar orkurannsóknir

Íslenskar orkurannsóknir (ÍSOR)
Rekstrarform	Opinbert fyrirtæki
Stofnað	1. júlí 2003
Staðsetning	Urðarhvarf 8, 203 Kópavogur
Lykilpersónur	Örn Viðar Skúlason, stjórnarformaður, Árni Magnússon, forstjóri
Starfsemi	Rannsóknir jarð- og orkuauðlinda, kennsla í hagnýtum jarðhitafræðum
Starfsfólk	40-50
Vefsíða	www.isor.is

Íslenskar orkurannsóknir (skammstafað: ÍSOR) er íslensk rannsóknastofnun sem heyrir undir Umhverfis-, orku- og loftslagsráðuneyti Íslands. Stofnunin vinnur að verkefnum á sviði náttúrufars, orkumála og annarra auðlindamála. Stofnunin starfar á samkeppnismarkaði og aflar sér tekna með sölu á rannsóknum, ráðgjöf, þjónustu og upplýsingum. Starfsmenn eru hátt í 80 talsins. Aðalskrifstofan er í Kópavogi en auk þess er rekið útibú á Akureyri.

Rannsóknir

Á Íslenskum orkurannsóknum fer fram fjölþætt starfsemi sem miðar að því að uppfylla þarfir orkuiðnaðarins fyrir grunnrannsóknir. Þar er jafnframt veitt fjölbreytt þjónusta tengd rannsóknum orkulinda og nýtingu þeirra. ÍSOR veitir líka aðilum utan orkugeirans ýmsa þjónustu á sviði jarðvísinda. Helstu þættir í þjónustu ÍSOR eru:

• Jarðhitarannsóknir
• Vatnsorkurannsóknir
• Hafsbotnsrannsóknir (sjá t.d. Drekasvæðið)
• Umhverfisrannsóknir
• Grunnvatnsathuganir
• Neysluvatnsrannsóknir
• Jarðfræðileg ráðgjöf t.d. varðandi jarðgöng
• Alhliða jarðfræðikortlagning
• Kortagerð

Jarðhitaleit

ÍSOR hefur með höndum jarðhitaleit og rannsóknir á jarðhitasvæðum um allt land. Rannsóknirnar fela í sér eftirtalda þætti:

• Jarðhitaleit og alhliða rannsóknir á jarðhita
• Ráðgjöf og þjónustu við boranir
• Ráðgjöf og þjónustu við eftirlit með jarðhitakerfum, rekstri þeirra og nýtingu
• Tæknilegar og hagrænar athuganir á nýjum nýtingartækifærum jarðhita
• Kennslu og þjálfun í jarðhitafræðum

Sérfræðingar ÍSOR hafa stundað rannsóknir víða um heim einkum á sviði jarðhitarannsókna og ráðgjafar.

Jarðhitaskóli

Jarðhitaskóli Háskóla Sameinuðu þjóðanna (JHS) starfaði innan vébanda ÍSOR, en er nú hluti af sjálfstæðu stofnuninni GRÓ þekkingarmiðstöð þróunarsamvinnu. Hann var áður á Orkustofnun en var fluttur þaðan í ársbyrjun 2021. Hlutverk skólans er að veita ungum sérfræðingum frá þróunarlöndum, sérhæfða þjálfun í rannsóknum á jarðhita og nýtingu hans. Skólinn er mikilvægur þáttur í þróunaraðstoð Íslendinga. Á yfir 40 ára starfsferli sínum, hefur skólinn útskrifað meira en 800 sérfræðinga.