Íslamska ríkið
Íslamskt ríki í Írak og Austurlöndum nær (arabíska: الدولة الإسلامية في العراق والشام ad-Dawlah al-Islāmiyah fī 'l-ʿIrāq wa-sh-Shām, skammstafað Daesh) eða einfaldlega Íslamska ríkið, ISIL eða ISIS, eru öfgasinnuð salafísk skæruliðasamtök sem hafa lýst yfir stofnun súnní-íslamsks ríkis og kalífadæmis. Samtökin ráða yfir stóru landsvæði í Írak og Sýrlandi þar sem búa um tíu milljónir manna og ræður auk þess að nafninu til yfir litlum svæðum í Líbýu og Nígeríu. Samtökin hafa verið virk í Uppreisninni í Írak og Sýrlensku borgarastyrjöldinni. Skæruliðasamtök í Líbýu, Alsír, Afganistan, Jemen og Nígeríu hafa lýst yfir hollustu við Íslamska ríkið.
Sameinuðu þjóðirnar hafa sakað Íslamska ríkið um stríðsglæpi og mannréttindabrot og Amnesty International hefur talað um þjóðernishreinsanir á „sögulegum skala“. Fjöldi ríkja, Sameinuðu þjóðirnar og Evrópusambandið hafa lýst samtökin hryðjuverkasamtök. Yfir 60 lönd eiga beint eða óbeint í stríði við Íslamska ríkið.