Ásta Dís Óladóttir

Dr. Ásta Dís Óladóttir er íslenskur fræðimaður, prófessor í viðskiptafræði við Háskóla Íslands og stjórnandi með sérhæfingu í stjórnun, sjávarútvegi og alþjóðaviðskiptum. Hún hefur starfað bæði innan akademíunnar og í atvinnulífinu, þar sem hún hefur oft verið í lykilhlutverkum.

Æviágrip

Ásta Dís lauk doktorsprófi í alþjóðaviðskiptum frá Copenhagen Business School árið 2010 og fjallaði doktorsritgerð hennar um útrás íslenskra fyrirtækja. Hún hefur ritað margt á því sviði og veitt fjölmörg viðtöl. Hún er með meistaragráðu í stjórnun og stefnumótun frá Háskóla Íslands (2001) og framkvæmdi þá fyrstu rannsóknina á Íslandi um þekkingarstjórnun. Á þeim tíma gegndi hún jafnframt stöðu framkvæmdastjóra Félags viðskiptafræðinga og hagfræðinga. Samhliða rannsókn Ástu Dísar fór fram val á þekkingarfyrirtæki ársins og úr varð Þekkingardagurinn, þar veitir Forseti Íslands stjórnendum þekkingarfyrirtækis ársins verðlaun. Valið hefur haldist óslitið frá árinu 2000. Ásta Dís lauk BA-gráðu í félagsfræði frá sama skóla (1999). Rannsóknir hennar hafa einblínt á stefnumótun, jafnrétti kynjanna í stjórnunarstöðum, og þróun í sjávarútvegi.

Sem prófessor við Háskóla Íslands hefur hún kennt fjölbreytt viðfangsefni innan viðskiptafræða og haft áhrif á stefnumótun og þróun kennslu innan sviðsins. Hún kom á fót starfsþjálfun Viðskiptafræðideildar setti á laggirnar námskeiðin Viðskiptaáætlanir og Rekstur í sjávarútvegi, sem nú heitir Nýsköpun og sjálfbærni í sjávarútvegi og eldi. Hún hefur birt fjölda vísindagreina, bókarkafla og fræðilegra skýrslna sem snúa að jafnrétti, stjórnun og nýsköpun í atvinnulífinu. Hún er annar höfundur bókarinnar Fisheries and Aquaculture: The Food Security of the Future, sem kom út árið 2021 og gaf út bókina Sjávarútvegur og eldi ásamt Ágústi Einarssyni árið 2024. Ásta Dís hefur í gegnum störf sín við háskóla, bæði hér á landi og erlendis leiðbeint á þriðja hundrað nemendum með lokaverkefni sín á BS, MS, MBA og P.hD stigi.

Stjórnunar og stjórnarstörf

Ásta Dís hefur gegnt fjölmörgum stjórnunar- og stjórnarstörfum í íslensku atvinnulífi. Hún starfaði sem framkvæmdastjóri Félags viðskiptafræðinga og hagfræðinga, framkvæmdastjóri Fríhafnarinnar og framkvæmdastjóri Heilsuverndarstöðvarinnar. Þá var Ásta Dís fyrsta konan á Íslandi til að gegna stöðu forseta viðskiptafræðideildar við íslenskan háskóla.

Hún hefur setið í fjölmörgum stjórnum, hér á landi og erlendis. Til að mynda í stjórnum Byggðastofnunar, Samkeppniseftirlitsins, Vátryggingafélags Íslands, Lífís, Sparisjóðs Keflavíkur, Frumtaki, Mentor, Norrænum Myndum, Húsasmiðjunni, Inpro o.fl. Þá hefur hún átt sæti í endurskoðunarnefndum, starfskjaranefndum og gerðardómum í gegnum árin.  Hún var skipuð stjórnarformaður Nýsköpunarsjóðs atvinnulífsins árið 2023 og hefur setið í stjórnum stórra fyrirtækja eins og Samherja hf. og Ice Fresh Seafood. Hún hefur einnig verið formaður Jafnvægisvogarráðs FKA Viðskiptafræðistofnunar Háskóla Íslands og er formaður Vísindasjóðs Háskólans á Akureyri.

Með þessum störfum hefur hún haft áhrif á stefnumótun innan atvinnulífsins og unnið að því að efla jafnrétti og nýsköpun í rekstri íslenskra fyrirtækja. Hún hefur sérstaklega beitt sér fyrir aukinni hlutdeild kvenna í stjórnunarstöðum og fræðslu um hlutverk jafnréttis í efnahagslegri framþróun.

Ásta Dís hefur verið ötul talskona fyrir jöfn tækifæri kynja til efnhagslegrar þátttöku og ákvarðanatöku í viðskiptalífinu og hefur lagt sitt af mörkum til umræðunnar um það hvernig hægt sé að auka fjölbreytni og jafna kynjahlutföll í stjórnunarstöðum

Áhrif og viðurkenningar

Ásta Dís hefur hlotið viðurkenningar fyrir störf sín á sviði jafnréttismála og sjávarútvegi.

Ásta Dís leiðir í dag öflugt rannsóknateymi sem skoðar jöfn tækifæri kynja til efnahagslegrar þátttöku og ákvarðanatöku i atvinnulífinu og hafa þau birt fjölmargar greinar og haldið erindi hér heima og erlendis.

Tenglar

• Rannsóknarteymi um jöfn tækifæri kynja

Bækur

• Ásta Dís Óladóttir og Ágúst Einarsson (2024).  Sjávarútvegur og eldi.  Hið íslenska bókmenntafélag.  ISBN prentuð bók: 978-9935-502-82-7.  I SBN Rafbók: 978-9935-502-81-0
• Ágúst Einarsson og Ásta Dís Óladóttir (2021). Fisheries and Aquaculture: The Food Security of the Future 1st ed. Cambridge, Massachusetts: Elsevier, ISBN: 9780128210567