Ytra-Hvarf

Ytrahvarf í Svarfaðardal (mars 2008)

Ytra-Hvarf er bær í Svarfaðardal. Hann er austan Svarfaðardalsár nálægt dalamótum Svarfaðardals og Skíðadals og um 10 km frá Dalvík. Ofan bæjarins er Hvarfsfjall og nokkru innan hans er Hvarfið, stórt berghlaup sem fallið hefur úr Hvarfsfjalli. Berghlaupshólarnir loka mynni Skíðadals. Bærinn Syðra-Hvarf er sunnan hólanna. Ytra-Hvarf er, og hefur lengi þótt, góð bújörð með stór og flatlend tún og bithaga í fjalli. Bæjarins er ekki getið í rituðum heimildum fyrr en á 16. öld en líklega hefur hann byggst snemma á öldum. Í lok 19. aldar var Jóhann Jónsson (1836-1901) bóndi á Hvarfi og Solveig Jónsdóttir kona hans. Jóhann var einn helsti forsvarsmaður Svarfdælinga á sínum tíma, oddviti, hreppstjóri og sýslunefndarmaður. Hann var einn af stofnendum Búnaðarfélags og Sparisjóðs Svarfdæla og kom víða við í menningarmálum sveitarinnar.

Hvarfsfólkið hefur lengi verið þekkt fyrir tónlistargáfur og landsþekkt hljómlistafólk er þaðan runnið.

Tónlistarfólk ættað frá eða tengt Ytra-Hvarfi:

• Jakob Tryggvason, organisti, kórstjóri og tónlistarkennari á Akureyri
• Jóhann Tryggvason, kórstjóri og tónlistarkennari í London
• Ólafur Tryggvason bóndi á Ytrahvarfi og organisti í Svarfaðardal
• Þórunn Jóhannsdóttir, píanóleikari og tónlistarkennari, Sviss
• Vladímír Ashkenazy, píanóleikari og hljómsveitarstjóri, Sviss
• Jóhann Ólafsson á Ytrahvarfi, organisti og kórstjóri Karlakórs Dalvíkur
• Ólöf Arnalds, söngkona og söngvaskáld í Reykjavík
• Vladimir Stefan Ashkenazy 'Vovka'
• Dimitri Thor Ashkenazy