Viðoy

Kort af Viðoy

Séð yfir til Hvannasunds á Viðoy frá Borðoy.

Viðoy (íslenska: Viðey) er nyrsta eyja Færeyja og er norðaustan við Borðoy og nú tengd henni með landfyllingu. Eyjan er 41 km² og íbúarnir rúmlega 600. Nafnið Viðoy er dregið af rekaviði sem berst að austurströnd eyjarinnar frá Síberíu.

Á Viðoy eru tvær byggðir, Hvannasund (260 íbúar 1. janúar 2009) á suðausturströndinni og Viðareiði (351 íbúi) á norðausturströnd eyjarinnar. Í Viðareiði eru kirkjan og prestssetrið þar sem aðalpersónan í skáldsögunni Barbara eftir Jørgen Frantz Jacobsen átti heima.

Fjöllin á eynni eru há og torfær. Hæst þeirra er Villingdalafjall (841 m). Nyrst á eynni er Enniberg, standberg 755 metra lóðrétt í sjó, hæsta lóðrétta standberg Evrópu og kannski alls heimsins. Hægt er að komast þangað fótgangandi frá Viðareiði.

Á föstudaginn langa, 23. apríl 1943, flaug bresk Catalina-sjóflugvél á fjallshlíð við Viðvíksrók. Allir um borð, átta manns, fórust. Enn má sjá leifar af flakinu í fjallshlíðinni.