Svalur í hringnum

Svalur í hringnum er önnur bók Frosks útgáfu um Sval og Val og kom út árið 2014. Er bókin þó merkt númer þrjú í ritröðinni, en bók nr. 3 kom út síðar. Hún hefur að geyma þrjár sögur frá upphafsárum Franquin, sem allar birtust í fyrstu bók hinnar opinberu Svals og Vals-ritraðar Quatre aventures de Spirou et Fantasio

Söguþráður

Spirou et les plans du robot (íslenska: Vélmennisuppdrátturinn) er sjálfstætt framhald eldri sögu um Sval og Val, sem sagði frá útistöðum þeirra við geggjaðan vísindamann sem fundið hafði upp fullkomið vélmenni. Sagan hefst á að þeir félagarnir lesa viðtal við vísindamanninn, sem komið hafði verið fyrir á geðveikrahæli. Í því segir hann frá vélmenni sínu og sjá Svalur og Valur í hendi sér að glæpamenn muni ásælast teikningarnar þessari snjöllu uppfinningu, ef þær sé að finna í tilraunastofu hans.

Eftir mikinn eltingaleik tekst Sval að farga teikningunum. Glæpamennirnir halda þá á geðveikrahælið og ræna vísindamanninum en Svalur og Valur ná honum til baka. Vísindamaðurinn fær höfuðhögg og gleymir öllu um vítisvélar þær sem hann ætlaði að búa til og gerist friðsamur. Þrjótarnir eru handteknir.

Spirou sur le ring (íslenska: Svalur í hringnum) gerist meðal götustráka í Brussel. Fanturinn og hrekkjusvínið Steingeir veður uppi með ofríki gagnvart smástrákunum í hverfinu. Einn þeirra er vinur Svals og verður úr að Svalur og Steingeir mætist í hnefaleikabardaga.

Í aðdraganda bardagans lúskrar Steingeir á saklausum vegfarendum og beitir fjárkúgunum. Svalur kemst hins vegar í kynni við gamlan hnefaleikaþjálfara sem veitir honum leiðsögn. Þrátt fyrir ýmis bellibrögð andstæðingsins vinnur Svalur frægan sigur í bardaganum. Steingeir er hrakinn í burtu af smástrákunum, en Svalur sýnir honum göfuglyndi og þeir verða vinir.

Spirou fait du cheval (íslenska: Svalur knapi) er stysta saga bókarinnar, rétt um átta blaðsíður að lengd. Svalur og Valur bregða sér í útreiðartúr, en bykkjan sem Svalur fær til reiðar gengur af göflunum og reynist hafa gríðarlegan stökkkraft. Útreiðartúrinn endar því með ósköpum.

Upprunaleg útgáfa

Svalur í hringnum er séríslensk útgáfa í þeim skilningi að sögur þessar hafa ekki verið prentaðar einar og sér saman á bók í öðrum löndum. Allar sögurnar þrjár birtust í fyrstu Svals og Vals-bókinni: Quatre aventures de Spirou et Fantasio (íslenska: Fjórum ævintýrum um Sval og Val).

Útgáfuupplýsingar

Svalur í hringnum var gefin út af Froski útgáfu árið 2014. Jean Antoine Posocco, eigandi útgáfunnar, sá um uppsetningu og handskrift. Anita K. Jónsson er skráð fyrir íslenskri þýðingu.