Piparhólmi

Úr Wikipediu, frjálsa alfræðiritinu
Stökkva á: flakk, leita
Eyrarsundsbrúin og Piparhólmi

Piparhólmi (danska: Peberholm, sænska: Pepparholm) er manngerð eyja á Eyrarsundi, rétt sunnan við Salthólma. Eyjan tilheyrir danska sveitarfélaginu Tårnby. Gerð hennar hófst 1995 og var hluti af framkvæmdum við Eyrarsundsbrúna sem kom á járnbrautar- og vegasambandi á milli Kaupmannahafnar í Danmörku og Málmeyjar í Svíþjóð. Brúarsporðurinn Danmerkurmegin er á eynni og þaðan liggja svo akvegur og járnbraut í jarðgöngum yfir á Amager. Eyjan er u.þ.b. 4 kílómetra löng og 200-500 metra breið.

Upphaflegar hugmyndir um brúarsmíðina gerðu ráð fyrir því að leggja veginn annaðhvort um Salthólma eða á landfyllingum við þá eyju en það þótti ekki umhverfislega verjandi þar sem að Salthólmi er nokkuð óspilltur og mikilvægt verndarsvæði fugla. Piparhólmi sjálfur er svo náttúrufræðitilraun en engu grasi né öðrum plöntutegundum var komið fyrir þar í framkvæmdunum heldur á plöntu- og dýralíf að festa þar rætur upp á eigið eindæmi undir nánu eftirliti vísindamanna. Til þess að vernda þetta eru allar mannaferðir takmarkaðar mjög á eynni fyrir utan veginn og járnbrautina. Í dag hafa margar sjaldgæfar plöntur, og jafnvel nokkrar sem taldar voru útdauðar, numið þar land en fræ þeirra kunna að hafa legið í dvala í jarðveginum sem notaður var í eynna en hann var fenginn af botni Eyrarsunds.

séð frá norðvestri

Tengill[breyta]